ក្រុមហ៊ុនអ្នកឧកញ៉ា គិត ម៉េង ចាប់ដៃគ្នាជាមួយក្រុមហ៊ុនបារាំង TotalEnergies លើគម្រោងស្វែងរកថាមពលកកើតឡើងវិញនៅកម្ពុជា

ពិធីចុះហត្ថលេខានេះ បានធ្វើឡើងក្នុងប្រទេសសិង្ហបុរី ដោយមានវត្តមានលោក Ting Wee Liang ប្រធានប្រចាំ ប្រទេសសិង្ហបុរី និងជាប្រធានគ្រប់គ្រងទីផ្សារ និងសេវាកម្មប្រចាំអាស៊ីប៉ាស៊ីហ្វិក និងមជ្ឈិមបូព៌ា របស់ក្រុមហ៊ុន TotalEnergies និងអ្នកឧកញ៉ា គិត ម៉េង ប្រធានក្រុមប្រឹក្សាភិបាលក្រុមហ៊ុន Royal Group។

អ្នកឧកញ៉ា គិត ម៉េង ជឿជាក់ថាកិច្ចសហការនេះ គឺមានគោលបំណងជំរុញកិច្ចខិតខំប្រឹងប្រែងស្រាវជ្រាវ និងអភិវឌ្ឍន៍សម្រាប់គម្រោងកកើតឡើងវិញដ៏ល្អប្រសើរបំផុតនៅក្នុងប្រទេសកម្ពុជា ដើម្បីបន្តការផ្លាស់ប្តូរថាមពលរបស់ប្រទេសជាតិ និងគោលដៅបរិស្ថាន ហើយរំពឹងថា គម្រោងនេះនឹងទទួលបានជោគជ័យរួមគ្នាជាច្រើននៅពេលខាងមុខឆាប់ៗនេះ។

យ៉ាងណាមិញ តាមការអះអាងរបស់អ្នកឧកញ៉ា គិត ម៉េង កិច្ចសហការជាមួយក្រុមហ៊ុនបារាំង TotalEnergiesនេះ ក្រុមហ៊ុនរបស់លោក បានត្រៀមខ្លួនធ្វើជាសម្ព័ន្ធមិត្តដ៏ខ្លាំងក្លា ដោយប្រើប្រាស់ចំណេះដឹង ជំនាញ និងសមត្ថភាពប្រតិបត្តិរួមគ្នា។

អ្នកឧកញ៉ា បន្ថែមថា មូលដ្ឋានគ្រឹះនៃភាពជឿជាក់ និងភាពជាដៃគូដ៏រឹងមាំនៅក្នុងការបណ្តាក់ទុននេះកំពុងតែចាប់ផ្តើមមានរូបរាងជាមួយនឹងក្រុមហ៊ុន TotalEnergies។

លោក Ting Wee Liang ប្រធានប្រចាំ ប្រទេសសិង្ហបុរី និងជាប្រធានគ្រប់គ្រងទីផ្សារ និងសេវាកម្មប្រចាំ អាស៊ីប៉ាស៊ីហ្វិក និងមជ្ឈិមបូព៌ា របស់ក្រុមហ៊ុន TotalEnergies បានលើកឡើងដែរថា ក្រុមហ៊ុន TotalEnergies បានចូលមកទីផ្សារកម្ពុជារយៈពេល៣ទសវត្សរ៍មកហើយ ដោយមានដំណើរការនូវបណ្ដាញស្ថានីយ, ការលក់ប្រេងរំអិលយានយន្ដ និងប្រេងយន្ដហោះជាដើម។ លោកបន្ថែមថា ក្នុងនាមជាក្រុមហ៊ុនពហុថាមពល ក្រុមហ៊ុន TotalEnergies ប្ដេជ្ញាចិត្តអភិវឌ្ឍគម្រោងថាមពលកកើតឡើងវិញថ្មី និងផ្ដល់នូវអត្ថប្រយោជន៍នៅជុំវិញពិភពលោករួមទាំងកម្ពុជា ដើម្បីគាំទ្រដល់ការការផ្លាស់ប្ដូរថាមពលនៅក្នុងប្រទេសនេះ។

គួររំឭកថា នៅខែវិច្ឆិកា ឆ្នាំ២០២២ ក្រុមហ៊ុន រ៉ូយ៉ាល់គ្រុប ផោវើ (RGP) បានចុះហត្ថលេខាលើកិច្ចព្រមព្រៀងផ្តាច់មុខជាមួយក្រុមហ៊ុន Keppel Energy (KE) របស់ប្រទេសសិង្ហបុរី ដើម្បីរួមគ្នាស្វែងរកការអភិវឌ្ឍគម្រោងថាមពលកកើតឡើងវិញនៅក្នុងប្រទេសកម្ពុជា។