ថៃរំពឹងអាចនាំក្រុមហ៊ុនអាមេរិកធំៗ៣ មកដាក់ទុនវិនិយោគរហូតដល់៥ពាន់លានដុល្លារ

ក្រៅពីនោះ ក្រុមហ៊ុនផ្សេងទៀត ដូចជា Citibank, JP Morgan, និង Estee Lauder ក៏ត្រូវបានមន្រ្តីរដ្ឋាភិបាលលើកឡើងដែរថា ក៏កំពុងតែចាប់អារម្មណ៍ថៃផងដែរ។
តាមសេចក្តីរាយការណ៍របស់ រ៉យទ័រ លោក ស្រ៊ីថា ថាវេស៊ីន នាយករដ្ឋមន្រ្តីថៃ បាននិយាយថា ក្រុមហ៊ុន Tesla កំពុងសម្លឹងមើលរោងចក្រផលិតរថយន្តអគ្គីសនី ខណៈក្រុមហ៊ុន Microsoft និង Google កំពុងសម្លឹងមើលការវិនិយោគលើមជ្ឈមណ្ឌលទិន្នន័យនៅក្នុងប្រទេសថៃ។ ពាក់ព័ន្ធនឹងទឹកប្រាក់វិនិយោគដែលមានធំដ៏ច្រើននេះ លោកនាយករដ្ឋមន្រ្តីថៃ មិនលម្អិតទេថា តើទឹកប្រាក់នេះជាការវិនិយោគរួមគ្នា ឬធ្វើឡើងដោយក្រុមហ៊ុននីមួយៗឲ្យច្បាស់លាស់នោះទេ ខណៈដែលក្រុមហ៊ុនទាំងបី គឺ Tesla, Google និង Microsoft មិនបានឆ្លើយតបភ្លាមៗចំពោះសំណើសុំការអត្ថាធិប្បាយជូនអ្នកសារព័ត៌មាន។
ប្រភពដដែលបានលើកឡើងថា លោក ស្រ៊ីថា បាននិយាយបែបនេះទៅកាន់អ្នកសារព័ត៌មាននៅទីក្រុងបាងកក បន្ទាប់ពីបានចូលរួមថ្លែងនៅក្នុងមហាសន្និបាតអង្គការសហប្រជាជាតិនៅទីក្រុងញូវយ៉ក ជាកន្លែងដែលលោកបានជួបពិភាក្សាជាមួយនាយកប្រតិបត្តិក្រុមហ៊ុនទាំងនេះកាលពីដើមសប្តាហ៍មុន។

ប្រសិនបើក្រុមហ៊ុនទាំងបីពិតជាដាក់ទុនវិនិយោគនៅថៃមែននោះ ការវិនិយោគនេះជាកម្លាំងចលករថ្មីៗ ដែលនឹងជួយជំរុញសេដ្ឋកិច្ចរបស់ប្រទេសថៃ ដែលរំពឹងមានកំណើន២,៨% ប៉ុណ្ណោះនៅឆ្នាំនេះ ពោលគឺតិចជាងការព្យាករពីមុន ដោយសារការនាំចេញធ្លាក់ចុះ។
ពាក់ព័ន្ធនឹងព័ត៌មាននេះដែរ លោក ឆ័យ វាត់ចារ៉ុង (Chai Watcharong) អ្នកនាំពាក្យការិយាល័យនាយករដ្ឋមន្ត្រីថៃត្រូវបានត្រូវកាសែត the Nation ស្រង់សម្តីថា ដំណើរទស្សនកិច្ចរបស់លោកនាយករដ្ឋមន្ត្រីទៅកាន់ទីក្រុងញូវយ៉ក ដើម្បីចូលរួមមហាសន្និបាតអង្គការសហប្រជាជាតិបានជោគជ័យក្នុងការជំរុញទំនាក់ទំនង, ការបង្កើនពាណិជ្ជកម្ម និងការវិនិយោគជាមួយប្រទេសដទៃទៀត។
លោកបានអះអាងថា លោកនាយករដ្ឋមន្រ្តីបានជួបជាមួយមេដឹកនាំបរទេស និងសាជីវកម្មធំៗរបស់អាមេរិករួមមាន Tesla, Google, Microsoft, Citibank, JP Morgan, និង Estee Laude ហើយក្រុមហ៊ុនទាំងនេះបានបង្ហាញការចាប់អារម្មណ៍ក្នុងការវិនិយោគបន្ថែមទៀតក្នុងប្រទេសថៃ៕

ដោយៈ សរ សុជាតិ