លោក ណាតថា កាហាប៉ាណា (Nattha Kahapana ) នាយកគ្រប់គ្រងក្រុមហ៊ុនប្រឹក្សាអចលនទ្រព្យ Knight Frank Thailand បានអះអាងថា ជាធម្មតាក្រុមហ៊ុន និងទីភ្នាក់ងារទេសចរណ៍ចិន នឹងធ្វើដំណើរមកកាន់កោះភូកេត ចាប់ពីខែសីហា ដើម្បីស្វែងរកកន្លែងស្នាក់នៅ និងស្ទាបស្ទង់ផលិតផលទាក់ទងនឹងទេសចរណ៍ក្នុងការរៀបចំសម្រាប់សប្តាហ៍មាសរបស់ប្រទេសចិន នៅក្នុងអំឡុងខែតុលា។ ការមកដល់នៃបណ្តាទីភ្នាក់ងារទេសចរណ៍ចិន នៅខែក្រោយ នឹងបង្ហាញពីស្ថានភាពពិតនៃទីផ្សារអ្នកទេសចរមកពីមកហាយក្សចិន នៅកោះភូកេត សម្រាប់ត្រីមាសទី៤ នៃឆ្នាំនេះ។
លោកបានបន្តថា ស្ថិតក្នុងស្ថានភាពបច្ចុប្បន្នការវិលត្រឡប់មកវិញរបស់អ្នកទេសចរចិន ពិតជាមានសារសំខាន់ណាស់សម្រាប់វិស័យទេសចរណ៍ និងចំពោះទីផ្សារខុនដូនៅលើកោះនេះ ខណៈអ្នកទិញជនជាតិចិនជាធម្មតាស្ថិតក្នុងចំណោមអតិថិជនកំពូល។ គួររំលឹកថា ចាប់តាំងពីឆ្នាំ២០១៨ ដល់ឆ្នាំ២០២៣ ជនជាតិចិន និងរុស្ស៊ី គឺជាប្រភព និងជាទីផ្សារខុនដូដ៏ធំរបស់ថៃ។
អ្នកជំនាញរូបនេះជឿជាក់ថា ទីផ្សារខុនដូនៅកោះភូកេតនឹងមើលឃើញពីលំហូរចូលនៃយូនីតថ្មីៗជិត៦ពាន់យូនីតនៅក្នុងឆ្នាំនេះ ដូច្នេះការវិលរបស់ភ្ញៀវទេសចរចិន គឺពិតជាមានសារសំខាន់ក្នុងការស្រូបយកការផ្គត់ផ្គង់ដែលកំពុងកើនឡើងនេះ។ លោកបានអះអាងថា ទីផ្សារខុនដូនៅភូកេត បានមើលឃើញពីតម្រូវការដ៏រឹងមាំ និងការងើបឡើងវិញយ៉ាងខ្លាំងចាប់តាំងពីឆ្នាំ២០២២ មកម៉្លេះ។
យោងតាមក្រុមហ៊ុន Knight Frank Thailand ចំនួនខុនដូថ្មីដែលដាក់លក់នៅភូកេត បានកើនឡើងជិតដល់៥ពាន់យូនីត ក្នុងឆ្នាំ២០១៩ ខណៈដែលឆ្នាំ២០១៨ គឺមានត្រឹមតែ២ពាន់៥រយយូនីតតែប៉ុណ្ណោះ។ ក្រុមហ៊ុននេះអះអាងថា កំណើនខុនដូនេះត្រូវបានជំរុញដោយការកើនឡើងនៃចំនួនអ្នកទិញ និងអ្នកអភិវឌ្ឍន៍មកពីប្រទេសចិន។ កាលពីឆ្នាំ២០២៣ គម្រោងខុនដូនៅភូកេតដែលបានលក់ចេញមានប្រមាណជាង៣៨០០ យូនីត នៅក្នុងចំណោមគម្រោងថ្មីសរុបជាង៤ពាន់យួនីត៕
ដោយ៖ សរ សុជាតិ
