ប្រាក់ដុល្លារអាម៉េរិកធ្លាក់ថ្លៃខ្លាំងនៅថ្ងៃសុក្រនេះ មុនការចេញផ្សាយទិន្នន័យអតិផរណា

បើយោងតាមការចុះផ្សាយរបស់សារព័ត៌មានសិង្ហបុរី CNA ប្រាក់ដុល្លារអាម៉េរិក បានធ្លាក់ថ្លៃខ្លាំងមិនធ្លាប់មានក្នុងរយៈពេល៥ខែ​ បើធៀបនឹងប្រាក់ដុល្លាររបស់ប្រទេសនូវែលសេឡង់ និងទាបខ្លាំងមិនធ្លាប់មានក្នុងរយៈពេល៣សប្ដាហ៍មកនេះបើធៀបនឹងប្រាក់អឺរ៉ូ របស់សហភាពអឺរ៉ុប នៅក្នុងការជួញដូរនៅតំបន់អាស៊ី បន្ទាប់ពីក្រុមវិនិយោគិននៅទីក្រុងញូយ៉កសម្រុកលក់ចេញភាគហ៊ុនអាម៉េរិកក្នុងតម្លៃទាប ក្រោយមានការព្រួយបារម្ភពីការធ្លាក់ចុះតម្លៃភាគហ៊ុនកាលពីថ្ងៃពុធកន្លងទៅ។

គីវី (Kiwi) ដែលជាប្រាក់ដុល្លាររបស់ប្រទេសនូវែលសេឡង់ បានហក់ឡើងថ្លៃ០,០៣% បើធៀបនឹងដុល្លារអាម៉េរិក ខណៈប្រាក់អឺរ៉ូ បានហក់ឡើងថ្លៃដល់១,១០ដុល្លារអាម៉េរិកក្នុង១អឺរ៉ូ។ ទន្ទឹមនឹងនេះ ប្រាក់ដុល្លារអូស្រ្តាលី បានធ្លាក់ថ្លៃ០,០៩% មកនៅត្រឹម០,៦៨ដុល្លារអាម៉េរិក ក្នុង១ដុល្លារអូស្ត្រាលី ខណៈលុយស្ទើលីង (Sterling) ដែលជារូបិយប័ណ្ណផ្លូវការរបស់ប្រទេសអង់គ្លេស បានប្រែប្រួលតិចតួចក្នុងរង្វង់១,២៧ដុល្លារអាម៉េរិក ក្នុង១Sterling។

នៅតំបន់អាស៊ី ប្រាក់យ៉េន របស់ប្រទេសជប៉ុន ស្ថិតក្នុងរង្វង់១៤២យ៉េនទល់នឹង១ដុល្លារអាម៉េរិក ខណៈទិន្នន័យនៅថ្ងៃសុក្រនេះ បានបង្ហាញថា ថ្លៃទំនិញប្រើប្រាស់បានកើនឡើង២,៥%កាលពីខែវិច្ឆិកា បើធៀបនឹងឆ្នាំមុន៕

ដោយ: តែម សុខុម