នេះជាលើកដំបូងក្នុងរយៈពេល ១២ឆ្នាំដែលប្រាក់បញ្ញើបានកើនឡើងជាងទំហំឥណទានបែបនេះ។ បើតាមរបាយការណ៍ដដែល សមតុល្យនៃប្រាក់បញ្ញើជារូបិយប័ណ្ណចិនមានចំនួន៣៨ទ្រីលានដុល្លារ កើនឡើងចំនួន ១១,៣% ធៀបនឹងឆ្នាំមុន។ ដោយឡែកសមតុល្យប្រាក់កម្ចីមានចំនួនសរុប ៣១ទ្រីលានដុល្លារ កើនឡើងចំនួនជាង១១%។
ប្រទេសចិនកំពុងសម្លឹងរកវិធីជំរុញសេដ្ឋកិច្ចឲ្យប្រសើរឡើង ដោយរដ្ឋបានចាប់ផ្តើមបង្វិលសងពន្ធលើតម្លៃបន្ថែមសម្រាប់អ្នកប្រើប្រាស់ ក្នុងតម្លៃសរុបជាទឹកប្រាក់ទទួលបានប្រាក់ចំនួន ៣៥៥ ពាន់លានដុល្លារ ត្រឹមថ្ងៃទី ១៥ ខែធ្នូ។ ទោះបីជាវិធានការនេះ បានធ្វើឱ្យលំហូរសាច់ប្រាក់សាជីវកម្មប្រសើរឡើងក៏ដោយ ក៏ក្រុមហ៊ុនឯកជនភាគច្រើននៅតែប្រុងប្រយ័ត្នចំពោះការវិនិយោគថ្មី ហើយប្រហែលជាបង្កើនប្រាក់បញ្ញើរបស់ពួកគេផងដែរ។
យោងតាមការស្ទង់មតិរបស់ធនាគារចិន PBOC ដែលធ្វើឡើងនៅចន្លោះខែតុលាដល់ខែធ្នូ ទៅលើអតិថិជនចំនួន ២ម៉ឺននាក់បានបង្ហាញថា មនុស្សចំនួន ៦១,៨% នឹងជ្រើសរើសបង្កើនចំនួនប្រាក់សន្សំរបស់ពួកគេនៅធនាគារ។ ទិន្នន័យនេះ ជាតួលេខខ្ពស់បំផុត គិតចាប់តាំងពីឆ្នាំ២០០២មក ជាពេលដែលគេផ្តើមតានដានទិន្នន័យអ្នកដាក់បញ្ញើដំបូង។
អត្ថបទគួរអាន
ដោយឡែក តម្រូវការប្រាក់កម្ចីក្រុមគ្រួសារ ក៏មានការចុះទន់ខ្សោយផងដែរ ជាក់ស្ដែង កំណើនសុទ្ធ នៅក្នុងសមតុល្យឥណទានរយៈពេលមធ្យម និងវែងសម្រាប់កម្ចីក្រុមគ្រួសារ នៅក្នុងឆ្នាំ២០២២ មានប្រមាណជាង ៤០០ពាន់លានដុល្លារ កើនឡើងប្រមាណ ៥៥% ប៉ុន្ដែកំណើននេះ នៅតែតិចជាងឆ្នាំមុនដដែល។ បន្ថែមពីលើនេះកម្ចីថ្មីនៅក្នុងប្រទេសចិន បានធ្លាក់ដល់កម្រិតទាបបំផុតក្នុងរយៈពេលប្រាំបីឆ្នាំចុងក្រោយ ហើយចាប់ផ្ដើមធ្លាក់ខ្លាំងបំផុតចាប់តាំងពីឆ្នាំ២០១០មក។ ជាមួយគ្នានេះ ការទិញលក់ខុនដូ និងការបញ្ចាំក៏កំពុងថយចុះដូចគ្នា។
សូមជម្រាបថា ធនាគារ PBOC និងគណៈកម្មការនិយតករធនាគារ និងធានារ៉ាប់រងចិន បានជួបប្រជុំគ្នាកាលពីថ្ងៃទី ១១ខែមករា ជាមួយធនាគារធំៗផ្សេងទៀត ដោយបានណែនាំពួកគេឱ្យបង្កើនការផ្តល់ប្រាក់កម្ចីក្នុងវិស័យផ្សេងៗ ដូចជាវិស័យអចលនទ្រព្យជាដើម ខណៈដែលវិស័យនេះ កំពុងជួបបញ្ហាថមថយចុះគួរឲ្យកត់សម្គាល់។
អត្ថបទ ៖ សារៀម លក្ខិណា
