អាល្លឺម៉ង់សន្យាផ្តល់ជំនួយ៦៦លានដុល្លារដល់កម្ពុជា ដើម្បីអភិវឌ្ឍន៍សង្គម និងសេដ្ឋកិច្ច

បើតាមសេចក្ដីប្រកាសព័ត៌មានរបស់ក្រុមប្រឹក្សាអភិវឌ្ឍន៍ នាកិច្ចចរចាស្តីពីកិច្ចសហប្រតិបត្តិការអភិវឌ្ឍន៍រវាងកម្ពុជានិងអាល្លឺម៉ង់ រដ្ឋាភិបាលអាល្លឺម៉ង់ បានសន្យាផ្តល់ហិរញ្ញប្បទានឥតសំណងប្រមាណ៦៣លានអឺរ៉ូ ឬប្រមាណ៦៦លានដុល្លារដល់កម្ពុជា ដើម្បីរួមចំណែកជាមួយរាជរដ្ឋាភិបាលកម្ពុជា ក្នុងការអភិវឌ្ឍន៍សង្គម និងសេដ្ឋកិច្ចកម្ពុជា ឲ្យកាន់តែមានភាពល្អប្រសើរបន្ថែមទៀត។ ជំនួយឥតសំណងទាំង៦៦លានដុល្លារនេះ គឺផ្តោតលើកិច្ចសហប្រតិបត្តិការផ្នែកហិរញ្ញវត្ថុ និងកិច្ចសសហប្រតិបត្តិការផ្នែកបច្ចេកទេស។

ជាមួយគ្នានេះភាគីទាំងពីរកម្ពុជា-អាល្លឺម៉ង់ បានឯកភាពក្នុងការបន្តពង្រឹងកិច្ចសហប្រតិបត្តិការអភិវឌ្ឍន៍លើវិស័យអាទិភាពចំនួន៣ រួមមាន៖ការអភិវឌ្ឍសេដ្ឋកិច្ចប្រកបដោយចីរភាព, សុខាភិបាល និងគាំពារសង្គម, និងថាមពល និងអាកាសធាតុ និងវិស័យផ្សេងៗទៀត ដែលមានសង្គតិភាពជាមួយនឹងអាទិភាពនៃកិច្ចអភិវឌ្ឍន៍ជាតិ ដូចមានចែងនៅក្នុងយុទ្ធសាស្ត្របញ្ចកោណ-ដំណាក់កាលទី១ និងរបៀបវារៈឆ្នាំ២០៣០ របស់ប្រទេសអាល្លឺម៉ង់។ ទន្ទឹមនឹងនេះ ភាគីអាល្លឺម៉ង់បានវាយតម្លៃខ្ពស់ និងចាត់ទុកប្រទេសកម្ពុជា ជាដៃគូសំខាន់ក្នុងកិច្ចសហប្រតិបត្តិការអភិវឌ្ឍន៍របស់អាល្លឺម៉ង់។

គួរជម្រាបថា គោលដៅចម្បងនៃកិច្ចចរចាស្តីពីកិច្ចសហប្រតិបត្តិការអភិវឌ្ឍន៍នេះ គឺដើម្បីពិនិត្យវឌ្ឍនភាពនៃកិច្ចសហប្រតិបត្តិការទ្វេភាគី, ពិភាក្សាលើវិស័យអាទិភាពនានានៃកិច្ចសហប្រតិបត្តិការអភិវឌ្ឍន៍ទ្វេភាគី ទាំងទិដ្ឋភាពបច្ចេកទេស និងទិដ្ឋភាពនយោបាយ និងតម្រង់ទិសកិច្ចសហប្រតិបត្តិការអភិវឌ្ឍន៍នាពេលអនាគត។ យ៉ាងណាមិញតំណាងជាន់ខ្ពស់រាជរដ្ឋាភិបាលកម្ពុជា និងតំណាងជាន់ខ្ពស់រដ្ឋាភិបាលអាល្លឺម៉ង់ បានវាយតម្លៃខ្ពស់ចំពោះការរីកចម្រើននៃដំណើរការប្រជាធិបតេយ្យ និងនីតិរដ្ឋនៅកម្ពុជា និងវឌ្ឍនភាពនៃកិច្ចសហប្រតិបត្តិការអភិវឌ្ឍន៍ផងដែរ៕