រោងចក្រកែច្នៃគ្រាប់ស្វាយចន្ទីធំជាងគេនៅកម្ពុជាតម្លៃ២លានដុល្លារ នឹងលេចរូបរាងឆាប់ៗនេះ

បើគ្មានការប្រែប្រួលទេរោងចក្រកែច្នៃគ្រាប់ស្វាយចន្ទីធំជាងគេនៅកម្ពុជា តម្លៃ២លានដុល្លារនៅក្រុងស្ទឹងសែន ខេត្តកំពង់ធំ នឹងបើកការដ្ឋានសាងសង់នៅថ្ងៃទី៦ ខែធ្នូ ឆ្នាំ២០២៣ ខាងមុខនេះ ដែលវានឹងជួយធ្វើឱ្យទីផ្សារស្វាយចន្ទីកម្ពុជាកាន់តែមានភាពល្អប្រសើរថែមមួយកម្រិតទៀត។ រោងចក្រ ដែលអភិវឌ្ឍន៍លើផ្ទៃដី១២ហិកតានេះ មានសមត្ថភាពអាចកែច្នៃគ្រាប់ស្វាយចន្ទីរហូតដល់៤០តោនក្នុងមួយថៃ និងជាង១ម៉ឺន៤ពាន់តោនក្នុងមួយឆ្នាំ។ នេះបើតាមការគូសបញ្ជាក់របស់លោក អួន ស៊ីឡុត ប្រធានសមាគមស្វាយចន្ទីកម្ពុជា។

ប្រធានសមាគមរូបនេះអះអាងថា បច្ចុប្បន្នគ្រាប់ស្វាយចន្ទីកម្ពុជាកំពុងទទួលបានការចាប់អារម្មណ៍ច្រើនពីទីផ្សារក្រៅប្រទេស ប៉ុន្តែអ្វីដែលសំខាន់ គឺកម្ពុជាពុំទាន់មានសមត្ថភាពបង្រ្គប់ការបញ្ជាទិញពីទីផ្សាររបស់ប្រទេសចិន អាម៉េរិក និងអារ៉ាប់បាននៅឡើយទេ​ បើទោះបីបច្ចុប្បន្នកម្ពុជាមានសហគ្រាសកែច្នៃតូច​ៗនៅក្នុងស្រុករហូតដល់៣៨សហគ្រាសក៏ដោយ។ ការមិនទាន់អាចឆ្លើយតបនឹងតម្រូវការទីផ្សារខាងក្រៅនេះ ត្រូវបានអ្នកជំនាញរូបនេះអះអាងថា គឺដោយសារតែសមត្ថភាពកែច្នៃគ្រាប់ស្វាយចន្ទីនៅកម្ពុជានៅមានកម្រិត គួបផ្សំអ្នកកែច្នៃមួយចំនួនពុំមានថវិកាបង្វិលគ្រប់គ្រាន់សម្រាប់ទិញគ្រាប់ស្វាយចន្ទីពីកសិករមកស្តុកទុកសម្រាប់កែច្នៃ។ បើតាមអ្នកជំនាញរូបនេះ កម្ពុជាត្រូវការរោងចក្រកែច្នៃគ្រាប់ស្វាយចន្ទីយ៉ាងហោចណាស់ចំនួន៣០បន្ថែមទៀតដែរ ដើម្បីស្រូបទិញគ្រាប់ស្វាយចន្ទីឆៅពីកសិករយកមកកែច្នៃ។

ពាក់ព័ន្ធនឹងគ្រាប់ស្វាយចន្ទីនេះដែរ អតីតនាយករដ្ឋមន្រ្តីនៃកម្ពុជា សម្ដេចតេជោ ហ៊ុន សែន ធ្លាប់គូសបញ្ជាក់ថា កម្ពុជាកំពុងជំរុញឲ្យមានការវិនិយោគលើឧស្សាហកម្មកែច្នៃ ដោយប្រើប្រាស់វត្ថុធាតុដើមដែលមានក្នុងស្រុកស្រាប់ឲ្យបានកាន់តែច្រើនថែមទៀត ពីព្រោះកម្ពុជាមានធនធានជាច្រើនសម្រាប់កែច្នៃ ដូចជាគ្រាប់ស្វាយចន្ទី ស្រូវអង្ក កៅស៊ូ និងដំឡូងមីជាដើម ប៉ុន្ដែកម្ពុជានៅខ្វះមូលដ្ឋានបច្ចេកទេសសម្រាប់កែច្នៃលើផលិតផលទាំងនោះ។

យ៉ាងណាមិញ សម្តេចតេជោ បានអះអាងដែរថា នៅពេលខាងមុខបើកម្ពុជាមានលទ្ធភាព កម្ពុជាអាចនឹងក្លាយទៅជាប្រទេសដែលចែកចាយផលិតផលគ្រាប់ស្វាយចន្ទីដ៏ខ្លាំងមួយផងដែរ នៅចំណោមប្រទេសខ្លាំងៗដទៃទៀត ពីព្រោះថា ក្នុង១ឆ្នាំៗកម្ពុជាអាចនាំចេញគ្រាប់ស្វាយចន្ទី ដែលមិនទាន់កែច្នៃបានប្រមាណ១លានតោន ប៉ុន្ដែគ្រាប់ស្វាយចន្ទីដែលកែច្នៃរួច គឺមានចំនួនតិចតួចប៉ុណ្ណោះ។

យោងតាមទិន្នន័យពីសមាគមស្វាយចន្ទីកម្ពុជា នៅក្នុងរយៈពេល១០ខែឆ្នាំ២០២៣ កម្ពុជាផលិតគ្រាប់ស្វាយចន្ទីឆៅបានជាង៦៥ម៉ឺនតោន និងបាននាំចេញទៅប្រទេសវៀតណាមចំនួន៦១ម៉ឺនតោន ដែលស្មើទឹកប្រាក់៨៣១លានដុល្លារ មានការថយចុះ១៦,៧% បើធៀបនឹងរយៈកាលដូចគ្នាកាលពីឆ្នាំ២០២២។ ការធ្លាក់ចុះផលគ្រាប់ស្វាយចន្ទីនេះ ត្រូវបានសមាគមគូសបញ្ជាក់ថា ដោយសារតែកសិករមួយចំនួនបានកាប់ដើមស្វាយចន្ទីចោល និងការប្រជែងទិញគ្រាប់ស្វាយចន្ទីពីសហគ្រាសក្នុងស្រុក ដោយសារគោលនយោបាយជាតិស្វាយចន្ទី មានការលើកទឹកចិត្តពីរដ្ឋាភិបាល ហើយធនាគារបានបញ្ចេញទុនបង្វិលដល់សហគ្រាសកែច្នៃ៕

អត្ថបទ៖ បូ ដូឡា​