លោក អួន ស៊ីឡុត ប្រធានសមាគមស្វាយចន្ទីកម្ពុជា កត់សម្គាល់ថា បច្ចុប្បន្នបាតុភូតអែលនីណូចាប់ផ្តើមបញ្ចេញឥទ្ធិពលមកលើការដាំដុះដំណាំស្វាយចន្ទីរបស់កសិករជាបណ្ដើរៗហើយ។ បាតុភូតនេះ បានធ្វើឱ្យដើមស្វាយចន្ទីរបស់កសិករមួយចំនួនជួបបញ្ហាគាំងក្តឹប និងខូចផ្កា និងបង្កើតឱ្យមានសត្វល្អិតបំផ្លាញច្រើន ដោយសារអាកាសធាតុនៅពេលព្រឹក និងពេលយប់បានចុះត្រជាក់ក្រោម២០អង្សាសេ និងពេលថ្ងៃមានកម្ដៅរហូតដល់៣៨ ទៅ៣៩អង្សាសេ។ កត្តានេះបានធ្វើឱ្យសមាគមស្វាយចន្ទីកម្ពុជាបានព្យាករថា ទិន្នផលស្វាយចន្ទីអាចនឹងធ្លាក់ចុះពី១០%ទៅ៣០%នៅឆ្នាំនេះ បើធៀបនឹងឆ្នាំមុន។
ទោះបីយ៉ាងនេះក្តី ប្រធានសមាគមស្វាយចន្ទីកម្ពុជារូបនេះអះអាងថា ចម្ការស្វាយចន្ទីរបស់កសិករមួយចំនួនធំ ដែលជាសមាជិករបស់សមាគម ពុំបានរងផលប៉ះពាល់ធ្ងន់ធ្ងរដោយសារបាតុភូតនេះនោះទេ។ មិនប៉ះពាល់ធ្ងន់ធ្ងរ ក៏ដោយសារពួកគេបានតាមដាន និងអនុវត្តតាមវិធីសាស្រ្តណែនាំរបស់អ្នកជំនាញតាំងពីចុងឆ្នាំ២០២៣ មក។
គួរបញ្ជាក់ថា កាលពីឆ្នាំ២០២៣ កន្លងទៅ កម្ពុជានាំចេញគ្រាប់ស្វាយចន្ទីបានសរុបជាង៦៥ម៉ឺន៦ពាន់តោនថយចុះជាង៧% បើធៀបនឹងឆ្នាំ២០២២។ បច្ចុប្បន្នកម្ពុជាមានផ្ទៃដីដាំស្វាយចន្ទីប្រមាណ៧០ម៉ឺនហិកតា ខណៈនៅឆ្នាំ២០២១ មានប្រមាណ៨០ម៉ឺនហិកតា៕
អត្ថបទ៖ បូ ដូឡា
