កោះម៉ាកាវ ដែលមានប្រជាពលរដ្ឋសរុបជាង៦៨ម៉ឺននាក់ ដែលស្ថិតនៅក្រោមតំបន់រដ្ឋបាលពិសេសនៃប្រទេសចិន អាចរកប្រាក់ចំណូលពីវិស័យឧស្សាហកម្ម និងសេវាកម្មកាស៊ីណូសរុបប្រមាណជិត២៣ពាន់លានដុល្លារ នៅក្នុងឆ្នាំ២០២៣ កន្លងទៅ កើនឡើងជិត៣៣៤% បើធៀបនឹងឆ្នាំ២០២២។ កំណើនប្រាក់ចំណូលដ៏ច្រើនសន្ធឹកសន្ធាប់នេះ បានកើតឡើងក្រោយប្រទេសចិនបានលើកលែងការរឹតត្បិតលើការរីករាលដាល នៃមេរោគកូវីដ-១៩ កាលពីដើមឆ្នាំ២០២២។
និយតករគ្រប់គ្រងកាស៊ីណូរបស់កោះនេះបានអះអាងថា ការិយាល័យអធិការកិច្ច និងសម្របសម្រួលកាស៊ីណូ ដែលជាស្ថាប័នទទួលខុសត្រូវផ្ទាល់លើសេវាកម្ម ក៏ដូចជាឧស្សាហកម្មនេះ បានអះអាងថា សេវាកម្មកម្សាន្តតាមកាស៊ីណូបានស្ទុះងើបខ្លាំងបំផុតទើបតែសម្រេចបាននៅក្នុងរង្វង់ចុងត្រីមាសទី៤ នៃឆ្នាំ២០២៣ ប៉ុណ្ណោះ។
ស្ថាប័ននេះ ក៏បានរាយការណ៍ផងដែរថា ក្រៅពីសេវាកម្មកាស៊ីណូ សេវាកម្មក៏ដូចជាការចំណាយរបស់អ្នកទេសចរក្រៅរង្វង់កាស៊ីណូ ក៏មានកំណើនដែរ ប៉ុន្តែគេគ្រាន់តែរំលេចថា ភាគរយនៃចំណូលដែលកោះនេះទទួលបានមកពីសេវាកម្មនានាក្រៅរង្វង់កាស៊ីណូមានប្រមាណជា២០%។
កោះម៉ាកាវមានទំហំប្រមាណជា៣៣គីឡូម៉ែត្រការ៉េ ហើយកោះនេះជាទូទៅជាប្រភពសេវាកម្មទេសចរណ៍ ហើយសេវាកម្មសំខាន់បំផុតគឺកាស៊ីណូ។ កាស៊ីណូបានក្លាយជាសេវាកម្មស្របច្បាប់នៅលើកោះនេះតាំងតែពីឆ្នាំ១៩៦២ មកម្ល៉េះ៕
ដោយៈ សរ សុជាតិ
