អាមេរិកសង្ឃឹមថាក្របខណ្ឌសេដ្ឋកិច្ចឥណ្ឌូប៉ាស៊ីហ្វិកដែលខ្លួនផ្ដួចផ្ដើម នឹងមានវឌ្ឍនភាពច្រើននៅឆ្នាំ២០២៣

IPEF ដែលរួមមានប្រទេសសមាជិកចំនួន១៤ ត្រូវបានបង្កើតឡើងដោយប្រធានាធិបតីអាមេរិក លោក ចូ បៃឌិន កាលពីខែឧសភាកន្លងទៅ ហើយកិច្ចចរចាកម្រិតការងារ បានចាប់ផ្តើមធ្វើឡើងកាលពីចុងឆ្នាំ២០២២។ លោកស្រី Sarah Bianchi លើកឡើងថា បច្ចុប្បន្នអាមេរិកកំពុងធ្វើការជាមួយដៃគូ IPEF របស់ខ្លួន ដើម្បីចរចានូវកាលវិភាគការងារសម្រាប់ឆ្នាំ២០២៣នេះ ដោយកំពុងព្យាយាមធ្វើឱ្យបានកាន់តែលឿន តាមដែលអាចធ្វើបាន។

ទោះបី IPEF នឹងបានបញ្ជាក់ពីការលុបបំបាត់ ឬកាត់បន្ថយរនាំងពន្ធគយក៏ពិតមែន ប៉ុន្តែក្របខណ្ឌសេដ្ឋកិច្ចនេះ នឹងផ្តោតទៅលើការបង្កើតវិធានសម្រាប់សេដ្ឋកិច្ចឌីជីថលដែលបាននិងកំពុងវិវត្តយ៉ាងឆាប់រហ័ស និងកិច្ចសហប្រតិបត្តិការទៅលើខ្សែចង្វាក់ផ្គត់ផ្គង់សម្រាប់ផលិតផល ដូចជា បន្ទះឈីបជាដើម។

ក្នុងកិច្ចសម្ភាសន៍ជាមួយសារព័ត៌មានជប៉ុន Nikkei លោកស្រី Sarah Bianchi បានសង្កត់ធ្ងន់ពីសារៈសំខាន់នៃពាណិជ្ជកម្មបែបឌីជីថល។ ពាណិជ្ជកម្មជាច្រើននៅក្នុងសតវត្សទី២១នេះ គឺធ្វើតាមរយៈគំរូឌីជីថល។ ដូច្នេះ លោកស្រីចង់ឱ្យមានភាពប្រាកដប្រជានូវប្រព័ន្ធឌីជីថលមួយដែលសេរី និងបើកចំហរ ដែលល្អសម្រាប់អ្នកប្រើប្រាស់ និងល្អសម្រាប់អាជីវកម្មតូចៗ ដែលព្យាយាមនាំចេញផលិតផលរបស់ពួកគេ។

យោងតាមតំណាងពាណិជ្ជកម្មអាមេរិក ភាគីចរចាដែលមកពីប្រទេសចូលរួម បានចាប់ផ្តើមពិភាក្សាលើកិច្ចការពារអ្នកប្រើប្រាស់ និងការរក្សាសុវត្ថិភាពទិន្នន័យផ្ទាល់ខ្លួន នៅក្នុងប្រតិបត្តិការអនឡាញ ជំរុញសមត្ថភាព AI ដែលអាចជឿជាក់បាន និងវិធានសន្តិសុខអ៊ីនធឺណែត។

គួរឱ្យដឹងថា ចិនបាននិងកំពុងបង្កើនវត្តមានរបស់ខ្លួននៅក្នុងវិធានការឌីជីថលក្នុងតំបន់អាស៊ីប៉ាស៊ីហ្វិក។ កាលពីឆ្នាំមុន ចិនបានចាប់ផ្តើមចរចាដើម្បីចូលរួមកិច្ចព្រមព្រៀងភាពជាដៃគូសេដ្ឋកិច្ចឌីជីថល។ ហើយកាលពីខែកញ្ញា ឆ្នាំ២០២១ ចិនបានស្នើសុំចូលរួមកិច្ចព្រមព្រៀងគ្រប់ជ្រុងជ្រោយ និងវឌ្ឍនភាព សម្រាប់ភាពជាដៃគូអន្តរប៉ាស៊ីហ្វិក (CPTPP)ផងដែរ៕