តើកំពូលមហាសេដ្ឋីទាំង៥រូបរបស់ថៃ ប្រចាំឆ្នាំ២០២៤ ជានរណា និងមានទ្រព្យសម្បត្តិប៉ុន្មាន?

កំពូលមហាសេដ្ឋីទាំងនោះរួមមានទី១, លោក ដានីន ជារ៉ាវ៉ាណុន (Dhanin Chearavanont) អាយុ៨៤ឆ្នាំជាប្រធានជាន់ខ្ពស់នៃក្រុមហ៊ុនចំណីសត្វ និងបសុសត្វនៃក្រុមហ៊ុន ចារ៉ឺន ផូកផាន គ្រុប (Charoen Pokphand Group)។ មហាសេដ្ឋីរូបនេះមានទ្រព្យសម្បត្តិសុទ្ធចំនួន១២,៥ពាន់លានដុល្លារ ហើយលោកបានជាប់ចំណាត់ថ្នាក់មហាសេដ្ឋីទី១៥៦នៅក្នុងពិភពលោក។

ទី២, គឺលោក ចារ៉ឺន សិរីវ៉ាថាណាផាកឌី (Charoen Sirivadhanabhakdi) អាយុ៧៩ ជាស្ថាបនិកក្រុមហ៊ុនភេសជ្ជៈថៃ (Thai Beverage) ដែលផលិតស្រាបៀឆាងដ៏ល្បីល្បាញរបស់ប្រទេសថៃ។ មហាសេដ្ឋីរូបនេះមានទ្រព្យសម្បតិ្តសុទ្ធចំនួន១១,៣ពាន់លានដុល្លារ។ ទី៣, លោក សារ៉ាត រ៉ាតាណាវ៉ាឌី (Sarath Ratanavadi) អាយុ៥៨ឆ្នាំ ជានាយកប្រតិបត្តិក្រុមហ៊ុនអភិវឌ្ឍន៍ថាមពលឈូងសមុទ្រ (Gulf Energy Development)។ មហាសេដ្ឋីរូបនេះមានទ្រព្យសម្បត្តិសុទ្ធចំនួន១០,៧ពាន់លានដុល្លារ។

ក្រុមហ៊ុន Gulf Energy មានការបណ្តាក់ទុនរួមគ្នាជាមួយនឹងក្រុមហ៊ុនប្រេង និងឧស្ម័នរបស់រដ្ឋ PTT ដើម្បីសាងសង់ស្ថានីយ និងកំពង់ផែឧស្ម័នធម្មជាតិរាវ (LNG) ក្នុងតម្លៃ១,៣ពាន់លានដុល្លារនៅឆ្នេរសមុទ្រខាងកើតរបស់ប្រទេសថៃ។

ទី៤, លោក ស៊ូម៉េត ជារ៉ាវ៉ាណុន (Sumet Chearavanont) អាយុ៨៩ឆ្នាំ ជាប្រធានប្រតិបត្តិនៃក្រុមហ៊ុន ចារ៉ឺន ផូកផាន គ្រុប (Charoen Pokphand Group)។ មហាសេដ្ឋីរូបនេះមានទ្រព្យសម្បត្តិសុទ្ធចំនួន៥,៥ពាន់លានដុល្លារ។ និងទី៥, លោក ចារ៉ាន ជារ៉ាវ៉ាណុន (Jaran Chearavanont) អាយុ៩៣ឆ្នាំជាស្ថាបនិកនៃក្រុមហ៊ុន ចារ៉ឺន ផូកផាន គ្រុប (Charoen Pokphand Group)។ មហាសេដ្ឋីរូបនេះមានទ្រព្យសម្បត្តិសុទ្ធចំនួន៥,៤ពាន់លានដុល្លារ៕

អត្ថបទ៖ សុខ ជា