អាស៊ាន តាមដានសង្គ្រាមនៅអ៊ីស្រាអែល ខណៈប្រទេសខ្លះត្រៀមយន្តហោះដឹកពលរដ្ឋខ្លួន

បណ្តាសារព័ត៌មានធំៗនៅក្នុងតំបន់អាស៊ាន បានឲ្យដឹងថា យ៉ាងហោចណាស់មានពលរដ្ឋអាស៊ានលើសពី១០នាក់ បានស្លាប់បាត់បង់ជីវិត ដោយសារការប៉ះទង្គិចប្រដាប់អាវុធរវាងយោធាអ៊ីស្រាអែលជាមួយក្រុមហាម៉ាស់។

បើតាមព័ត៌មានបឋមដែលទទួលបាន គឺមានប្រជាពលរដ្ឋនៅតាមប្រទេសក្នុងតំបន់អាស៊ានជាង៣ម៉ឺននាក់កំពុងរស់នៅប្រទេសអ៊ីស្រាអែល។ តួរលេខអ្នកដែលស្លាប់ច្រើននៅពេលនេះ គឺជាពលរដ្ឋថៃ ហើយនៅក្នុងនោះក៏មាននិស្សិតកម្ពុជាម្នាក់ផងដែរ។

តាមសារព័ត៌មាន the Nation បានរាយការណ៍ថា នៅពេលនេះថៃ មានប្រជាពលរដ្ឋប្រមាណជា៥ពាន់នាក់កំពុងស្ថិតនៅក្នុងតំបន់ហ្គាហ្សា ដែលជាកន្លែងផ្ទុះសង្រ្គាម ហើយក៏មានសេចក្តីរាយការណ៍ថា មានពលរដ្ឋថៃ ចំនួន១២នាក់ ​បានស្លាប់បាត់បង់ជីវិត ក្នុងនោះក៏មានមួយចំនួនត្រូវបានក្រុមហាម៉ាស់ចាប់ធ្វើជាចំណាប់ខ្មាំងផងដែរ។

ពាក់ព័ន្ធនឹងស្ថានការណ៍នេះលោកឧត្តមសេនីយ ផានផាកឌី ផាត់ថាណាគុល (Phanphakdee Phatthanakul)មេទ័ពអាកាសថៃ បានអះអាងថា កងទ័ពអាកាសថៃ កំពុងត្រៀមយន្តហោះចំនួន៦គ្រឿង ដោយនៅក្នុងនោះមានយន្តហោះដឹកជញ្ជូនយោធា C-130 ចំនួន៥គ្រឿង និងយន្តហោះដឹកអ្នកដំណើរ Airbus 340 ចំនួនមួយគ្រឿង ដាក់ឱ្យនៅរង់ចាំ ដើម្បីជម្លៀសពលករថៃ នៅពេលដែលអ៊ីស្រាអែលបើកដែនអាកាសរបស់ខ្លួន។

ដោយឡែកសម្រាប់ហ្វីលីពិនវិញ មានសេចក្តីរាយការណ៍ថា មានពលរដ្ឋសរុបប្រមាណជា ៣ម៉ឺននាក់ ប៉ុន្តែភាគច្រើនបំផុតនៃពូកគេគឺស្នាក់នៅ និងបំពេញការងារនៅក្រៅតំបន់ក្តៅ ខណៈដែលពលករហ្វីលីពីន៨នាក់ ដែលជាប់នៅហ្គាហ្សា មានសេចក្តីរាយការណ៍ថា ត្រូវបានជូយសង្រ្គោះរួចហើយ។

ពាក់ព័ន្ធនឹងសភាពការណ៍នេះ លោក អេនរីកេ ម៉ាណាឡូ (Enrique Manalo) រដ្ឋមន្ត្រីការបរទេសហ្វីលីពិន បានលើកឡើងថា ហ្វីលីពីនកំពុងតាមដានស្ថានការណ៍ក្នុងប្រទេសអ៊ីស្រាអែល ហើយនឹងបន្តមើលថែរក្សាសុខុមាលភាពរបស់ប្រជាជនហ្វីលីពីន ដែលរងផលប៉ះពាល់ដោយស្ថានភាពបច្ចុប្បន្ន។

សម្រាប់កម្ពុជាមានសេចក្តីរាយការណ៍ពីក្រសួងការបរទេសសហប្រតិបត្តិការអន្តរជាតិថា កម្ពុជាមានពលរដ្ឋរស់នៅទីនោះចំនួន៤៥០រូប ដោយពួកគេភាគច្រើនសុទ្ធតែជានិស្សិតកម្មសិក្សាផ្នែកកសិកម្ម ក្នុងនោះមានម្នាក់បានបាត់បង់ជីវិត។

ដោយឡែកសម្រាប់វៀតណាម ស្ថានទូតវៀតណាមប្រចាំនៅអ៊ីស្រាអែល បានរាយការណ៍ថា ជម្លោះរវាងអ៊ីស្រាអែល និងប៉ាឡេស្ទីន ក្នុងរយៈពេលប៉ុន្មានថ្ងៃថ្មីៗនេះ មានភាពស្មុគ្រស្មាញហើយអំពើហិង្សាបានបណ្តាលឱ្យមនុស្សរាប់រយនាក់រងរបួស ។

ស្ថានទូតបានពង្រាយមន្ត្រី ដើម្បីរក្សាទំនាក់ទំនងជាប្រចាំជាមួយសហគមន៍វៀតណាម នៅអ៊ីស្រាអែល ដើម្បីបន្តធ្វើបច្ចុប្បន្នភាពព័ត៌មាន និងសម្របសម្រួលយ៉ាងជិតស្និទ្ធជាមួយអាជ្ញាធរ មូលដ្ឋានពាក់ព័ន្ធ និងបេសកកម្មការទូតក្នុងតំបន់ ដើម្បីអនុវត្តវិធានការការពារពលរដ្ឋវៀតណាម។

រហូតមកដល់ពេលនេះ ប្រជាពលរដ្ឋវៀតណាម រួមទាំងសហគមន៍វៀតណាម នៅអ៊ីស្រាអែល មន្ត្រីក្នុងការធ្វើដំណើរអាជីវកម្ម និងភ្ញៀវទេសចរ នៅតែមានសុវត្ថិភាព។

ដោយឡែកសិង្ហបុរី ក៏បានយកចិត្តទុកដាក់នឹងបញ្ហនេះផងដែរ ក្រសួងការបរទេសដែនកោះមួយនេះបាននិយាយកាលពីថ្ងៃអាទិត្យថា ប្រជាជនសិង្ហបុរី គួរតែជៀសវាងការធ្វើដំណើរទាំងអស់ទៅកាន់តំបន់ហ្គាហ្សា និងតំបន់ព្រំដែនរបស់អ៊ីស្រាអែល ជាមួយតំបន់ហ្គាហ្សាស្ទ្រីប លីបង់ និងស៊ីរី៕

ដោយៈ សរ សុជាតិ