ប៉ូឡូញអាចទទួលបានមូលនិធិទំហំ៧៦ពាន់លានអឺរ៉ូ ដែលសហភាពអឺរ៉ុបបង្កកត្រឡប់មកវិញ

ពាក់ព័ន្ធនឹងកញ្ចប់មូលនិធិនេះ គណៈកម្មការអឺរ៉ុបបានអះអាងថា អ្នកជំនាញនឹងប្រើប្រាស់រយៈពេល៣ខែ ដើម្បីពិនិត្យឡើងវិញនូវអ្វី ដែលសហភាពអឺរ៉ុបព្រួយបារម្ភ។

គណៈកម្មការអឺរ៉ុបបានចាប់ផ្តើមដំណើរការ ពិនិត្យឡើងវិញលើកញ្ចប់មូលនិធិទំហំប្រមាណ៧៦ពាន់លានអឺរ៉ូរបស់ប៉ូឡូញ ដែលខ្លួនបានបង្កក ក្រោយព្រួយបារម្ភអំពីឯករាជ្យភាពរបស់តុលាការ នៅប្រទេសដែលមានប្រជាជនជិត៤០លាននាក់មួយនេះ។ បច្ចុប្បន្នតម្រូវការសាច់ប្រាក់ ឫកញ្ចប់មូលនិធិអភិវឌ្ឈន៍ គឺជាបញ្ហាអាទិភាពចម្បងសម្រាប់ប្រទេសប៉ូឡូញ ដើម្បីយកមកបំពេញ និងដំណើរការគម្រោងអភិវឌ្ឍន៍នានានៅក្នុងប្រទេស សំដៅធ្វើទំនើបកម្មហេដ្ឋារចនាសម្ព័ន្ធ និងការតភ្ជាប់គម្លាតជាមួយរដ្ឋជាសមាជិកអឺរ៉ុបផ្សេងទៀត។

ប៉ុន្តែកំណែទម្រង់ប្រព័ន្ធតុលាការ ដ៏ធំទូលាយ ដែលណែនាំដោយរដ្ឋាភិបាលស្តាំនិយមនៅក្នុងប្រទេសនេះ នាំឱ្យទីក្រុងប្រ៊ុចសែលបង្កកកញ្ចប់មូលនិធិខាងលើ ដោយបារម្ភពីការដើរថយក្រោយនៃលទ្ធិប្រជាធិបតេយ្យ។ គណកម្មការអឺរ៉ុបព្រួយបារម្ភថា កំណែទម្រង់ប្រព័ន្ធតុលាការ ដែលប៉ូឡូញកំពុងតែធ្វើនឹងមានផលប៉ះពាល់យ៉ាងធ្ងន់ធ្ងរដល់ការចំណាយ និងការត្រួតពិនិត្យប្រាក់របស់អ្នកជាប់ពន្ធអឺរ៉ុប ដែលជាម្ចាស់មូលនិធិដ៏មហាសាលនេះ។

អ្នកនាំពាក្យរបស់គណៈកម្មការអឺរ៉ុប បាននិយាយថា ការសម្រេចចិត្តរបស់សហភាពអឺរ៉ុបលើកញ្ចប់ជំនួយដែលបង្កកនេះ គឺត្រូវបានពិចារណាឡើងវិញក្រោយប៉ូឡូញ បានជូនដំណឹងជាផ្លូវការថា ខ្លួននឹងពិចារណាបំពេញលក្ខខណ្ឌនានា ដើម្បីធានាឯករាជ្យភាពរបស់តុលាការ។

តំណាងគណៈកម្មការអឺរ៉ុប បាននិយាយថា ឥឡូវនេះខ្លួនកំពុងវិភាគលើលិខិត ដែលបានដាក់ជូនដោយអាជ្ញាធរប៉ូឡូញ ដើម្បីវាយតម្លៃថា តើលក្ខខណ្ឌនៃការអនុញ្ញាតនៅក្នុងសំណើរ ត្រូវបានបំពេញដែរឬទេ ហើយខ្លួនកំពុងទាក់ទងជាទៀងទាត់ជាមួយអាជ្ញាធរប៉ូឡូញទាំងកម្រិតបច្ចេកទេស និងកម្រិតនយោបាយ ដើម្បីធ្វើបច្ចុប្បន្នភាពនៃព័ត៌មាន។

ប្រភពដដែលបានបន្តថា ការពិនិត្យឡើងវិញនូវសំណើរំលាយការបង្កកកញ្ចប់មូលនិធិនេះអាចចំណាយពេលដល់ទៅ៣ខែ ឬយូរជាងនេះ ប្រសិនបើគណៈកម្មការអឺរ៉ុបស្នើសុំឱ្យប៉ូឡូញធ្វើការបំភ្លឺ។ នៅពេលនេះគេដឹងថា ប៉ូឡូញកំពុងត្រូវការនូវកញ្ចប់ឥណទានជាប្រាក់កម្ចី និងប្រាក់ជំនួយឥតសំណងពីសហភាពអឺរ៉ុប ដើម្បីគាំទ្រដល់ការស្តារសេដ្ឋកិច្ចបន្ទាប់ពីការរីករាលដាលនៃមេរោគកូវីដ-១៩ និងពង្រឹងការតភ្ជាបផ្នែកហេដ្ឋារចនាសម្ព័ន្ធខ្លាំងជាមួយសមាជិកអឺរ៉ុបផ្សេងៗទៀត៕

ដោយៈ សរ សុជាតិ