ក្រុមហ៊ុន ByteDance បានដាក់ពាក្យបណ្តឹងទៅសាលាឧទ្ធរណ៍របស់អាម៉េរិក ដោយលើកហេតុផលថាច្បាប់បង្ខំឱ្យលក់កម្មវិធី TikTok នេះបានរំលោភរដ្ឋធម្មនុញ្ញរបស់អាម៉េរិករួមទាំងការប្រព្រឹត្តកំហុសលើការការពារសិទ្ធិនិយាយស្ដីដោយសេរីផងដែរ។
សូមរំលឹកថា ច្បាប់ដែលចុះហត្ថលេខាដោយលោក បៃដិន កាលពីថ្ងៃទី២៤ ខែមេសាកន្លងទៅ បានទុកពេលឱ្យក្រុមហ៊ុនមេរបស់ TikTok លក់កម្មវិធី TikTok បើមិនដូច្នេះទេនឹងត្រូវប្រឈមនឹងការហាមឃាត់មិនឱ្យដំណើរការនៅលើទឹកដីអាម៉េរិកឡើយ។
ក្រុមហ៊ុន ByteDance បាននិយាយក្នុងពាក្យបណ្ដឹងរបស់ខ្លួនថា ការលក់កម្មវិធី TikTok នេះគឺមិនអាចទៅរួចទេ ហើយថាគ្មានអ្វីគួរឱ្យឆ្ងល់ឡើយថា ច្បាប់ដែលបង្ខំឱ្យបិទ TikTok នៅត្រឹមថ្ងៃទី១៩ ខែមករា ឆ្នាំ២០២៥នោះ គឺជាការបំបិទមាត់ប្រជាជនអាម៉េរិក ចំនួន ១៧០ លាននាក់។
សេតវិមានសហរដ្ឋអាម៉េរិក បាននិយាយថា ខ្លួនចង់ឃើញកម្មវិធី TikTok របស់ចិននេះត្រូវបានបញ្ចប់ដោយសារហេតុផលសន្តិសុខជាតិ ប៉ុន្តែមិនមែនជាការដាក់បម្រាមទៅលើកម្មវិធី TikTok នោះទេ ប៉ុន្តែសេតវិមាន និងក្រសួងយុត្តិធម៌អាម៉េរិក បានបដិសេធការធ្វើអត្ថាធិប្បាយពាក់ព័ន្ធនឹងពាក្យបណ្តឹងនេះ៕
អត្ថបទ៖ សុខ មង្គល
