លោកហ្វីលីប វូសក្រេសេនស្គី (Filip Voskresenski) អ្នកការទូតជាន់ខ្ពស់របស់រុស្ស៊ីបានប្រាប់អ្នកសារព័ត៌មាននៅអាកាសយានដ្ឋានក្នុងរដ្ឋធានីសូហ្វៀរ (Sofia) នៃប្រទេសប៊ុលហ្គារី មុននឹងពេលជើងហោះហើរចាកចេញថា៖ «រូបលោកស្ថិតក្នុងចំណោមបុគ្គលិកការទូតរុស្ស៊ីចំនួន ៧០ នាក់ដែលបានប្រកាសដោយរដ្ឋាភិបាលប៊ុលហ្គារីកាលពីសប្ដាហ៍មុនបានប្រកាសថាជា «បុគ្គលដែលមិនត្រូវបានស្វាគមន៍»ឲ្យនៅក្នុងប្រទេសប៊ុលហ្គារីទៀតនោះទេ ហើយបានបញ្ជាឱ្យចាកចេញពីប្រទេសនេះនៅត្រឹមថ្ងៃទី៣ ខែកក្កដាផងដែរ»។
ជាការពិត ការសម្រេចចិត្តបណ្តេញមន្ត្រីរុស្សីចេញរបស់ប្រទេសប៊ុលហ្គារីត្រូវបានប្រកាសដោយនាយករដ្ឋមន្ត្រីស្តីទី លោក គីរីល ពេតកូវ (Kiril Petkov) ដែលបានប្រកាន់ជំហរយ៉ាងរឹងមាំប្រឆាំងនឹងរុស្ស៊ី បន្ទាប់ពីទីក្រុងម៉ូស្គូបានឈ្លានពានអ៊ុយក្រែន។ មួយវិញទៀត លោក Petkov ដែលបានចាញ់ការបោះឆ្នោតផ្តល់សេចក្តីទុកចិត្តកាលពីថ្ងៃទី ២២ ខែមិថុនាកន្លងទៅនោះ បានអះអាងថា ទីក្រុងម៉ូស្គូបានប្រើយុទ្ធសាស្ត្រ«សង្គ្រាមកូនកាត់» ដើម្បីទម្លាក់រដ្ឋាភិបាលរបស់លោក។
បើតាមលោក Petkov បាននិយាយថា ប្រទេសរុស្ស៊ីនឹងរក្សាបុគ្គលិកទូតរបស់ខ្លួនចំនួន ៤៣ នាក់បន្ទាប់ពីការបណ្តេញចេញនេះ ហើយលោកបានកត់សម្គាល់ថា ប្រទេសប៊ុលហ្គារីមានបុគ្គលិកការទូតត្រឹមតែ ១២ នាក់ប៉ុណ្ណោះនៅក្នុងទីក្រុងម៉ូស្គូ។ ទោះយ៉ាងណា លោក Petkov នាយករដ្ឋមន្ត្រីស្តីទីរបស់ប្រទេសប៊ុលហ្គារី បានបញ្ជាក់ថា៖ «អ្នកណាដែលធ្វើការប្រឆាំងនឹងផលប្រយោជន៍របស់ប្រទេសប៊ុលហ្គារីនឹងត្រូវបានបញ្ជូនឲ្យត្រឡប់ទៅប្រទេសខ្លួនវិញដោយខានមិនបាន»។
អត្ថបទគួរអាន
ទន្ទឹមនឹងនេះដែរ កាលពីសប្ដាហ៍មុននេះ ឯកអគ្គរដ្ឋទូតរុស្ស៊ី អ្នកស្រីអេលេណូរ៉ា មីត្រូហ្វាណូវ៉ា (Eleonora Mitrofanova) បានចេញលិខិតឱសានវាទមួយដល់ប្រទេសប៊ុលហ្គារី ដើម្បីឲ្យប្រទេសនេះគិតមើលពីការសម្រេចចិត្តរបស់ខ្លួនឡើងវិញ ព្រមទាំងបានគំរាមថាទីក្រុងម៉ូស្គូនឹងកាត់ផ្តាច់ទំនាក់ទំនងការទូតជាមួយប្រទេសប៊ុលហ្គារីទាំងស្រុងផងដែរ។
មែនទែនទៅ ការបណ្តេញចេញអ្នកការទូតរុស្ស៊ីជាលក្ខណៈទ្រង់ទ្រាយធំ គឺជាលើកទីមួយហើយ ដែលប្រទេសប៊ុលហ្គារីធ្វើដូច្នេះ។ ការហ៊ានធ្វើដូច្នេះ ក៏ទំនងជាដោយសារតែប៊ុលហ្គារី សម្អាងទៅលើខ្នងដ៏ក្រាស់របស់ខ្លួន គឺសហភាពអឺរ៉ុប និងអង្គការណាតូ ដ្បិតប្រទេសនេះ ក៏ជាសមាជិកនៅក្នុងសម្ព័ន្ធទាំងពីរនេះដែរ។ កន្លងមក ប្រទេសប៉ុលហ្គារី បានគាំទ្រយ៉ាងពេញទំហឹង ចំពោះការដាក់ទណ្ឌកម្មរបស់បស្ចិមលោកប្រឆាំងនឹងទីក្រុងមូស្គូ ចាប់តាំងពីវិមានក្រឹមឡាំងបើកការវាយលុកទៅលើអ៊ុយក្រែនជាងបួនខែមុននេះ។
គួររំលឹកបន្តិចថា កាលពីចុងខែមេសាកន្លងទៅ រុស្ស៊ីបានកាត់ផ្តាច់ការផ្គត់ផ្គង់ឧស្ម័នទៅប្រទេសប៊ុលហ្គារី បន្ទាប់ពីមន្ត្រីប្រទេសនេះ បានបដិសេធការទាមទាររបស់ក្រុងម៉ូស្គូក្នុងការបង់ថ្លៃឧស្ម័នជារូបិយប័ណ្ណរបស់រុស្ស៊ី។ លើសពីនេះទៅទៀត រដ្ឋមន្ត្រីការពារជាតិប៊ុលហ្គារីម្នាក់ក៏ត្រូវបានបណ្តេញចេញពីដំណែងផងដែរ នៅដើមខែមីនា ដែលមន្ត្រីរូបនោះបានហៅសង្គ្រាមរុស្សីនៅអ៊ុយក្រែនថាជា «ប្រតិបត្តិការយោធាពិសេស»៕
