ទន្ទឹមនឹងរំពឹងថា ស្ត្រីអាចទទួលបានសេវាហិរញ្ញវត្ថុផ្លូវការងាយស្រួលជាងមុន ថ្នាក់ដឹកនាំសមាគមសហគ្រិនស្ត្រី ក៏បានស្នើឲ្យគ្រឹះហិរញ្ញវត្ថុទាំងអស់មានការបន្ធូរបន្ថយលក្ខខណ្ឌក្នុងការផ្តល់កម្ចី ពិសេសពាក់ព័ន្ធទ្រព្យធានាផងដែរ។
លោកជំទាវ កែវ មុំ ប្រធានសមាគមសហគ្រិនស្ត្រីកម្ពុជា បានលើកឡើងពីបញ្ហាប្រឈមដែលស្ត្រីជួបប្រទះក្នុងការប្រកបអាជីវកម្មនាពេលកន្លងមក។ តាមការសិក្សាស្រាវជ្រាវរបស់សមាគមសហគ្រិនស្ត្រីកម្ពុជាបញ្ហាប្រឈមធំបំផុតសម្រាប់សហគ្រិនជាស្ត្រី គឺការមិនទទួលបានសេវាហិរញ្ញវត្ថុពីគ្រឹះស្ថានធនាគារ និងមីក្រូហិរញ្ញវត្ថុ សម្រាប់ប្រើប្រាស់ក្នុងការស្តារ បើក និងពង្រីកអាជីវកម្ម។ ទោះបីកន្លងមកទាំងរាជរដ្ឋាភិបាល និងវិស័យឯកជនបានដាក់ចេញនូវគោលនយោបាយជួយសម្របសម្រួល ដើម្បីបង្កើនលទ្ធភាពទទួលបានហិរញ្ញប្បទានដល់វិស័យ SMEs និងសហគ្រិនជាស្ត្រី ក៏ដោយ តែស្ត្រីនៅតែជួបបញ្ហាក្នុងការទទួលបានដើមទុនពីគ្រឹះស្ថានហិរញ្ញវត្ថុដដែល។
ប្រធានសមាគមរូបនេះ អះអាងថា កត្តាដែលធ្វើឲ្យស្ត្រីជួបការលំបាកក្នុងការទទួលបានហិរញ្ញប្បទានពីគ្រឹះស្ថានហិរញ្ញវត្ថុ គឺដោយសារសហគ្រិនជាស្ត្រីមួយចំនួនខ្វះការយល់ដឹងក្នុងការរៀបចំ និងគ្រប់គ្រងហិរញ្ញវត្ថុ និងការរៀបចំផែនការអាជីវកម្ម គួបផ្សំនឹងស្មុគស្មាញក្នុងការផ្តល់កម្ចីរបស់គ្រឹះស្ថានហិរញ្ញវត្ថុ។ តែយ៉ាងណា លោកជំទាវ កែវ មុំ រំពឹងថា សហគ្រិនជាស្ត្រីនឹងអាចមានលទ្ធភាពខ្ពស់ក្នុងការទទួលបានឥណទានសម្រាប់យកមកស្តារ បើក និងពង្រីកអាជីវកម្មនាពេលអនាគត។
ទន្ទឹមនឹងនេះ លោកជំទាវ កែវ មុំ ប្រធានក្រុមប្រឹក្សាភិបាលក្រុមហ៊ុនផលិតនំស្រួយ លីលី ស្នើឲ្យគ្រឹះស្ថានធនាគារ និងមីក្រូហិរញ្ញវត្ថុបន្ធូរបន្ថយលក្ខខណ្ឌក្នុងការផ្តល់កម្ចីដល់វិស័យសហគ្រាសធុនតូច និងមធ្យម ជាពិសេសអាជីវកម្មដែលគ្រប់គ្រងដោយស្ត្រី។ បន្ថែមលើនេះ លោកជំទាវ ក៏បានស្នើឲ្យគ្រឹះស្ថានហរិញ្ញវត្ថុទទួលយកទ្រព្យធានាជារបស់របរ ដែលក្រៅពីផ្ទះ និងដីធ្លីក្នុងការផ្តល់កម្ចីរបស់ខ្លួនផងដែរ។ ការស្នើនេះ គឺដើម្បីធ្វើយ៉ាងណាឲ្យអ្នកប្រកបរបរក្នុងវិស័យ SMEs ពិសេសសហគ្រិនជាស្ត្រីមានលទ្ធភាពខ្ពស់ក្នុងការទទួលបានដើមទុន ដើម្បីដំណើរការអាជីវកម្មរបស់ពួកគេ។
ពាក់ព័ន្ធបញ្ហានេះដែរ លោកជំទាវ ជា សិរី
ឧបការីទេសាភិបាល
និងជាអគ្គនាយិកាបច្ចេកទេសធនាគារជាតិនៃកម្ពុជាកាលពីពេលថ្មីៗបានជំរុញឲ្យគ្រឹះស្ថានធនាគារ
និងមីក្រូហិរញ្ញបង្កើនការយកចិត្តទុកដាក់ក្នុងការផ្តល់សេវាហិរញ្ញវត្ថុដល់វិស័យសហគ្រាសធុនមីក្រូ
តូច និងមធ្យម និងសហគ្រិនជាស្ត្រី។ ជាមួយគ្នានេះ លោកជំទាវ
ស្នើឲ្យគ្រឹះស្ថានហិរញ្ញវត្ថុទាំងអស់ពិចារណាលើលទ្ធភាព ជាជាងទ្រព្យធានា
ពេលផ្តល់កម្ចីដល់វិស័យ SMEs និងសហគ្រិនស្ត្រី។ ការជំរុញ និងស្នើទាំងនេះ
ធ្វើឡើងក្នុងគោលបំណងដើម្បីបង្កើនលទ្ធភាពទទូលបានឥណទានសម្រាប់វិស័យទាំងនេះ។
