ប្រធានសមាគមដំឡូងមីខ្មែរ ប្រាប់ពីហេតុផល ដែលគម្រោងនាំចេញដំឡូងមី ១០ម៉ឺនតោន ទៅចិន និងឥណ្ឌា ត្រូវបានខកខាន

លោក អិល ឈិញ ប្រធានសមាគមដំឡូងមីខ្មែរបានគូសបញ្ជាក់ប្រាប់ខេមបូណូមីសថា ការចរចានាំចេញ​ដំឡូងមីសាកល្បងចំនួន១០ម៉ឺនតោនរវាងឈ្មួញចិន និងឥណ្ឌា ជាមួយសមាគមនាពេលកន្លងមក ពុំទទួលបានជោគជ័យឡើយ ដោយសារតែកសិករ និងសមាគមមិនមានលទ្ធភាពគ្រប់គ្រាន់​ដើម្បីបំពេញតាមលក្ខខណ្ឌនៃការបញ្ជាទិញ។ លក្ខខណ្ឌដែលមិនអាចបំពេញបាន ត្រូវបានអ្នកជំនាញកសិកម្មរូបនេះលើកឡើងថា គឺដោយសារតែមិនមានទីតាំងសម្រាប់ស្តុកដំឡូងឱ្យស្រប​តាមស្តង់ដា និងមិនមានថវិកាគ្រប់គ្រាន់សម្រាប់បង្វិលដើម្បីប្រមូលទិញដំឡូងមីពីកសិករ ខណៈដែលកសិករភាគច្រើនតែងត្រូវការថវិកាភ្លាមៗពេលលក់ដំឡូងមីម្តងៗ។

បើតាមប្រធានសមាគមដំឡូងមីខ្មែរ បច្ចុប្បន្ននៅកម្ពុជាពុំទាន់មានកន្លែងស្តុក និងកែច្នៃដំឡូងមីស្របតាមស្តង់ដានៅឡើយទេ ខណៈទីផ្សារ គឺពឹងផ្អែកទៅលើប្រទេសជិតខាង។ ការណ៍នេះ គឺទាមទារឱ្យមានអ្នកវិនិយោគច្រើនបន្ថែមទៀត ទើបអាចមានដំណើរការទៅមុខបានប្រសើរ។

ពាក់ព័ន្ធនឹងដំណាំដំឡូងមីនេះដែរ បើគ្មានការប្រែប្រួលទេ សហព័ន្ធដំឡូងមីកម្ពុជា ដែលមានកំណត់នៅក្នុងគោលនយោបាយជាតិស្ដីពីដំឡូងមី នឹងត្រូវបង្កើតឡើងនៅអំឡុងខែមិថុនា ឆ្នាំ២០២៤ ក្រោយគម្រោងនេះ ត្រូវបានអាក់ខានអស់រយៈពេលជាច្រើនឆ្នាំ ដោយសារវិបត្តិជំងឺកូវីដ-១៩។ មន្រ្តីជាន់ខ្ពស់ក្រសួងពាណិជ្ជកម្ម ជឿជាក់ថា ក្រោយសហព័ន្ធនេះត្រូវបានបង្កើតឡើង វានឹងក្លាយជាផ្នែកមួយជួយដល់កសិករ និងជួយលើកកម្ពស់ដំណាំដំឡូងមីនៅកម្ពុជា ខណៈដំណាំនេះ ត្រូវបានរដ្ឋាភិបាលចាត់ទុកជាដំណាំយុទ្ធសាស្រ្តធំទីពីរបន្ទាប់ពីដំណាំស្រូវ។

សូមបញ្ជាក់ថា នៅក្នុងគោលនយោបាយដំឡូងមីឆ្នាំ២០១៨-២០២២ របស់រាជរដ្ឋាភិបាលកម្ពុជាបានចងក្រងថា ផលិតកម្មដំឡូងមីនឹងរួមចំណែករវាង៣% ទៅ ៤% នៃផលិតផលក្នុងស្រុកសរុប។ ជារៀងរាល់ឆ្នាំថវិកាស្ទើរតែ៣០០លានដុល្លារអាម៉េរិក ត្រូវបានគេវិនិយោគ ដើម្បីដាំដុះដំឡូងមី ខណៈដែលការនាំចេញភាគច្រើននៅក្នុងទម្រង់ជាផលិតផលមិនទាន់កែច្នៃ និងជាចំណិតដំឡូងមីក្រៀម ដែលមានទំហំប្រមាណ៧២៨លានដុល្លារក្នុងមួយឆ្នាំ៕

អត្ថបទ៖ បូ ដូឡា,រូបភាព ឯកសារ