ក្រុមហ៊ុនគ្រប់គ្រងទ្រព្យសម្បត្តិនៅចិនមួយ ប្រឈមនឹងក្ស័យធនជាមួយបំណុលជាង៦០ពាន់លានដុល្លារ

នៅក្នុងលិខិតមួយដែលជូនដំណឹងដល់ក្រុមវិនិយោគិន ហើយបានបែកធ្លាយនៅតាមប្រព័ន្ធផ្សព្វផ្សាយសង្គម Weibo របស់ចិន បានឱ្យដឹងថា ក្រុមហ៊ុន Zhongzhi ដែលរងផលប៉ះពាល់ខ្លាំងពីវិបត្តិអចលនទ្រព្យរបស់ចិននោះបានសុំទោសអ្នកវិនិយោគរបស់ខ្លួនដោយនិយាយថា ខ្លួនមានបំណុលសរុបប្រហែលចន្លោះពី៥៨ពាន់លានដុល្លារ ដល់៦៤ពាន់លានដុល្លារ។ បើតាមលិខិតដែលបានចេញផ្សាយកាលពីថ្ងៃពុធ ទី២២ ខែវិច្ឆិកា ចំនួនបំណុលនេះ គឺច្រើនជាងទ្រព្យសកម្មសរុបរបស់ក្រុមហ៊ុន Zhongzhi នេះទៅទៀត ខណៈដែលទ្រព្យសកម្មរបស់ក្រុមហ៊ុននេះមានប្រមាណជាង២៨ពាន់លានដុល្លារប៉ុណ្ណោះ។

ក្រុមហ៊ុន Zhongzhi បានដើរតួដ៏សំខាន់នៅក្នុងវិស័យធនាគារស្រមោលក្នុងទឹកប្រាក់ចំនួន៣ទ្រីលានដុល្លារនៅប្រទេសចិន ដែលវាស្មើនឹងទំហំសេដ្ឋកិច្ចរបស់ប្រទេសបារាំងទាំងមូល ហើយវិបត្តិកាន់តែអាក្រក់ទៅៗនៅក្នុងក្រុមហ៊ុននេះ បានបង្កើនកង្វល់កាន់តែខ្លាំងឡើងពីលទ្ធភាពនៃការឆ្លងរាលដាលដល់វិស័យហិរញ្ញវត្ថុ ទោះជាអ្នកវិភាគខ្លះរំពឹងថា និយ័តករនឹងឈានជើងចូល ដើម្បីទប់ស្កាត់ការធ្លាក់ចុះកាន់តែទូលំទូលាយយ៉ាងណាក៏ដោយ។

ខ្លឹមសារនៅក្នុងលិខិតនេះក៏មានសរសេរពីការសុំទោសចំពោះការខកខានសងបំណុលសំខាន់ៗមួយចំនួននៅក្នុងផលិតផលវិនិយោគ ដែលទាក់ទងនឹងក្រុមហ៊ុន Zhongzhi ដែលបង្កើតឡើងនៅក្នុងឆ្នាំ១៩៩៥ នេះផងដែរ ប៉ុន្តែវាមិនបានបញ្ជាក់ច្បាស់លាស់ពីផលប័ត្ររបស់ខ្លួននោះទេ។

វិស័យអចលនទ្រព្យរបស់ចិនដែលជំពាក់បំណុលគេយ៉ាងច្រើនបាននិងកំពុងងើបឡើងវិញពីវិបត្តិសាច់ប្រាក់ចាប់តាំងពីឆ្នាំ២០២០ ហើយការខកខានសងបំណុលរបស់ក្រុមហ៊ុនអភិវឌ្ឍន៍អចលនទ្រព្យតាំងពីចុងឆ្នាំ២០២១ មកបានរារាំងដល់កំណើនសេដ្ឋកិច្ចចិន និងធ្វើឱ្យទីផ្សារពិភពលោកមានភាពចលាចលផងដែរ។

ក្រុមហ៊ុនអភិវឌ្ឍន៍អចលនទ្រព្យចិនដែលមានចំនួន៤០%នៃការលក់ផ្ទះរបស់ចិនបានខកខានសងបំណុលតាមកាតព្វកិច្ចរបស់ពួកគេតាំងពីឆ្នាំ២០២១ ហើយតាំងពីពេលនោះមកដល់ឥឡូវនេះ ក្រុមហ៊ុន ដែលជាប់គាំងបំណុលទាំងនោះ ភាគច្រើនជាក្រុមហ៊ុនឯកជនបានចេញមូលបត្របំណុលនៅបរទេសមានតម្លៃសរុបប្រហែល១១០ពាន់លានដុល្លារ។

សូមបញ្ជាក់ថា ក្រុមហ៊ុនគ្រប់គ្រងទ្រព្យសម្បត្តិទាក់ទងនឹងធនាគារស្រមោលនៅចិនជាធម្មតាដំណើរការនៅក្រៅប្រព័ន្ធច្បាប់នៃការគ្រប់គ្រងធនាគារពាណិជ្ជ ហើយភាគច្រើនបញ្ជូនប្រាក់ចំណូលនៃផលិតផលទ្រព្យសម្បត្តិ ដែលគេបានលក់ឱ្យអ្នកវិនិយោគលក់រាយនោះទៅកាន់អ្នកអភិវឌ្ឍន៍អចលនទ្រព្យ និងវិស័យផ្សេងទៀត៕

អត្ថបទ៖ សុខ ជា