កាលពីខែសីហា ឆ្នាំនេះ សហភាពអឺរ៉ុប បានចាប់ផ្តើមបើកការស៊ើបអង្កេតថា តើជីវឥន្ធនៈ ដែលនាំចូលពីប្រទេសឥណ្ឌូនេស៊ី កំពុងគេចពន្ធរបស់សហភាពអឺរ៉ុប តាមរយៈការឆ្លងកាត់ប្រទេសចិន និងអង់គ្លេស ឬយ៉ាងណា។ ការស៊ើបអង្កេតចុងក្រោយបង្អស់បន្ទាប់ពីមានបណ្ដឹងពីស្ថាប័នក្រុមប្រឹក្សាជីវឥន្ធនៈអឺរ៉ុប (EBB) បានធ្វើឡើងចាប់ពីថ្ងៃទី១ ខែតុលា ឆ្នាំ២០២២ ដល់ថ្ងៃទី៣០ ខែកញ្ញា ឆ្នាំ២០២៣។ ការស៊ើបអង្កេតនេះនឹងប្រើពេលរហូតដល់១៤ខែ ជាមួយនឹងក្ដីរំពឹងថា នឹងមានការកំណត់ពន្ធបណ្ដោះអាសន្នក្នុងរយៈពេល៨ខែ។
គណៈកម្មការអឺរ៉ុបបានចេញសេចក្តីថ្លែងការណ៍ថា បណ្ដាក្រុមហ៊ុនផលិតរបស់សហភាពអឺរ៉ុប បានដាក់ជូនភ័ស្តុតាងបង្ហាញពីការនាំចូលជីវឥន្ធនៈពីប្រទេសចិនចូលមកសហភាពអឺរ៉ុប ក្នុងតម្លៃទាបខ្លាំង ហើយអះអាងថា ការនាំចូលទាំងនេះកំពុងជះផលប៉ះពាល់ដល់ឧស្សាហកម្មរបស់ពួកគេយ៉ាងធ្ងន់ធ្ងរ ដោយសារតែពួកគេមិនអាចប្រកួតប្រជែងជាមួយនឹងតម្លៃទាបបែបនេះបាន។ ភ្លាមៗនោះបេសកជនចិនប្រចាំសហភាពអឺរ៉ុប និងសភាពាណិជ្ជកម្មចិនមិនបានឆ្លើយតបចំពោះសំណើសុំការបំភ្លឺទាក់ទិនបញ្ហានេះទេ។
អត្ថបទគួរអាន
ស្ថាប័នក្រុមប្រឹក្សាជីវឥន្ធនៈអឺរ៉ុប (EBB) បានចេញសេចក្តីថ្លែងការណ៍ដាច់ដោយឡែកមួយថា ប្រទេសចិន បានក្លាយជាអ្នកនាំចេញជីវឥន្ធនៈធំបំផុតមកកាន់សហភាពអឺរ៉ុប ដែលមាន២៧ប្រទេសជាសមាជិកក្នុងឆ្នាំ២០២៣។ ស្ថាប័ននេះកត់សម្គាល់ឃើញថា នៅឆ្នាំ២០២៣ ទំនិញនាំចូលដែលលក់បង្ខូចតម្លៃរបស់ចិនបានរុញច្រានឱ្យទីផ្សារដួលរលំ ហើយទីតាំងផលិតកម្មនានាបានបិទទ្វារនៅក្នុងរដ្ឋជាសមាជិកមួយចំនួន។
ជីវឥន្ធនៈស្ថិតក្នុងចំណោមឥន្ធនៈ ដែលត្រូវបានលើកកម្ពស់ ដើម្បីកាត់បន្ថយការបំភាយឧស្ម័នកាបូននៅក្នុងការដឹកជញ្ជូន។ ឧស្សាហកម្មរបស់សហភាពអឺរ៉ុប ដែលគណៈកម្មការអឺរ៉ុបអះអាងថា មានទំហំរហូតដល់ទៅ៣៤ពាន់លានដុល្លារនេះ បានក្លាយជាប្រធានបទនៃជម្លោះ ដែលកើតឡើងជាញឹកញាប់ជាមួយបណ្ដាដៃគូពាណិជ្ជកម្ម។
នៅក្នុងជម្លោះពាណិជ្ជកម្មដាច់ដោយឡែកជាមួយក្រុងប៉េកាំង គណៈកម្មការអឺរ៉ុប បានបើកការស៊ើបអង្កេតកាលពីខែកញ្ញា ឆ្នាំនេះ លើការនាំចូលរថយន្តអគ្គិសនីរបស់ចិន ដែលខ្លួនអះអាងថា កំពុងទទួលបានអត្ថប្រយោជន៍ពីការឧបត្ថម្ភធនរបស់រដ្ឋាភិបាលចិន។ មហាយក្សចិនបានរិះគន់ការស៊ើបអង្កេតរបស់សហភាពអឺរ៉ុបនេះ ដោយចាត់ទុកការស៊ើបអង្កេតនេះថា ជាទង្វើគាំពារនិយមយ៉ាងច្បាស់ក្រឡែត៕
ដោយ: តែម សុខុម
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
