មន្ត្រីតុលាការកំពូលស្រីលង្កាម្នាក់ដែលសុំមិនបញ្ចេញឈ្មោះ បានប្រាប់សារព័ត៌មានសិង្ហបុរី CNA ថា សេចក្តីជូនដំណឹងនេះត្រូវបានចេញនៅថ្ងៃពុធ ទី២៧ ខែកក្កដា ទាក់ទងនឹងញត្តិយ៉ាងហោចណាស់ចំនួនមួយ ដែលបានប្តឹងទៅកាន់អ្នកនយោបាយ និងមន្ត្រីរាជការស្រីលង្កា ដោយចោទប្រកាន់ថាពួកគេទាំងនោះ ត្រូវទទួលខុសត្រូវចំពោះវិបត្តិសេដ្ឋកិច្ចដែលបន្លាយអស់រយៈពេលជាច្រើនខែមកនេះ។
ហើយក្នុងចំណោម អ្នកដែលត្រូវបានប្ដឹងនោះ ក៏មានអតីតប្រធានាធិបតីស្រីលង្កា លោក Rajapaksa ផងដែរ ដែលបច្ចុប្បន្នលោកបានភៀសខ្លួនចេញពីប្រទេសកាលពីដើមខែមិថុនា តាមយន្តហោះយោធារបស់ស្រីលង្កា ចំពេលដែលមានការផ្ទុះការតវ៉ាទ្រង់ទ្រាយធំទាមទារឱ្យលោកលាលែងពីតំណែង។
គួរជម្រាបថាប្រទេសសិង្ហបុរី ក៏ទើបតែបានផ្តល់សិទ្ធិស្នាក់នៅរយៈពេល ១៤ ថ្ងៃបន្ថែមទៀត ដល់លោក Rajapaksa រហូតដល់ថ្ងៃទី១១ ខែសីហា ក្រោយលោកសុំពន្យារពេល។
អត្ថបទគួរអាន
អតីតប្រធានាធិបតីស្រីលង្កាបានសម្រេចចាកចេញពីប្រទេសស្រីលង្កាកាលពីថ្ងៃទី១៣ ខែកក្កដាកន្លងទៅ ក្រោយពីវិបត្តិសេដ្ឋកិច្ចនៅក្នុងប្រទេសកាន់តែអាក្រក់ទៅ ដោយគ្មានសមត្ថភាពក្នុងការដោះស្រាយ ជាមួយនឹងការតវ៉ាប្រឆាំងរដ្ឋាភិបាលកាន់តែរីកធំ។
ក្រោយទៅដល់ប្រទេសសិង្ហបុរី លោក Rajapaksa បានដាក់លិខិតលាលែងពីតំណែងជាផ្លូវការ ហើយលោកត្រូវបានជំនួសតំណែងដោយអតីតនាយករដ្ឋមន្ត្រី លោករ៉ានីល (Ranil Wickremesinghe) ដែលត្រូវបានឈ្នះឆ្នោតក្នុងសមាជិកសភាកាលពីសប្តាហ៍មុន។
មួយវិញទៀត បន្ទាប់ពីការលាលែងពីតំណែងរបស់លោក Rajapaksa ការបាតុកម្មបានធូរស្រាលនៅតាមដងផ្លូវ។ ទោះយ៉ាងណាក៏ដោយ គេព្យាករថាបាតុកម្មនឹងផ្ទុះឡើងសាជាថ្មីនៅក្នុងប្រទេសនេះ ប្រសិនបើលោកត្រឡប់ចូលប្រទេសវិញ។
រដ្ឋមន្ត្រីប្រព័ន្ធផ្សព្វផ្សាយ និងជាអ្នកនាំពាក្យគណៈរដ្ឋមន្ត្រីស្រីលង្កា លោកបានដូឡា (Bandula Gunawardena) បាននិយាយក្នុងសន្និសីទសារព័ត៌មានមួយកាលពីថ្ងៃអង្គារថា៖ «លោកប្រាកដក្នុងចិត្តថា លោករ៉ាចាប៉ាសា នឹងត្រឡប់ចូលក្នុងប្រទេសវិញ ហើយអាជ្ញាធរនៃប្រទេសត្រូវចាត់វិធានការចាំបាច់ក្នុងការធានាសុវត្ថិភាពអតីតប្រធានាធិបតីរបស់ខ្លួន៕
