លោក ស៊ូរ៉ាវាត អាការ៉ាវូរ៉ាម៉ាត (Surawat Akaraworamat ) អនុប្រធានក្រុមប្រឹក្សាទេសចរណ៍ថៃបានត្រូវដកស្រង់សំដីដោយសារព័ត៌មាន បាងកកប៉ុស្តិ៍ថា ភ្នាក់ងារទេសចរណ៍នៅក្នុងស្រុកបានរាយការណ៍ថា អត្រានៃការកក់របស់អ្នកទេសចរជនជាតិចិនមកលេងនៅថៃនៅពេលនេះ ហាក់ធ្លាក់ចុះខុសពីធម្មតាសម្រាប់ថ្ងៃបុណ្យប្រពៃណីចិន ដែលជាថ្ងៃឈប់សម្រាកដ៏យូរបំផុតមួយនៅក្នុងប្រទេស ដែលមានប្រជាជនច្រើនបំផុតនេះ។
លោក ស៊ូរ៉ាវាត បាននិយាយថា ការធ្លាក់ចុះនេះ ត្រូវបានគេសន្និដ្ឋានថា បណ្តាលមកពីការស្ទុះងើបឡើងវិញនៃសេដ្ឋកិច្ចយឺត ដែលកំពុងធ្វើឲ្យប៉ះពាល់ដល់ការចំណាយខណៈអត្រាអតិផរណានៅចិនក៏កំពុងកើនឡើង។
សញ្ញាអវិជ្ជមាននេះក៏ជាសារមួយដែលបង្ហាញអំពីផលប៉ះពាល់ជាអវិជ្ជមានដល់វិស័យអចលនទ្រព្យនៅក្នុងប្រទេសថៃផងដែរ ខណៈដែលរដ្ឋាភិបាលចិនកំពុងលើកកម្ពស់វិស័យទេសចរណ៍ក្នុងស្រុក ដើម្បីជំរុញការប្រើប្រាស់ក្នុងស្រុក យកមកគាំទ្រដល់ដំណើរការនិរន្តភាពសេដ្ឋកិច្ច។
ក្រៅពីបញ្ហាសេដ្ឋកិច្ចនៅចិនហើយនោះ ការធ្លាក់ចុះនេះក៏វាអាចទាក់ទងនឹងដំណើរការដាក់ពាក្យសុំទិដ្ឋាការទេសចរណ៍ផងដែរ ប៉ុន្តែលោក ស៊ូរ៉ាវាត បាននិយាយថា លោកជឿថា នេះមិនមែនជាកត្តាសំខាន់ចម្បងនោះទេ វាគ្រាន់តែជាកត្តារួមផ្សំប៉ុណ្ណោះ។
លោកបាននិយាយថា ដំណើរការត្រូវបានបន្ធូរបន្ថយ ខណៈដែលនាយកដ្ឋានកិច្ចការកុងស៊ុលបានប្តេជ្ញាថា នឹងធ្វើឱ្យប្រសើរឡើងនូវប្រព័ន្ធអនុម័តទិដ្ឋាការរបស់ខ្លួន ក្រៅពីនោះ ទេសចរចិនជាច្រើនក៏អាចជ្រើសរើសទិដ្ឋាការពេលមកដល់ជាវិធីសាស្ត្រជំនួសផងដែរ។
ដើម្បីរក្សាភាពនាំមុខនៃវិស័យទេសចរណ៍នៅក្នុងតំបន់របស់ខ្លួន នៅពេលនេះ ថៃកំពុងតែ ជំរុញនិងលើកកំពស់កញ្ចប់ទេសចរណ៍ ដែលគេហៅថា MICE ដែលមកពីពាក្យពេញថា Meeting, Incentive, Conference, and Exhibitions ដែលភាសារខ្មែរយើងថា ជាសេវាកម្មទេសចរណ៍ពាក់ព័ន្ធនឹងកញ្ចប់ទេសចរណ៍រៀបចំកិច្ចប្រជុំ កញ្ចប់ទេសចរណ៍បែបលើកទឹកចិត្ត កញ្ចប់ទេសចរណ៍ទាក់ទងនឹងសន្និសីទ និងទេសចរណ៍ពិព័រណ៍ ។
លោកស្រី ប្រាឈូម ថានធិប្រាសឺតស៊ុក ( Prachoom Tantiprasertsuk) ប្រធានផ្នែកទីផ្សារនៃសមាគមសណ្ឋាគារថៃបាននិយាយថា ស្ថិតិនៃការកក់សណ្ឋាគារនៅភូកេតពីសំណាក់អ្នកទេសចរជនជាតិចិនមានការធ្លាក់ចុះ ប៉ុន្តែទោះបីជាយ៉ាងណាពួកគេកំពុងកក់ជាបណ្តើរៗជាពិសេស ក្នុងអំឡុងសប្តាហ៍មាស។
លោកស្រីបានអះអាងថា ទោះបីភ្ញៀវពីចិនហាក់ថយចុះ ប៉ុន្តែ ដោយសារជើងហោះហើរត្រូវបានបង្កើន កំណើនសេដ្ឋកិច្ចមានសញ្ញាងើបខ្លះ ភូកេតអាចរំពឹងថា នឹងនៅតែអាចទាក់ទាញភ្ញៀវទេសចរបរទេសបាន ដោយរួមទាំងអឺរ៉ុប និងរុស្ស៊ី។
នៅពេលនេះគេព្យាករថា ប្រទេសថៃនៅតែអាចទាក់ទាញភ្ញៀវទេសចរចិននៅក្នុងចំនួនប្រមាណជា ៥សែននាក់ ក្នុងមួយខែដែរនៅក្នុងអំឡុងក្នុងត្រីមាសទី ៤នៃឆ្នាំ២០២៣ ខណៈដែលកាលពីឆ្នាំ២០១៩ នៅក្នុងមួយខែ ថៃអាចទាក់ទាញភ្ញៀវទេសចរពីចិនសរុប ជាង ១ លាននាក់ ។
