ចំណូលទេសចរណ៍ថៃទំនងជាមិនអាចសម្រេចតាមគោលដៅ៤៥ពាន់លានដុល្លារបានទេនៅឆ្នាំនេះ

ប្រធានអាជ្ញាធរទេសចរណ៍ថៃ (TAT) លោកស្រី ថាផានី គៀតផៃបុល (Thapanee Kiatphaibool) បាននិយាយថា ចំនួនភ្ញៀវបរទេសនៅឆ្នាំនេះកើនលើស២៥លាននាក់ គិតត្រឹមថ្ងៃទី៣ ខែធ្នូ។ ទោះជាកើនឡើងយ៉ាងណាក៏ដោយ ប៉ុន្តែប្រាក់ចំណូលបានមកពីការមកដល់របស់ភ្ញៀវបរទេសមានត្រឹមតែជាង៣០ពាន់លានដុល្លារប៉ុណ្ណោះ គិតត្រឹមថ្ងៃទី៣ ខែធ្នូ ជាតួលេខមួយដែលទាបជាងគោលដៅកំណត់របស់រដ្ឋ ដែលកំណត់ចំនួន៤៥ពាន់លានដុល្លារ សម្រាប់រយៈពេលពេញមួយឆ្នាំនេះ។

លោកស្រី ថាផានី បាននិយាយថា ទីភ្នាក់ងារនេះបានប៉ាន់ប្រមាណថា ភ្ញៀវទេសចរបរទេសចំនួន២លាននាក់នឹងចូលមកប្រទេសថៃ នៅក្នុងខែធ្នូ នេះ ដែលពួកគេអាចនឹងចាយប្រាក់ចន្លោះពីជិត៣ពាន់លានទៅជាង៥ពាន់លានដុល្លារ នៅក្នុងរដូវបុណ្យចុងឆ្នាំនេះ រួមទាំងព្រឹត្តិការណ៍រដូវរងាជាច្រើនផងដែរ​។

នៅខែចុងក្រោយនៃឆ្នាំនេះ ការចាយវាយរបស់ភ្ញៀវទេសចរអន្តរជាតិ គួរតែមានចន្លោះពី៣៣ពាន់លានដល់ជិត៣៦ពាន់លានដុល្លារ។
ដំណើរទេសចរណ៍ក្នុងស្រុកបានកើនលើសទីផ្សារអន្តរជាតិ ដោយមានការធ្វើដំណើរចំនួន២២៨លានដងក្នុងឆ្នាំនេះ ពោលគឺបានកើនលើសគោលដៅរបស់រដ្ឋ ចំនួន២២០លានដំណើរ ហើយគិតត្រឹមដំណាច់ឆ្នាំនេះ អ្នកដំណើរក្នុងស្រុកត្រូវបានគេរំពឹងថា នឹងធ្វើដំណើរបានចំនួន២៤០លានដំណើរ ដែលបង្កើតបានចំណូលចំនួនជាង២២ពាន់លានដុល្លារ។

លោកស្រី ថាផានី បាននិយាយថា ប្រជាជនថៃនៅក្រោយជំងឺឆ្លងរាតត្បាតបានធ្វើដំណើរញឹកញាប់ជាងមុន ប៉ុន្តែពួកគេក៏មានការត្បិតត្បៀតថវិកាជាងមុនផងដែរ។ ទីភ្នាក់ងារ TAT កត់សម្គាល់ថា ប្រាក់ចំណូលពីទេសចរណ៍របស់ប្រទេសថៃ នៅឆ្នាំនេះត្រូវបានគេព្យាករថា នឹងឈានដល់ចំនួនជិត៦០ពាន់លានដុល្លារ ដែលទាបជាងគោលដៅកំណត់របស់ខ្លួនដែលមានចំនួនជាង៦៧ពាន់លានដុល្លារ។

លោកស្រី ថាផានី បាននិយាយថា ការចំណាយក្នុងចំណោមភ្ញៀវបរទេសមានចំនួនជាង១ពាន់១រយដុល្លារក្នុងមួយដំណើរដែលវាខ្ពស់ជាងកម្រិតដែលបានកត់ត្រានៅមុនការរាតត្បាតនៃជំងឺកូវីដ ប៉ុន្តែវាទាបជាងការព្យាករថានឹងចំណាយចំនួនជាង១ពាន់៤រយដុល្លារក្នុងមួយដំណើរ។

អ្នកទេសចរផ្លូវឆ្ងាយដូចជាអ្នកមកពីប្រទេសរុស្ស៊ី និងអ៊ីស្រាអែលជាដើមបានចំណាយជាមធ្យមច្រើនជាងទីផ្សារផ្សេងទៀតក្នុងពេលពួកគេស្នាក់នៅក្នុងប្រទេសនេះ។ ចំណែកភ្ញៀវមកពីប្រទេសម៉ាឡេស៊ីដែលគេរំពឹងថានឹងមានចំនួន៤,៥លាននាក់ទៅដល់ប្រទេសថៃនៅឆ្នាំនេះ គឺភាគច្រើនបានកាត់បន្ថយរយៈពេលស្នាក់នៅរបស់ពួកគេក្នុងមួយដំណើរ។

ទន្ទឹមនេះដែរ ចំនួនភ្ញៀវទេសចរចិន ត្រូវបានគេរំពឹងថា នឹងមានចំនួនសរុបចន្លោះពី៣,៤-៣,៥លាននាក់នៅឆ្នាំនេះគឺខុសពីការព្យាកររបស់ទីភ្នាក់ងារ TAT ថានឹងមានចំនួនជាង៤លាននាក់។ លោកស្រី ថាផានី បាននិយាយថា ប្រសិនបើគ្មានការលើកលែងទិដ្ឋាការទេ ស្ថានភាពទេសចរណ៍អាចនឹងអាក្រក់ជាងនេះទៅទៀតដោយសារការធ្វើដំណើរក្នុងស្រុកនៅក្នុងប្រទេសចិន កំពុងរីកចម្រើនជាមួយនឹងតម្លៃថោកជាងការធ្វើដំណើរទៅក្រៅប្រទេសភាគច្រើន៕

អត្ថបទ៖ សុខ ជា