លោក ប៉ុល សុផា អគ្គយកនៃអគ្គនាយកដ្ឋានកៅស៊ូ បានគូសបញ្ជាក់ថា តាមការនិទស្សន៍ចាប់ពីឆ្នាំ២០១៩ នេះទៅ ការវិនិយោគលើដំណាំកៅស៊ូមិនមានស្ទុះគួរឲ្យចាប់អារម្មណ៍នោះឡើយ ដោយសារតែកត្តាតម្លៃមិនសូវល្អ និងផ្ទៃដីដែលអាចពង្រីកការដាំដុះបាន គឺមិនមានច្រើននោះឡើយ។ ប៉ុន្តែយ៉ាងណាក៏ដោយ លោក ប៉ុល សុផា បានបន្តថា ផលិតកម្មកៅស៊ូនេះ នៅតែបន្តកើនឡើងជាបន្តបន្ទាប់រហូតដល់ឆ្នាំ ២០២៥ តាមការប៉ាន់ស្មានផលិតផលកៅស៊ូនេះអាចទាញយកផលបានរហូតដល់ ៤៣ម៉ឺនតោនក្នុងមួយឆ្នាំៗ។
អត្ថបទទាក់ទង!
បើយោងទៅតាមលទ្ធផលការងាររបស់អគ្គនាយកដ្ឋានកៅស៊ូក្នុងរយៈពេលត្រីមាសទី ១ ដើមឆ្នាំ២០១៩ នេះសម្រេចបានជាវិជ្ជមាន ដោយក្នុងនោះ មានផ្ទៃដីកៅស៊ូសរុបបានកើនរហូតដល់ ៤៣ ម៉ឺនហិកតា ដោយអាចទាញយកជ័រកៅស៊ូបានជាង ២០ម៉ឺនហិកតា និងបានបញ្ចេញលក់សរុបប្រមាណ ជាង ៤,៨ ម៉ឺនតោន។
ក៏ប៉ុន្តែអ្វីដែលគួរឲ្យកត់សម្គាល់បើតាមរបាយការណ៍អគ្គនាយកដ្ឋានកៅស៊ូបង្ហាញថា តម្លៃកៅស៊ូ សម្រាប់ខែមីនាកន្លងទៅ ១តោន គិតជាមធ្យមថ្លៃ ១.៣៦១ ដុល្លារ។
សូមជម្រាបដែរថា ការងារអាជីវកម្ម ផលិតកម្មកៅស៊ូនេះ គឺមានការអភិវឌ្ឍដោយក្រុមហ៊ុនរដ្ឋ ក្រុមហ៊ុនឯកជន និង ប្រជាពលរដ្ឋ ដែលក្នុងនោះ មានក្រុមហ៊ុនវិនិយោគលើសម្បទានដីសេដ្ឋកិច្ច និងចំការកៅស៊ូគ្រួសារ គិតជាផ្ទៃដីធ្វើចំការកៅស៊ូ មានជាង ៣៨,៥ ម៉ឺនហិកតា ប្រមូលផលកៅស៊ូបាន ៤,១ ម៉ឺនតោន និងបានលក់ចេញប្រមាណជាង ៤ ម៉ឺនតោន ខណៈចំការកៅស៊ូ កសិឧស្សាហកម្មឯកជនវិញ គឺ មានផ្ទៃដីធ្វើចំការកៅស៊ូ ៥ម៉ឺនហិកតា ផលិតកៅស៊ូបាន ជាង ៧ពាន់តោន ដោយលក់ចេញបាន ៧,៧ពាន់តោន និងចំការកៅស៊ូកសិឧស្សាហកម្មរបស់រដ្ឋ គឺមានផ្ទៃដីចំការកៅស៊ូ ៨រយហិកតា ទទួលផលបាន ៩៦តោន និងបានលក់ចេញ ៥០តោន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
