លោក ចូ បៃដិន បានផ្តួលលោក ដូណាល់ ត្រាំ នៅក្នុងការបោះឆ្នោតប្រធានាធិបតីអាម៉េរិក កាលពីថ្ងៃទី៣ ខែវិច្ឆិកា ឆ្នាំ២០២០ ប៉ុន្តែដោយមិនអស់ចិត្តលោក ដូណាល់ ត្រាំចង់ផ្តួល លោក ចូ បៃដិន វិញនៅក្នុងការបោះឆ្នោតនៅថ្ងៃទី៥ ខែវិច្ឆិកាឆ្នាំ២០២៤។ តែយ៉ាងណាមកទល់ពេលនេះគេមិនទាន់ដឹងថា តើអ្នកទាំងពីរនឹងជួបគ្នាឫអត់នោះទេ។
ស្ថិតក្នុងវ័យ៨១ឆ្នាំ លោក ចូ បៃដិន ដែលគេដឹងថា ជាប្រធានាធិបតីចាស់បំផុតក្នុងប្រវត្តិសាស្រ្តអាម៉េរិក និងតែងតែរងនូវការរិះគន់ពីបញ្ហាសុខភាពបានអះអាងថា លោកនឹងបន្តឈរឈ្មោះជាបេក្ខជនប្រធានាធិបតីរបស់គណបក្សប្រជាធិបតេយ្យដដែល ខណៈលោក ដូណាល់ ត្រាំ ដែលមានវ័យ៧៧ឆ្នាំ ទោះបីជាចាញ់ក្នុងការបោះឆ្នោតកាលពីអាណត្តិមុនទាំងមិនអស់ចិត្ត ក៏កំពុងតែសកម្មនៅក្នុងយុទ្ធនាការបោះឆ្នោតផ្ទៃក្នុងគណបក្ស ដើម្បីទទួលបានការគំាទ្រស្របច្បាប់ជាបេក្ខជនប្រធានាធិបតីរបស់គណបក្សសាធារណៈរដ្ឋជាថ្មីម្តងទៀត។
ជុំវិញមហិច្ឆតានយោបាយរបស់រដ្ឋបុរសអាម៉េរិកទាំងពីរនេះ គេនៅមិនទាន់ដឹងច្បាស់នៅឡើយទេថា ពួកគេនឹងអាចទទួលបានការគាំទ្រពីគណបក្សទាំងពីរឬយ៉ាងណានៅឡើយទេ ប៉ុន្តែសារព័ត៌មានធំៗបានរាយការណ៍ថា បេក្ខភាពបេក្ខជនប្រធានាធិបតីអាម៉េរិកអាណត្តិក្រោយអាចនឹងកំណត់នៅក្នុងការបោះឆ្នោតដណ្តើមប្រជាប្រិយភាពនៅក្នុងបក្ស ដែលរៀបចំនៅថ្ងៃអង្គារ ដែលគេដំណើរការរៀបចំនៅរដ្ឋចំនួន១៦រដ្ឋ ដែលរួមទាំងរដ្ឋអាឡាស្កា កាលីហ្វ័ញ៉ា និងវ័រជីនៀជាដើម។ បេក្ខភាពរបស់លោក ចូ បៃដិន និងលោក ដូណាល់ ត្រាំ គឺទទួលបានការគាំទ្រនៅរដ្ឋ វ័រជីនៀ ដូចគ្នា។ ខណៈនៅរដ្ឋ អាយអូវ៉ា (Iowa) និង វ័រម៉ុន (Vermont) បានគាំទ្រលោក ចូ បៃដិន។
យ៉ាងណាមិញលោក ដូណាល់ ត្រាំ បាននិយាយកាលពីពេលថ្មីៗថា លោកត្រូវតែផ្តួលលោក ចូ បៃដិន ដែលត្រូវបានលោកចាត់ទុកជាប្រធានាធិបតីអាក្រក់បំផុតក្នុងប្រវត្តិសាស្ត្រ ខណៈ ដែលលោក ចូ បៃដិន វិញក៏ធ្លាប់បាននិយាយផងដែរថា ប្រសិនបើលោកចាញ់ការបោះឆ្នោតនេះ អាមេរិកនឹងត្រលប់មកជួបលោក ដូណាល់ ត្រាំ ឡើងវិញ ហើយនៅពេលនោះរបៀបដែលលោកបានប្រព្រឹត្ត និងអនុវត្តជាមួយសហគមន៍អាម៉េរិក គឺជារឿងដ៏អាម៉ាស់៕
ដោយៈ សរ សុជាតិ
