នាជំនួបពិភាក្សាការងារទ្វេភាគី នាថ្ងៃទី០៨ ខែឧសភា ឆ្នាំ២០២៤ សម្ដេចតេជោ ហ៊ុន សែន ប្រធានព្រឹទ្ធសភានៃប្រទេសកម្ពុជា បានប្រាប់ទៅឯកអគ្គរាជទូតកាតាថា ប្រទេសកាតា មានថវិកាច្រើនគួរតែបើកស្ថានទូតផ្ទាល់នៅកម្ពុជា ប្រសើរជាជាងមាននិវេសដ្ឋាននៅប្រទេសផ្សេង។ សម្ដេចតេជោ ក៏បានលើកទឹកចិត្តឱ្យប្រទេសកាតាគួរតែចាប់ផ្ដើមហោះហើរឡើងវិញនូវ Qatar Airline ផងដែរ បន្ទាប់ពីបានផ្អាកដំណើរការដោយសារកូវីដ១៩នាពេលកន្លងទៅ ដើម្បីឱ្យការទំនាក់ទំនងរវាងប្រជាជននិងប្រជាជនកាន់តែរីកចម្រើន ក៏ដូចជាការនាំភ្ញៀវពីតំបន់មជ្ឈិមបូព៌ា និងអឺរ៉ុបមកកាន់កម្ពុជា និងនាំភ្ញៀវពីកម្ពុជានិងតំបន់អាស៊ានទៅកាន់កាតាវិញ។
បើតាមសម្ដេចតេជោ ហ៊ុន សែន ទំនាក់ទំនងរវាងប្រទេសពីរ គឺពឹងផ្អែកទៅលើទំនាក់ទំនងខាងសេដ្ឋកិច្ច ពោលគឺពេលណាទំនាក់ទំនងសេដ្ឋកិច្ចរឹងមាំ ទំនាក់ទំនងខាងនយោបាយក៏រឹងមាំទៅតាមនោះដែរ។ ដូច្នេះហើយ សម្ដេចតេជោ បានជម្រុញឱ្យពិនិត្យមើលលទ្ធភាពរវាងប្រទេសទាំងពីរលើកិច្ចការមួយចំនួន ដូចជាឱ្យមានកិច្ចព្រមព្រៀងការពារវិនិយោគ ដើម្បីផ្តល់ទំនុកចិត្តដល់វិនិយោគិន និងឱ្យមានកិច្ចព្រមព្រៀងស្តីពីការពុំយកពន្ធត្រួតគ្នាជាដើម។ មិនតែប៉ុណ្ណោះ សម្តេចតេជោបានបញ្ជាក់បន្ថែមថា បើអាចធ្វើឱ្យសម្រេចបាននូវកិច្ចព្រមព្រៀងពាណិជ្ជកម្មសេរីរវាងកម្ពុជា-កាតា ដូចដែលកម្ពុជាបានធ្វើជាមួយ ចិន កូរ៉េ និងអារ៉ាប៊ីសាអូឌីតនោះគឺកាន់តែប្រសើរថែមទៀតផងដែរ។
ជាមួយគ្នានេះ ឯកឧត្តម Khalid Ali Abdullah Abel ឯកអគ្គរាជទូតនៃរដ្ឋកាតា ប្រចាំកម្ពុជា បានសន្យាថានឹងខិតខំទាក់ទាញវិនិយោគិនពីកាតាមកកម្ពុជា ក៏ដូចជានាំវិនិយោគិនពីកម្ពុជាទៅកាតា ដើម្បីពិនិត្យមើលលទ្ធភាពដែលអាចសហប្រតិបត្តិការវិនិយោគផងដែរ ខណៈកាតាកំពុងតែស្វែងយល់ពីកត្តាអនុគ្រោះដែលធានាដល់ការវិនិយោគរបស់កាតានៅកម្ពុជា។ បើតាមឯកអគ្គរាជទូតរូបនេះ កាតាមានលទ្ធភាពវិនិយោគលើវិស័យជាច្រើន ដូចជា វិស័យថាមពល ប្រេង ឧស្ម័ន ហេដ្ឋារចនាសម្ព័ន្ធ ការកសាងមន្ទីរពេទ្យ ព្រលានយន្តហោះ និងវិស័យផ្សេងៗទៀត ហើយកាតាក៏កំពុងពិនិត្យសិក្សាពី Qatar Airlines ចាប់ដំណើរការឡើងវិញ ដោយលើកពីភាពអនុគ្រោះដែលទេសចរកាតាទៅតំបន់ផ្សេងៗផងដែរ៕
អត្ថបទ សោម ស្រីពេជ្រ និងរូបភាពឯកសារ
