កម្ពុជា-ថៃ គ្រោងសាងសង់ច្រកព្រំដែនអន្តរជាតិថ្មីៗបន្ថែមទៀត ដើម្បីពង្រីកទំហំពាណិជ្ជកម្មនិងជំរុញការវិនិយោគ

មន្រ្តីជាន់ខ្ពស់នៃក្រសួងសាធារណការ និងដឹកជញ្ជូន បានគូសបញ្ជាក់ថា ច្រកព្រំដែនអន្តរជាតិថ្មដារនេះ គឺជាច្រកព្រំដែនអន្តរជាតិដ៏សំខាន់មួយទៀត ដើម្បីជំរុញទំហំពាណិជ្ជកម្មរវាងប្រទេសទាំងពី និងបង្កើនឱកាសវិនិយោគសម្រាប់កម្ពុជាផងដែរ ខណៈបច្ចុប្បន្ន កម្ពុជាមានច្រកព្រំដែនអន្តរជាតិដោះដូរពាណិជ្ជកម្មទំនិញជាមួយថៃតែមួយប៉ុណ្ណោះ ក្រៅពីនោះ គឺជាច្រកព្រំដែនតាមតំបន់ប៉ុណ្ណោះ។

ឯកឧត្តម វ៉ា ស៊ឹមសុរិយា អ្នកនាំពាក្យក្រសួងសាធារណៈការ និងដឹកជញ្ជូន បានលើកឡើងថា តាមពិតទៅ ប្រទេសកម្ពុជា និងប្រទេសថៃ មិនមានតែច្រកព្រំដែនអន្តរជាតិតែមួយនោះទេ ប៉ុន្ដែ ច្រកព្រំដែនអន្តរជាតិដែលអនុញ្ញាតឱ្យមានការចរាចរណ៍ចេញ-ចូលទំនិញ គឺមានតែមួយប៉ុណ្ណោះ ដោយសារមានកិច្ចព្រមព្រៀងជាមួយគ្នា ក្រៅពីនោះ សុទ្ធសឹងជាច្រកព្រំដែនថ្នាក់តំបន់។ អ្នកនាំពាក្យរូបនេះ បានគូសបញ្ជាក់ថា រាល់ច្រកព្រំដែនសុទ្ធតែមានអត្ថប្រយោន៍រវាងប្រទេសទ្វេភាគី ទាំងថ្នាក់តំបន់ រហូតដល់ថ្នាក់អន្តរជាតិ។

បើតាមឯកឧត្តម វ៉ា ស៊ឹមសុរិយា ប្រទេសថៃ មានភាពខុសប្លែកពីប្រទេសក្បែរខាងកម្ពុជាផ្សេងទៀត ដូចជា វៀតណាម និងឡាវ ដែលភាគច្រើនមានការដោះដូរទំនិញតាមច្រកព្រំដែនតាមតំបន់ជាងតាមច្រកអន្តរជាតិ។ អ្នកនាំពាក្យរូបនេះ បានសង្កត់ធ្ងន់ទៀតថា គម្រោងសាងសង់ច្រកព្រំដែនអន្តរជាតិថ្មីរវាងកម្ពុជា-ថៃ នឹងជួយពង្រីកទំហំពាណិជ្ជកម្មទ្វេរភាគី ជំរុញការធ្វើវិនិយោគឆ្លងដែន ទាក់ទាញអ្នកទេសចរ និងបង្កើនឱកាសការងារដល់ប្រជាពលរដ្ឋ ផងដែរ។

ក្រៅតែពីច្រកព្រំដែនរវាងកម្ពុជា និងថៃ បច្ចុប្បន្នកម្ពុជាក៏មានការដោះដូរទំនិញយ៉ាងមមាញឹកនៅតាមច្រកព្រំដែនរវាងវៀតណាម និងឡាវផងដែរ។ ក្នុងនោះ កម្ពុជា និងប្រទេសវៀតណាម មានច្រកព្រំដែនសរុបរហូត១៦ ឯណោះ។ នេះបើតាមបើតាមការគូសបញ្ជាក់ពីឯកឧត្តម វ៉ា ស៊ឹមសុរិយា។

យោងតាមទិន្ន័យរបស់នាយកដ្ឋានចរចាពាណិជ្ជកម្មនៃក្រសួងពាណិជ្ជកម្មថៃ បានបង្ហាញថា ទំហំពាណិជ្ជកម្មរវាងកម្ពុជា-ថៃ សម្រេចបានទឹកប្រាក់ប្រមាណ៨ពាន់ប៊ីលានដុល្លារ នៅឆ្នាំ២០២១ ដែលមានការកើនឡើង១០% បើប្រៀបនឹងឆ្នាំ២០២០។ ក្នុងនោះ ការនាំចេញរបស់កម្ពុជា ទៅប្រទេសថៃ បានធ្លាក់ចុះចំនួន២២% ខណៈការនាំចូលពីថៃវិញ មានការកើនឡើង១៦%៕