សហគមន៍ពាមក្រសោបរកចំណូលបានជិត១លានដុល្លារពីផលគ្រំចំពុះទា នៅឆ្នាំ២០២៣

លោក វង្ស តារា ប្រធានសហគមន៍ពាមក្រសោប បានប្រាប់ខេមបូណូមីសថា គ្រំចំពុះទា ទទួលបានការពេញនិយម និងមានការបញ្ជាទិញពីទីផ្សារក្នុងប្រទេសថៃ ហើយក្រៅពីនេះ ក៏មានការបញ្ជាទិញខ្លះពីទីផ្សារក្នុងស្រុកផងដែរ។ គ្រំចំពុះទាដែលមិនទាន់សម្អាត​ អាចលក់ចេញជាមធ្យម១លាន២សែនរៀលក្នុងតោន ហើយការបញ្ជាទិញមានភាពមមាញឹកខ្លាំងនៅចន្លោះពីមករា ដល់ខែមីនា។ នេះបើតាមការលើកឡើងរបស់ប្រធានសមាគមរូបនេះ ដែលបានបន្ថែមថា នៅពេញមួយឆ្នាំ២០២៣ សមាជិករបស់សមាគមពាមក្រសោប ប្រមូលទិន្នផលគ្រំចំពុះទា បានជិត៣ពាន់តោន ដោយផ្តល់ចំណូលជិត១លានដុល្លារអាម៉េរិក។

មុខរបរចិញ្ចឹមគ្រំចំពុះទារបស់ប្រជាសហគមន៍នេះ ទទួលបានការលើកទឹកចិត្តពីក្រសួងពាក់ព័ន្ធមួយចំនួន និងធ្វើឱ្យសេដ្ឋកិច្ចគ្រួសាររបស់ពលរដ្ឋ ដែលជាសមាជិកសហគមន៍ពាមក្រសោប មានជីវភាពល្អជាងមុន។ នេះបើតាមការអះអាងរបស់លោក វង្ស តារា ដែលបានបន្ថែមថា ប្រជាសហគមន៍ភាគច្រើនបានពឹងផ្អែក និងអាស្រ័យលើផលនេសាទ ព្រោះមិនមានផ្ទៃដីកសិកម្មសម្រាប់ធ្វើស្រែចម្ការនោះទេ។

ទោះបីជាគ្រំចំពុះទា កំពុងទទួលបានការពេញនិយមពីទីផ្សារប្រទេសថៃ ក៏ពិតមែន តែសម្រាប់ប្រធានសហគមន៍ពាមក្រសោប ហាក់មានការព្រួយបារម្ភខ្លះដែរ ពីការបញ្ជាទិញ និងស្ថិរភាពតម្លៃ ដោយហេតុថា ការបញ្ជាទិញពីឈ្មួញបរទេសមិនសូវជាទៀងទាត់ ហើយតម្លៃទៀតសោត ក៏មានការប្រែប្រួលអាស្រ័យលើឈ្មួញជាអ្នកកំណត់ដែរ។ តែយ៉ាងណា អ្នកជំនាញរូបនេះអះអាងថា បច្ចុប្បន្នទីផ្សារនៅក្នុងស្រុកបានចាប់ផ្ដើមស្គាល់គ្រំចំពុះទា និងមានការបញ្ជាទិញកើនឡើងគួរឱ្យកត់សម្គាល់។ យ៉ាងណាមិញអ្នកជំនាញរូបនេះវាយតម្លៃថា ការប្រមូលផលគ្រំចំពុះទានៅឆ្នាំនេះអាចនឹងមានការធ្លាក់ចុះពី២០ទៅ៣០% ដោយសារកាលពីពេលកន្លងទៅ តំបន់សហគមន៍ពាមក្រសោប បានទទួលរងឥទ្ធិពលគ្រោះធម្មជាតិ ទឹកជំនន់។

បើតាមការគូសបញ្ជាក់របស់ប្រធានសហគមន៍ពាមក្រសោប ការចិញ្ចឹមគ្រំចំពុះទា ត្រូវចំណាយពេលចាប់ពី៦ខែ ទៅ១ឆ្នាំ ទើបអាចប្រមូលផលលក់លើទីផ្សារបាន ហើយការចិញ្ចឹមទៀតសោត គឺតាមលក្ខណៈធម្មជាតិដោយមិនមានការផ្តល់ចំណីអ្វីទាំងអស់៕

អត្ថបទ៖ បូ ដូឡា​