នៅក្នុងប៉ុន្មានឆ្នាំចុងក្រោយនេះវិនិយោគិនបរទេស ពុំសូវចាប់អារម្មណ៍ក្នុងការបង្កើតក្រុមហ៊ុនថ្មី នៅក្នុងប្រទេសវៀតណាមនោះទេ ដោយពួកគេ ងាកមកមើលពី ឱកាសចូលហ៊ុនវិនិយោគ នៅក្នុងក្រុមហ៊ុនក្នុងស្រុក ដែលមានស្រាប់ ឬទិញយកក្រុមហ៊ុនតែម្តង ដែលធ្វើឲ្យពួកគេ អាចឈានជើងចូលទីផ្សារក្នុងស្រុក ដែលអាចរកកម្រៃបានភ្លាមៗតែម្តង។
ដោយសារតែវិបត្តិមេរោគកូវីដ១៩ ក្រុមហ៊ុនក្នុងស្រុកវៀតណាមជាច្រើន បានជួបនឹងបញ្ហាកកស្ទះលំហូរហិរញ្ញវត្ថុ ដែលជម្រុញឲ្យពួកគេ ចាំបាច់ត្រូវលក់ភាគហ៊ុន ទៅឲ្យវិនិយោគិនថ្មីៗ ភាគច្រើនជា ជនបរទេស។
ជាក់ស្តែងក្រសួងផែនការ និងវិនិយោគវៀតណាម បានគូសបញ្ជាក់ឲ្យឃើញថា ក្នុងរយៈពេល ៤ខែដើមឆ្នាំ២០២០នេះ គម្រោងវិនិយោគពីក្រៅប្រទេស ដែលបានចុះបញ្ជីថ្មី បានធ្លាក់ចុះប្រមាណ ១០% ធៀបនឹងពេលដូចគ្នាកាលពីឆ្នាំមុន ក៏ប៉ុន្តែ ចំនួនក្រុមហ៊ុនដែលត្រូវបាន វិនិយោគិនបរទេស កាន់កាប់ បានកើនឡើងរហូតដល់ទៅ ៣៣% ឯណោះ។
អត្ថបទគួរអាន
អំឡុងពេល ៤ខែនេះ យើងឃើញមានសកម្មភាពទិញក្រុមហ៊ុនថ្មីជាង ២៦00ក្រុមហ៊ុន ក្នុងតម្លៃជាង ១,៦ពាន់លានដុល្លារអាមេរិក ដោយគ្មានការបន្ថែមដើមទុនចុះបញ្ជីនោះទេ ហើយក្នុងនោះ ប្រទេសជប៉ុន ឈរលំដាប់ថ្នាក់លេខ ១ ជាវិនិយោគិនបរទេស ដែលបានទិញក្រុមហ៊ុនវៀតណាមច្រើនជាងគេ រហូតដល់ទៅ ៧៤០លានដុល្លារអាមេរិក ខណៈប្រទេសកូរ៉េខាងត្បូង និងប្រទេសសិង្ហបុរី ចំណាយជាង ៣០០លានដុល្លារអាមេរិក ទិញក្រុមហ៊ុននៅវៀតណាម។
ចំពោះបញ្ហានេះ រដ្ឋមន្ត្រីក្រសួងផែនការ និងវិនិយោគវៀតណាម បានបញ្ជាក់ថា ការទិញក្រុមហ៊ុនបែបនេះ នឹងបន្តកើនឡើងទៀត នាពេលខាងមុខ ហើយភាគច្រើន វិនិយោគិនបរទេស ចាប់អារម្មណ៍លើ វិស័យអចលនទ្រព្យ វិស័យលក់ដុំនិងរាយ និងក្រុមហ៊ុនផ្សេងៗទៀត ដែលកំពុងតែជួបនឹងផលលំបាក ហើយប្រឈមមុខនឹង ការក្ស័យធន។
អត្ថបទគួរអាន!
គួរជម្រាបដែរថា សភាពាណិជ្ជកម្ម និងឧស្សាហកម្មវៀតណាម ក៏បានដាក់ញ្ញត្តិទៅ នាយករដ្ឋមន្ត្រីវៀតណាម ដើម្បីពិចារណាផ្អាក ការទិញលក់ក្រុមហ៊ុនក្នុងស្រុកទៅឲ្យ វិនិយោគិនបរទេស ជាបណ្តោះអាសន្នសិន ក្នុងពេលមានវិបត្តិកូវីដ១៩នេះ ខណៈបណ្តាប្រទេសដទៃជាច្រើន ក៏បានដាក់បំរាមលើ ការទិញលក់ក្រុមហ៊ុន អំឡុងពេលនេះ ហើយរដ្ឋាភិបាលថែមទាំង ជួយទិញភាគហ៊ុនរបស់ក្រុមហ៊ុនសំខាន់ៗថែមទៀតផង៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
