ក្រុមហ៊ុនយក្សចិន«អាលីបាបា»នឹងវិនិយោគរាប់ពាន់លានដុល្លារសម្រាប់គាំទ្រគោលនយោបាយវិបុលភាពរួមរបស់ចិន

ទីក្រុងប៉េកាំងថ្មីៗនេះ បាននិងកំពុងលើកទឹកចិត្តក្រុមហ៊ុនជាច្រើនដែលមានប្រាក់ចំណូលខ្ពស់ដើម្បីរួមចំណែកបន្ថែមទៀតដល់សង្គមតាមរយៈអ្វីដែលគេហៅថា“ ការចែកចាយទីបី” ដែលសំដៅលើសប្បុរសធម៌ និងការបរិច្ចាគដែលជាផ្នែកមួយនៃកិច្ចខិតខំប្រឹងប្រែងក្នុងការបន្ធូរបន្ថយវិសមភាពសង្គមនៅក្នុងប្រទេសសេដ្ឋកិច្ចធំបំផុតទី ២ របស់ពិភពលោកនេះ។

យ៉ាងណាមិញ ក្រុមហ៊ុនផ្សេងទៀតដែលបានធ្វើការប្រកាសស្រដៀងគ្នានេះដែរ រួមមានក្រុមហ៊ុនយក្ស Tencent Holdings ក៏បានសន្យាបរិច្ចាគជាង១៥ ពាន់លានដុល្លារផងដែរ រួមទាំងក្រុមហ៊ុនមួយចំនួនទៀត។

ទន្ទឹមនេះ គេហទំព័រហ្សឺជាំង (Zhejiang) ដែលគាំទ្រដោយរដ្ឋាភិបាលចិន បាននិយាយថា មូលនិធិរបស់អាលីបាបា នឹងឆ្ពោះទៅរកការឧបត្ថម្ភសម្រាប់សហគ្រាសធុនតូច និងមធ្យម ព្រមទាំងធ្វើឱ្យប្រសើរឡើងនូវការការពារ សម្រាប់កម្មករដឹកជញ្ជូនដូចជាអ្នកនាំសំបុត្រ និងអ្នកបើកបរ។ ក្នុងនោះការវិនិយោគរបស់ អាលីបាបា នឹងបង្កើតមូលនិធិអភិវឌ្ឍន៍វិបុលភាពរួមក្នុងចំនួន ៣ ពាន់លានដុល្លា។

គួរជម្រាបថា លោក ស៊ី ជីនពីង ត្រៀមខ្លួនជាស្រេចនៅក្នុងត្រីមាសទី ៣ ឆ្នាំ ២០២២ ដើម្បីងាកទៅរកការដោះស្រាយបញ្ហាវិសមភាពសង្គម បន្ទាប់ពីបុរសខ្លាំងរបស់ចិនមួយនេះ បានបញ្ចប់យុទ្ធនាការលុបបំបាត់ភាពក្រីក្រដោយសន្យាថា នឹងធ្វើឱ្យប្រទេសចិនមានវឌ្ឍនភាពដ៏រឹងមាំ ឆ្ពោះទៅរកវិបុលភាពរួមនៅឆ្នាំ ២០៣៥ និង“ សម្រេចបានជាមូលដ្ឋាន” នៅឆ្នាំ ២០៥០ ។

សូមបញ្ជាក់ថា គោលនយោបាយវិបុលភាពរួម នេះមិនមែនជារឿងថ្មីនោះទេ ពោលគឺវាបានលេចឡើងដំបូងនៅទសវត្សរ៍ឆ្នាំ ១៩៥០ ដោយមេដឹកនាំចិនលោក ម៉ៅ សេទុង ដែលកាលនោះវាមិនបានជួយឱ្យប្រទេសចិនគេចផុតពីភាពក្រីក្រឡើយ ប៉ុន្តែបន្ទាប់មកនៅទសវត្សរ៍ឆ្នាំ ១៩៨០ លោក តេង ស៊ាវភីង បានធ្វើទំនើបកម្មសេដ្ឋកិច្ចទីផ្សារសេរី ដែលអាចងើបចេញពីបដិវត្តវប្បធម៌របស់ ម៉ៅ សេទុង និងធ្វើឲ្យចិនមានសេដ្ឋកិច្ចស្ទុះងើបឡើងខ្លាំង៕ 

អត្ថបទ៖ ស៊ើង និមល់