ជាក់ស្ដែង ក្រុមហ៊ុនយក្សរបស់អាមេរិកមួយនេះ គ្រោងនឹងចាប់ផ្តើមផលិត iPhone 14 ដែលជាផលិតផលសេរីថ្មីចុងក្រោយរបស់ខ្លួននៅក្នុងប្រទេសឥណ្ឌាវិញ នៅក្នុងរយៈពេល ២ ខែខាងមុខ បន្ទាប់ពីមានការកាត់បន្ថយការផលិតជាលើកដំបូងរបស់ខ្លួនចេញពីប្រទេសចិន ប៉ុន្តែមិនបានផ្អាកការផលិតទាំងស្រុងនោះទេ។ នេះបើតាមការចុះផ្សាយសារព័ត៌មាន Aljazeera។
យោងតាមអ្នកជំនាញបានឱ្យដឹងថា ក្រុមហ៊ុន Apple បាននឹងកំពុងធ្វើការជាមួយអ្នកផ្គត់ផ្គង់ដើម្បីបង្កើនការផលិតនៅក្នុងប្រទេសឥណ្ឌា និង កាត់បន្ថយភាពយឺតយ៉ាវក្នុងការផលិត iPhone ថ្មី ដែលនឹងចំណាយពេលពី ៦ ខែ ទៅ ៩ ខែក្នុងការផលិត មុននឹងដាក់លក់ចេញលើទីផ្សារ។ ក្រុមហ៊ុន Apple ដែលផលិតទូរស័ព្ទ iPhone កន្លងមកមានភាគច្រើន គឺផលិតនៅក្នុងប្រទេសចិន ប៉ុន្ដែ មួយរយៈចុងក្រោយនេះ ក្រុមហ៊ុនយក្សមួយនេះ កំពុងស្វែងរកការផ្លាស់ប្តូទីតាំងផលិតរបស់ខ្លួន នៅពេលដែលរដ្ឋបាលរបស់លោកប្រធានាធិបតីចិន ស៊ី ជីនពីង បាននិងកំពុងបន្ដប៉ះទង្គិចកាន់តែខ្លាំងជាមួយរដ្ឋបាលលោកប្រធានាធិបតីអាមេរិក Jeo Biden រួមទាំងបញ្ហាការបិទខ្ទប់នៅក្នុងទីក្រុងប៉េកាំង ធ្វើឱ្យប៉ះពាល់ដល់សកម្មភាពសេដ្ឋកិច្ចយ៉ាងធ្ងន់ធ្ងរជាដើម។
ប្រភពព័ត៌មានបានអះអាងថា ក្រុមហ៊ុន Foxconn Technology Group របស់តៃវ៉ាន់ ដែលជាក្រុមហ៊ុនផលិតផលិតផលផ្គត់ផ្គង់ឲ្យ Appeនោះ បានសិក្សាពីដំណើរការនៃការដឹកជញ្ជូនគ្រឿងបន្លាស់ពីប្រទេសចិន និងដំឡើងឧបករណ៍ iPhone 14 នៅរោងចក្ររបស់ខ្លួននៅទីក្រុង Chennai ភាគខាងត្បូងក្នុងប្រទេសឥណ្ឌា ខណៈកិច្ចខិតខំប្រឹងប្រែងនេះ គឺធ្វើឡើងដោយសម្ងាត់ ដើម្បីរក្សាស្តង់ដារខ្ពស់របស់ក្រុមហ៊ុន Apple។ ប្រភពដដែលនេះ បានអះអាងថាទូរស័ព្ទសេរីថ្មីចុងក្រោយ គឺ iPhone 14s ដំបូងបង្អស់ពីប្រទេសឥណ្ឌាទំនងជានឹងផលិតឡើងនៅចុងខែតុលា ឬ ខែវិច្ឆិកា បន្ទាប់ពីការចេញលក់ដំបូងនៅខែកញ្ញាខាងមុខនេះ។
អត្ថបទគួរអាន
យ៉ាងណាក៏ដោយចុះ អ្នកនាំពាក្យរបស់ក្រុមហ៊ុន Apple ដែលមានមូលដ្ឋាននៅរដ្ឋកាលីហ្វ័រញ៉ា និង ក្រុមហ៊ុន Foxconn បានបដិសេធមិនធ្វើអត្ថាធិប្បាយនោះទេ។
បើយោងតាមរបាយការណ៍របស់ Bloomberg បានបង្ហាញថា ក្រុមហ៊ុន Redington India Ltd ដែលចែកចាយផលិតផល Apple នៅក្នុងប្រទេសឥណ្ឌាបានកើនឡើងដល់ទៅ ៩,៥% នៃការលក់របស់ខ្លួន។ ការផ្លាស់ប្តូនៃការផលិត iPhone នៅក្នុងប្រទេសចិនទៅកាន់ប្រទេសឥណ្ឌាវិញនឹងក្លាយជាភាពលេចធ្លោមួយសម្រាប់ប្រទេសឥណ្ឌាផងដែរ។
គួរបញ្ចាក់ថា ក្រុមហ៊ុនយក្ស Apple បានចាប់ផ្តើមផលិតទូរស័ព្ទ iPhone នៅក្នុងប្រទេសឥណ្ឌាតាំងពីឆ្នាំ ២០១៧ មកម្ល៉េះ ដែលជាការចាប់ផ្តើមនៃកិច្ចខិតខំប្រឹងប្រែងអស់ជាច្រើនឆ្នាំក្នុងការកសាងសមត្ថភាពផលិតក្នុងប្រទេសឥណ្ឌា៕
