ភាពរកាំរកូសរវាងសហភាពអឺរ៉ុប និងអាមេរិក គឺបានចាប់ផ្ដើមកើនឡើងខ្លាំងនៅពេលដែលអាមេរិកបានដាក់ចេញនូវច្បាប់កាត់បន្ថយអតិផរណារបស់ខ្លួន ដោយអឺរ៉ុបចាត់ទុកថា ជាការបង្កផលប៉ះពាល់ដល់ក្រុមហ៊ុនរបស់អឺរ៉ុបដែលរកស៊ីនៅអាមេរិក។
ក្រុមមដឹកនាំអឺរ៉បុ បាននិយាយថា ជម្លោះជាមួយទីក្រុងវ៉ាស៊ីនតោនគឺជារឿងចុងក្រោយដែលពួកគេចង់បញ្ចប់ដោយសារសង្គ្រាមកំពុងតែឆាបឆេះនៅមាត់ទ្វាររបស់ខ្លួនក្នុងប្រទេសអ៊ុយក្រែន ហើយដំណោះស្រាយរួមដ៏សំខាន់នោះ គឺការបញ្ឈប់ការឈ្លានពានរបស់រុស្ស៊ី។ ប៉ុន្តែពេលនេះ លុយ គឺជាការគំរាមកំហែងដល់ការរួបរួមរបស់អឺរ៉ុប។ នេះបើតាមការចុះផ្សាយដោយសារព័ត៌មាន AP។
អនុប្រធានគណៈកម្មការអឺរ៉ុបលោកស្រី ម៉ាហ្ក្រេត វេស្តេហ្ក័រ (Margrethe Vestager) បានប្រាប់សមាជិកសភាកាលពីថ្ងៃពុធ ទី១៤ ធ្នូ នេះថា៖ «យើងមានសង្គ្រាមនៅអឺរ៉ុបរួមទៅហើយ អ្វីដែលយើងមិនចង់បានទៀតនោះ គឺសង្គ្រាមពាណិជ្ជកម្ម»។
មែនទែនទៅ មេដឹកនាំនៃប្លុកអឺរ៉ុបទាំង២៧ប្រទេសកំពុងជជែកពិភាក្សាគ្នាអំពីគោលនយោបាយដែលមិនស្មើភាព និងអយុត្តិធម៌របស់សហរដ្ឋអាមេរិក ដែលពួកគេមើលឃើញថា ទីក្រុងវ៉ាស៊ីនតោនហាក់កំពុងទាត់ចោលសម្ព័ន្ធមិត្តដ៏យូរអង្វែង និងគួរឱ្យទុកចិត្តគឺអឺរ៉ុប ចេញពីទីផ្សាររបស់សហរដ្ឋអាមេរិក។
អ្វីដែលសហភាពអឺរ៉ុបមានការតឹងសរសៃកនោះ គឺច្បាប់កាត់បន្ថយអតិផរណារបស់សហរដ្ឋអាមេរិក ដែលវាជាផែនការក្នុងទំហំទឹកប្រាក់ ៣៦៩ ពាន់ដុល្លារ ដែលអាមេរិកត្រៀមក្នុងការគាំទ្រ និងទ្រទ្រង់ដល់ក្រុមហ៊ុនផលិតរបស់ខ្លួននៅក្នុងស្រុក តាមរយៈការឧបត្ថម្ភធន ហើយសហភាពអឺរ៉ុបបានចាត់ទុកថា វាគឺការរើសអើងដោយអយុត្តិធម៌ចំពោះក្រុមហ៊ុនរបស់ពួកគេ ដែលមិនមានផលិតកម្មនៅអាមេរិក។
អត្ថបទគួរអាន
ទំនាក់ទំនងនៃភាពជាដៃគូដ៏ជិតស្និទ្ធរវាងសហរដ្ឋអាមេរិក និងបណ្តាប្រទេសនៅអឺរ៉ុប គឺពួកគេមានមោទនភាពជាយូរយារណាស់មកហើយលើការធ្វើពាណិជ្ជកម្មសេរី ដោយមិនមានការឧបត្ថម្ភធនលើសលប់ និងច្បាប់គាំពារនិយម។ ផ្ទុយស្រឡះ ច្បាប់អាមេរិកថ្មីនេះ បានធ្វើឱ្យទីក្រុងព្រុចសែលហាក់មានអារម្មណ៍ថា ទីក្រុងវ៉ាស៊ីនតោនកំពុងក្បត់ស្មារតីនៃការប្រកួតប្រជែងដោយយុត្តិធម៌។
