រដ្ឋមន្ត្រីក្រសួងការបរទេសជប៉ុន លោក តូហ្ស៊ីមីតស៊ូ ម៉ូតេជី បានលើកឡើងថា ជប៉ុននឹងផ្ដល់វ៉ាក់សាំងជាង១លាន១សែនដូសបន្ថែមទៀត ទៅឲ្យកោះតៃវ៉ាន់នៅព្រហស្បតិ៍ក្នុងសប្ដាហ៍នេះ បន្ទាប់ពីបានបញ្ជូនទៅឲ្យជាង១លាន២សែនដូសរួចហើយកាលពីខែមុន។ នៅក្នុងសប្ដាហ៍នេះដូចគ្នាដែរ ជប៉ុននឹងផ្ដល់ជូនវ៉ាក់សាំង ម្នាក់១លានដូសទៅឲ្យប្រទេសថៃ ហ្វីលីពីន និងវៀតណាម ខណៈដែលកាលពីខែមុនជប៉ុនក៏បានបញ្ជូនជំនួយវ៉ាក់សាំងនេះ ទៅឲ្យឥណ្ឌូនេស៊ី និងម៉ាឡេស៊ីរួចហើយដែរ។ ដូច្នេះ សរុបទៅ ប្រទេសអាស៊ានចំនួន៥ហើយ ដែលបាននិងកំពុងទទួលបានវ៉ាក់សាំងកូវីដ-១៩ពីប្រទេសជប៉ុន។
នាយករដ្ឋមន្ត្រីកោះតៃវ៉ាន់លោក ស៊ូ សេងចាង បានលើកឡើងនៅលើទំព័រហ្វេសប៊ុករបស់លោកថា «មិត្តពិតប្រាកដ គឺតែងតែបោះដៃជួយនៅពេលពួកគេត្រូវការគ្នាបំផុត»។
អត្ថបទគួរអាន
បច្ចុប្បន្ន មានប្រហែល១០% នៃប្រជាជនសរុបជាង២៣លាននាក់នៅកោះតៃវ៉ាន់ បានទទួលការចាក់វ៉ាក់សាំងយ៉ាងហោចណាស់១ដូស។ អាជ្ញាធរដីកោះមួយនេះ រំពឹងថា នឹងទទួលបានការចាក់សាំងកើនដល់ ២៥% នៃប្រជាជនសរុបនៅត្រឹមចុងខែកក្កដានេះ។
គួររំឭកថា ជប៉ុនបានបញ្ជាទិញវ៉ាក់សាំង AstraZeneca ចំនួន១២០លានដូស ដែលមានការផ្គត់ផ្គង់ច្រើនបំផុតដោយក្រុមហ៊ុនផលិតក្នុងស្រុកនៅជប៉ុន។
ក្រៅតែពីការផ្ដល់ជំនួយវ៉ាក់សាំងដោយផ្ទាល់ទៅឲ្យប្រទេសមួយចំនួន ប្រទេសជប៉ុនក៏បានសន្យានឹងផ្ដល់ថវិកា១ពាន់លានដុល្លារ និងវ៉ាក់សាំង ៣០លានដូស ទៅឲ្យយន្ដការកូវ៉ាក់របស់អង្គការសុខភាពពិភពលោក ដើម្បីផ្គត់ផ្គង់វ៉ាក់សាំងទៅឲ្យប្រទេសកំពុងអភិវឌ្ឍន៍ផងដែរ។
បើតាមរដ្ឋមន្ត្រីក្រសួងការបរទេសជប៉ុន វ៉ាក់សាំង AstraZeneca ដែលផលិតនៅជប៉ុន នៅមិនទាន់ទទួលបានការអនុម័តពីអង្គការសុខភាពពិភពលោកសម្រាប់ការប្រើប្រាស់នៅក្នុងយន្ដការកូវ៉ាក់នៅឡើយទេ។ ដូច្នេះហើយ ទើបជប៉ុនបានជ្រើសយកការឆ្លើយតបលក្ខណៈទ្វេភាគី ដោយផ្ដល់ជូនវ៉ាក់សាំង AstraZeneca នេះ ទៅឲ្យប្រទេសណាដែលមានតម្រូវការវ៉ាក់សាំងបន្ទាន់វិញ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
