អ្នកស្រុកផ្តើមជម្លៀសខ្លួនខណៈសមរភូមិថ្មីត្រៀមផ្ទុះឡើង រវាងអ៊ីស្រាអែល និងក្រុមហេស្សប៊ូឡា

នៅក្នុងការបាញ់ផ្លោងដាក់គ្នាកាលពីថ្ងៃសៅរិ៍​ ត្រូវបានគេរាយការណ៍ថា នៅភាគខាងត្បូងនៃប្រទេសលីបង់ ដែលគ្រប់គ្រងដោយអង្គការហេស្សប៊ូឡា បានបណ្តាលឱ្យមនុស្សប្រាំនាក់​ស្លាប់ ដែលបួននាក់ជាពួកសកម្មប្រយុទ្ធហេស្សប៊ូឡា និងម្នាក់ទៀតជាក្រុមអ៊ីស្លាមជីហាដ។

ដោយឡែក នៅភាគខាងជើងអ៊ីស្រាអែល ជាប់ព្រំដែនលីបង់វិញ កម្មករកសិដ្ឋានជនជាតិថៃ ចំនួនពីររូបបានរងរបួសក្នុងតំបន់ ម៉ាហ្គាលីអូត (Margaliot) កៀកជាប់នឹងព្រំដែន។ នេះបើយោងតាមការបញ្ជាក់របស់ភ្នាក់ងារជួយសង្គ្រោះរបស់អ៊ីស្រាអែល។ យោងតាមភ្នាក់ងារនេះ បច្ចុប្បន្នថៃ មានកម្មករធ្វើការនៅអ៊ីស្រាអែល ប្រមាណ៣ម៉ឺននាក់​។

កាលពីល្ងាចថ្ងៃសៅរិ៍ កងទ័ពអ៊ីស្រាអែល បាននិយាយថា ការបាញ់រ៉ុក្កែតប្រឆាំងរថក្រោះរបស់ក្រុមហេស្សប៊ូឡា ឆ្ពោះទៅភូមិ បារ៉ាម (Baram) ដែលជាប់នឹងព្រំដែននោះបានធ្វើឱ្យទាហានរបស់អ៊ីស្រាអែលបីនាក់រងរបួស ដែលម្នាក់ក្នុងនោះរងរបួសធ្ងន់។

យោធាអ៊ីស្រាអែលថា ខ្លួនក៏បានឆ្លើយតបដោយបានបាញ់មីស៊ីលប្រឆាំងរថក្រោះ វាយចំទីតាំងរបស់ក្រុមហេស្សប៊ូឡា កាលពីថ្ងៃសៅរិ៍ផងដែរ។ ស្របពេលជាមួយគ្នានេះ ក្រុមហេស្សប៊ូឡា ក៏បាននិយាយដែរថា ខ្លួនបានវាយប្រហារគោលដៅអ៊ីស្រាអែល ពីបួនទៅប្រាំទីតាំងតាមបណ្តោយព្រំដែនដែរ។

មេទ័ពពីរនាក់របស់ហេស្សប៊ូឡា គឺលោក ណាម ហ្វាហ្សេម (Naim Qassem) បានព្រមានថា អង្គការប្រយុទ្ធរបស់ខ្លួនត្រៀមខ្លួនជាស្រេចក្នុងការជួយដល់ក្រុមហ៉ាម៉ាស នៅពេលណាដែលកងទ័ពអ៊ីស្រាអែលចូលឈ្លានពានហ្កាហ្សា។

មែនទែនទៅ ការបាញ់ផ្លោងដាក់គ្នាចុងក្រោយកាលពីថ្ងៃសៅរិ៍ ដែលបានបង្កឱ្យមានអ្នកស្លាប់និងរបួសធ្ងន់ធ្ងរលើកដំបូងនេះ បានកើតឡើងចំពេលដែលរដ្ឋមន្ត្រីការពារជាតិ អ៊ីស្រាអែល លោក យ៉ូវ ហ្គាឡេន (Yoav Gallant) បានធ្វើដំណើរទៅជួបកងទ័ពនៅភាគខាងជើងព្រំដែនជាប់ជាមួយនឹងលីបង់ និងប្រាប់កងទ័ពដែលឈរជើងនៅទីនោះឱ្យបង្កើនការប្រុងប្រយ័ត្ន។

ទន្ទឹមគ្នានេះ លោក អាន់តូនី ប្លីនខេន រដ្ឋមន្ត្រីការបរទេសអាម៉េ​រិកកាលពីថ្ងៃសុក្រ បានប្រាប់នាយករដ្ឋមន្ត្រីលីបង់ លោក ណាជីប ម៉ៃកាធី (Najib Mikati) តាមជំនួបទូរសព្ទថា អាម៉េរិកមានការព្រួយបារម្ភយ៉ាងខ្លាំងចំពោះការកើនឡើងភាពតានតឹងនៅតាមព្រំដែននេះ។

ទោះជាយ៉ាងណាក៏ដោយ អ៊ីស្រាអែលបានជម្លៀសប្រជាជនប្រមាណ២,៥០០នាក់រួចហើយ ពីក្រុង ខឺរីយ៉ាដ ស្មូណា (Kiryat Shmona) ដែលជាប់នឹងព្រំដែនជាមួយលីបង់។ យោងតាមការរាយការណ៍ដោយកាសែតធំៗដូចជា AFP ជាដើម គិតចាប់តាំងពីថ្ងៃទី៧ តុលា មក អ្នកស្លាប់បានកើនឡើងជាង២៧នាក់ នៅភាគខាងកើតលីបង់ ដែលភាគច្រើនជាក្រុមសកម្មប្រយុទ្ធ និងជនស៊ីវិលយ៉ាងហោចណាស់បួននាក់បានបាត់បង់ជីវិត។

ជាមួយគ្នានេះ ភាគីអ៊ីស្រាអែល មានកងទ័ពប្រមាណ៤នាក់បានស្លាប់ រួមទាំងជនស៊ីវិលផងដែរ។ ទន្ទឹមនឹងការព្រួយបារម្ភពីសមរភូមិថ្មី អ៊ីស្រាអែល កាលពីដើម នៃជម្លោះជាមួយក្រុមហាម៉ាស បានដាក់ពង្រាយទ័ពជាមួយរថក្រោះរាប់សិបគ្រឿងជាស្រេចក្បែរព្រំដែនជាមួយលីបង់ បន្ទាប់ពីក្រុមហេស្សប៊ូឡា ប្រកាសគាំទ្រក្រុមហាម៉ាសចំពោះការវាយប្រហារលើអ៊ីស្រាអែល៕