គម្រោងផ្លូវក្រវាត់ក្រុងទី៤ បញ្ចប់ការសិក្សាបឋមហើយ តែនៅស្រពេចស្រពិលមិនទាន់ដឹងសាងសង់ពេលណានៅឡើយ

ឯកឧត្តម ហេង រ័ត្នពិសិដ្ឋ បានលើកឡើងប្រាប់ខេមបូណូមីសថា បើទោះបីជាការសិក្សាបឋមផ្លូវក្រវ៉ាត់ក្រុងទី៤ បានបញ្ចប់ក៏ពិតមែន ប៉ុន្តែក្រសួងនៅមានការសិក្សាច្រើនដំណាក់កាលទៀត ទាំងទីកន្លែង និង ទំហំវិនិយោគជាដើម។ អ្នកនាំពាក្យក្រសួងសាធារណៈការ និងដឹកជញ្ជូនរូបនេះ បានបញ្ជាក់ថា ការសាងសង់ផ្លូវក្រវ៉ាត់ក្រុងទី៤ ត្រូវការពេលវេលាយូរទៀត ពិសេសអាស្រ័យលើស្ថានភាពសេដ្ឋកិច្ចកម្ពុជាជាចាំបាច់។ ក្រៅពីការរង់ចាំឱ្យស្ថានភាពសេដ្ឋកិច្ចកម្ពុជាប្រសើរឡើងវិញ ការសាង់សង់ផ្លូវក្រវ៉ាត់ក្រុងទី៤ ក៏ត្រូវរង់ចាំឱ្យការសាងសង់ផ្លូវក្រវ៉ាត់ក្រុងទី៣បញ្ចប់សិនដែរ។ 

ដោយឡែក ពាក់ព័ន្ធផ្លូវក្រវ៉ាត់ក្រុងទី៣ វិញ ត្រូវបានអ្នកនាំពាក្យក្រសួងសាធារណៈការ និងដឹកជញ្ជូន បញ្ជាក់ថា ការសាងសង់អាចនឹងបញ្ចប់នៅចុងឆ្នាំ២០២២ ព្រោះដំណើរការសាងសង់ត្រូវរាំងស្ទះ ដោយសារកូវីដ-១៩។ ផ្លូវក្រវ៉ាត់ក្រុងទី៣ គម្រោងចំណាយថវិកាសរុបប្រមាណជិត ២៦៨ លានដុល្លារអាមេរិក ក្រោមហិរញ្ញប្បទានរបស់រដ្ឋាភិបាលចិន។ ផ្លូវក្រវ៉ាត់ក្រុងទី៣ ជាការតភ្ជាប់ផ្លូវជាតិលេខ៦ ផ្លូវជាតិលេខ៥ ផ្លូវជាតិលេខ៤ ផ្លូវជាតិលេខ៣ ផ្លូវជាតិលេខ២ រហូតដល់ផ្លូវជាតិលេខ១ កាត់ភូមិសាស្រ្តរាជធានីភ្នំពេញ និង ខេត្តកណ្ដាល។

ផ្លូវក្រវ៉ាត់ក្រុងទី៣ មានប្រវែងសរុបជិត ៥៣ គីឡូម៉ែត្រ មានទទឹង ២២ម៉ែត្រ និង មាន ៤គន្លង។ ផ្លូវក្រវ៉ាត់ក្រុងទី៣នេះ ជាមធ្យោបាយដឹកជញ្ជូនដ៏សំខាន់សម្រួលដល់អ្នកវិនិយោគ និងអាចទាក់ទាញអ្នកវិនិយោគផងដែរ៕

អត្ថបទ៖ ខន ណារី