ប្រធានគណៈកម្មការអឺរ៉ុបលោកស្រី Ursula von der Leyen បានសរសេរទៅកាន់មេដឹកនាំសហភាពអឺរ៉ុបនៅមុនកិច្ចប្រជុំកំពូលចុងឆ្នាំរបស់ពួកគេថា «ធាតុផ្សំនៃច្បាប់កាត់បន្ថយអតិផរណារបស់សហរដ្ឋអាមេរិក (IRA) គឺប្រថុយប្រថាននឹងធ្វើឱ្យកើតមានទីលានប្រកួតប្រជែង រើសអើងប្រឆាំងនឹងក្រុមហ៊ុនអឺរ៉ុប»។
គួរជម្រាបថា ជម្លោះពាណិជ្ជកម្មគឺជាបន្ទាត់ក្រហមអស់ជាច្រើនទសវត្សរ៍នៅក្នុងទំនាក់ទំនងអាមេរិក-អឺរ៉ុបដែលត្រូវបានគូសបញ្ជាក់ដោយការប្រកួតប្រជែងជុំវិញការឧបត្ថម្ភធនលើឧស្សាហកម្មយន្តហោះ និងការនាំចេញដែកថែប និងប៉ះពាល់ដល់អ្វីគ្រប់យ៉ាងរាប់តាំងពីផលិតសាច់គោចាក់អរម៉ូន រហូតដល់ការនាំចេញស្រាជាដើម។
ក្រៅពីថ្លែងទៅកាន់មេដឹកនាំនៃរដ្ឋជាសមាជិក លោកស្រី វ៉ុន ឌឺឡឺយេន ក៏បានធ្វើដំណើរទៅសភាសហភាពអឺរ៉ុបកាលពីថ្ងៃពុធ ដើម្បីបញ្ចេញការត្អូញត្អែររបស់ខ្លួនផងដែរ ដោយលោកស្រីបានលើកឡើងទិដ្ឋភាពបីគួរឱ្យព្រួយបារម្ភយ៉ាងខ្លាំង ជុំវិញច្បាប់កាត់បន្ថយអតិផរណារបស់អាមេរិកនេះ។ ទីមួយ គឺវានឹងធ្វើឲ្យអ្នកប្រើប្រាស់និយមទិញតែផលិតផលអាមេរិក ដែលមានការគាំទ្រដ៏ធំនៅពីក្រោយដោយច្បាប់កាត់បន្ថយអតិផរណា (IRA)នេះ។ ទី២ គឺការបន្ធូរបន្ថយពន្ធ ដែលអាចឈានដល់ការរើសអើងសម្រាប់ក្រុមហ៊ុនបរទេស នៅក្រៅសហរដ្ឋអាមេរិក។ និងទីបី ការឧបត្ថម្ភធនផលិតកម្មរបស់អាមេរិក ដែលអាចធ្វើឲ្យក្រុមហ៊ុនអឺរ៉ុបខូចខាត បាត់បង់នូវភាពប្រកួតប្រជែង ដូចនេះយើងត្រូវដោះស្រាយបញ្ហាទាំងនេះ»។
ទោះបីជាយ៉ាងណា លោក Biden បានទទួលស្គាល់ «កំហុស» នៅក្នុងច្បាប់នេះ ហើយបាននិយាយកាលពីដើមខែនេះ នៅចំពោះមុខប្រធានាធិបតីបារាំងលោក Emmanuel Macron ថា «វាអាចមានការកែប្រែដែលអាចធ្វើទៅបាន» ដើម្បីបំពេញចិត្តសម្ព័ន្ធមិត្តអឺរ៉ុប។ ប៉ុន្តែសមាជិកសភាប្រជាធិបតេយ្យម្នាក់ដែលជាតាក់តែងសំខាន់នៃច្បាប់កាត់បន្ថយអតិផរណានេះបាននិយាយថា លោកគ្មានចេតនាបើកកកាយវាឡើងវិញទេ៕
