លោក ពូទីន ព្រមានហ្វាំងឡង់ក្រោយពីប្រទេសនេះចូលក្នុងអង្គការណាតូ

មេវិមានក្រឹមឡាំងលោក ពូទីន បាននិយាយនៅក្នុងបទសម្ភាសមួយ ដែលត្រូវបានចេញផ្សាយកាលពីថ្ងៃអាទិត្យ បានឱ្យដឹងថា បស្ចិមប្រទេសបានយកហ្វាំងឡង់ និងអូសចូលទៅក្នុងអង្គការណាតូ! ហេតុអ្វី? រុស្ស៊ីមិនដែលមានជម្លោះជាមួយហ្វាំងឡង់ទេ ហើយវិវាទទាំងអស់ រួមទាំងបញ្ហាទឹកដីនៅពាក់កណ្តាល​សតវត្សទី២០ទាំងអស់ ត្រូវបានដោះស្រាយជាយូរមកហើយ។ លោកបានបន្ថែមថា ប្រទេសទាំងពីរមិនដែលមានបញ្ហាអ្វីទេ ប៉ុន្តែឥឡូវនេះ«វានឹងមាន» ព្រោះយើងនឹងបង្កើតក្រុមយោធានៅតំបន់ Leningrad ដែលនៅជាប់ព្រំដែនប្រទេសហ្វាំងឡង់។

ក្នុងពេលជាមួយគ្នានេះ លោក ពូទីន ក៏បានច្រានចោលការលើកឡើងមិនសមហេតុសមរបស់លោក ចូ បៃដិន ប្រធានាធិបតីអាម៉េរិក ដែលថាលោក ពូទីន នឹងបន្តទៅមុខទៀត ប្រសិនបើរុស្ស៊ីដណ្តើមយកអ៊ុយក្រែនបាន ហើយម៉ូស្គូអាចវាយប្រហារសម្ព័ន្ធមិត្តណាតូ និងអូសទាញទាហានអាម៉េរិកចូលទៅក្នុង ជម្លោះ។ បុរសខ្លាំងរុស្ស៊ីរូបនេះបាននិយាយថា រុស្ស៊ីគ្មានហេតុផលភូមិសាស្ត្រនយោបាយណាមួយក្នុងការប្រើកម្លាំងយោធាប្រយុទ្ធជាមួយប្រទេសណាតូនោះទេ។

ទោះជាយ៉ាងណាក៏ដោយ មុនពេលលោក ពូទីន ចាប់ផ្តើមការឈ្លានពានលើអ៊ុយក្រែន លោកបានទាមទារម្តងហើយម្តងទៀតឱ្យណាតូកុំបន្តពង្រីកខ្លួនមកកៀកនឹងព្រំដែនជាមួយរុស្ស៊ី។ ប៉ុន្តែសង្គ្រាមនៅតែផ្ទុះឡើងរវាងរុស្ស៊ី និងប្រទេសក្បែរខាង គឺអ៊ុយក្រែន ដែលការណ៍នេះហើយបានជំរុញឱ្យប្រទេសហ្វាំងឡង់ផ្លាស់ប្តូរបរិយាកាសសន្តិសុខរបស់ខ្លួន ហើយនៅប៉ុន្មានខែបន្ទាប់ពីការឈ្លានពាន ប្រធានាធិបតីហ្វាំងឡង់ លោក Sauli Niinistö បានបង្ហាញពីបំណងចូលជាសមាជិកអង្គការណាតូ។

គួរជម្រាបថា យោងតាមមាត្រា៥ នៃសន្ធិសញ្ញាអង្គការអាត្លង់ទិកខាងជើង ការវាយប្រហារប្រដាប់អាវុធប្រឆាំងនឹងប្រទេសណាតូណាមួយ នឹងត្រូវចាត់ទុកថា ជាការវាយប្រហារប្រឆាំងនឹងអង្គការណាតូទាំងមូល ហើយណតូនឹងឆ្លើយតបវិញ។

ក្រោយចូលជាសមាជិកពេញសិទ្ធកាលពីខែមេសា ឆ្នាំនេះ រដ្ឋាភិបាលហ្វាំងឡង់បាននិយាយថា ខ្លួននឹងចំណាយប្រាក់ប្រហែល១៤៣លានដុល្លារ សម្រាប់ការសាងសង់របងការពារនៅតាមព្រំដែនភាគខាងកើតជាមួយរុស្ស៊ី ដែលមានប្រវែងជាង១ពាន់៣រយគីឡូម៉ែត្រ ដែលធ្លាប់មានការការពារសន្តិសុខខ្សោយ។ ទន្ទឹមគ្នានេះ ហ្វាំងឡង់បានសម្រេចបិទព្រំដែនទាំងមូលរបស់ខ្លួនជាមួយរុស្ស៊ី ក្នុងសប្តាហ៍នេះ ដោយអះអាងថា មានមនុស្សរាប់រយនាក់កំពុងព្យាយាមឆ្លងកាត់ព្រំដែនហ្វាំងឡង់ដោយខុសច្បាប់៕