បើទោះបីជា របាយការណ៍ពីអគ្គនាយកដ្ឋានគយ និងរដ្ឋាករកម្ពុជា បានបង្ហាញពីតម្លៃនៃការនាំចេញជ័រកៅស៊ូ និងផលិតផលធ្វើពីកៅស៊ូការកើនជាង ២០% នៅ១០ខែឆ្នាំ២០២២នេះក្ដី ប៉ុន្ដែ អ្នកជំនាញបានអះអាងថា តម្លៃលក់ជ័រកៅស៊ូនៅមួយរយៈចុងក្រោយនេះ បានធ្លាក់ចុះគួរឲ្យកត់សម្គាល់។
លោក ម៉ែន សុភក្រ្ត ប្រធានសមាគមអភិវឌ្ឍកៅស៊ូកម្ពុជា បានគូសបញ្ជាក់ថា នៅក្នុងត្រីមាសចុងក្រោយនេះ ទីផ្សារនាំចេញកៅស៊ូរបស់កម្ពុជាហាក់មានភាពស្ងប់ស្ងាត់បន្តិច ដោយសារតែតម្លៃលក់ជ័រកៅស៊ូមានការធ្លាក់ចុះ ដោយក្នុងនោះជាមធ្យម គឺអាចលក់ចេញបានក្នុងតម្លៃចន្លោះពី ១ពាន់៣រយដុល្លារ ទៅ ១ពាន់៤រយដុល្លារក្នុងមួយតោនប៉ុណ្ណោះ។ លោក ម៉ែន សុភក្រ្ត ក៏បានគូសបញ្ជាក់ដែរថា បច្ចុប្បន្នស្ថានភាពពិភពលោកនៅមិនទាន់មានភាពច្បាស់លាស់នៅឡើយ ដោយសារតែមានសង្រ្គាម ក៏ដូចជាវិបត្តិសេដ្ឋកិច្ចនៅបណ្តាប្រទេសធំៗផងនោះ ប្រាកដណាស់វាបានផ្តល់ផលប៉ះពាល់ទៅដល់តម្លៃ និងការនាំចេញកៅស៊ូរបស់កម្ពុជា ដោយលោកបានអះអាងថា លោកមិនរំពឹងខ្ពស់នោះទេ នៅឆ្នាំ ២០២៣ ខាងមុខ តម្លៃលក់ជ័រកៅស៊ូរបស់កម្ពុជាអាចនឹងមានភាពល្អប្រសើរឡើងវិញ។
ជាមួយគ្នានេះ បើតាមឯកឧត្តម ហ៊ឹម អូន ប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានកៅស៊ូ ក៏ធ្លាប់បានបញ្ជាក់កាលពីពេលថ្មីៗនេះដែរថា តម្លៃនៃការនាំចេញកៅស៊ូនៅរយៈពេលចុងក្រោយនេះ ហាក់មានការថយចុះជាងឆ្នាំមុន ដោយឯកឧត្តមបានបញ្ជាក់ថា ដោយសារកត្តាមួយចំនួនបណ្តាលមកពីវិបត្តិសេដ្ឋកិច្ចសកល ការប្រែប្រួលតម្លៃថាមពល អតុល្យភាពរវាងការផ្គត់ផ្គង់ និងតម្រូវការ និងការប្រែប្រួលរូបិយបណ្ណធៀបនឹងប្រាក់ដុល្លាអាមេរិកជាដើម។
អត្ថបទគួរអាន
គួរជម្រាបដែរថា កាលពីថ្ងៃទី៤ ខែខែវិច្ចិកា ឆ្នាំ២០២២នេះ រាជរដ្ឋាភិបាលកម្ពុជាបានចេញសារាចរស្តីពី និរាករណ៍ សារាចរណែនាំរបស់រាជរដ្ឋាភិបាល ស្តីពីវិធានការទប់ស្កាត់ការនាំចេញជ័រកៅស៊ូនិងឈើកៅស៊ូមិនទាន់កែច្នៃទៅបរទេស ក្រោយពិនិត្យឃើញថា សារាចរណែនាំនោះ លែងឆ្លើយតបទៅនឹងស្ថានភាពវិស័យកៅស៊ូបច្ចុប្បន្ន និងក្នុងគោលបំណងសម្រួលដល់កសិករដែលដាំកៅស៊ូជាលក្ខណៈគ្រួសារអាចមានជម្រើស និងទទួលបានប្រាក់ចំណេញខ្ពស់។
បើតាម លោក ម៉ែន សុភក្រ្ត នៅពេលដែលមានការនិរាករណ៍លើសារាចរណែនាំ ស្តីពីវិធានការទប់ស្កាត់ការនាំចេញជ័រកៅស៊ូនិងឈើកៅស៊ូមិនទាន់កែច្នៃទៅបរទេសបែបនេះ វានឹងបានផ្តល់ប្រយោជន៍ច្រើនដល់ម្ចាស់ចម្ការកៅស៊ូជាលក្ខណៈគ្រួសារផ្ទាល់តែម្តង ដោយពួកគាត់អាចមានជម្រើសច្រើនក្នុងការលក់ជ័រកៅស៊ូនិងឈើកៅស៊ូមិនទាន់កែច្នៃរបស់ពួកគាត់ ទាំងលក់នៅទីផ្សារក្នុងស្រុក ក៏ដូចជាតាមព្រំដែន ឬក្រៅប្រទេស ហើយថែមទាំងអាចទទួលបានតម្លៃខ្ពស់ថែមទៀតផងដែរ។ តែទោះជាយ៉ាងណា អ្នកជំនាញកសិកម្មរូបនេះ អះអាងថា សម្រាប់ការនាំចេញជ័រកៅស៊ូ និងផលិតផលធ្វើពីកៅស៊ូ ហាក់មិនមានអ្វីប្រែប្រួលនោះទេ ពោលគឺ បើទោះបីជាធ្វើការនាំចេញជ័រកៅស៊ូមិនទាន់កែច្នៃ ឬ ផលិតផលកៅស៊ូកែច្នៃរួចហើយ ក៏បរិមាណមិនមានអ្វីប្រែប្រួលដែរ គឺការនាំចេញវាអាស្រ័យលើទិន្នផលដែលទទួលបានប៉ុណ្ណោះ។
អ្នកជំនាញសេដ្ឋកិច្ចផ្នែកកសិកម្ម លោក ច័ន្ទ សុផល ធ្លាប់បានគូសបញ្ជាក់ដែរថា ស្របពេលដែល តម្រូវការផលិតកម្មកសិកម្មដូចជាស្បៀងអាហារមានការកើនឡើង ផលិតផលកៅស៊ូក៏កំពុងប្រឈមនឹងការធ្លាក់ចុះ ដោយសារតែតម្រូវការសាកលថមថយ ព្រោះតែបញ្ហាអតិផរណាកើនខ្ពស់។
សូមជម្រាបថា ទីផ្សារសំខាន់ៗ ក្នុងការនាំចេញកៅស៊ូរបស់កម្ពុជា មានដូចជា វៀតណាម ម៉ាឡេស៊ី ចិន សិង្ហបុរី ជប៉ុន កូរ៉េ និងសហគមអឺរ៉ុបជាដើម៕
