ការព្រមានរបស់អ្នកជំនាញ ធ្លាក់មកស្របពេលដែលទីក្រុងវ៉ាស៊ីនតោនកំពុងដំឡើងសម្លេងលើទីក្រុងប៉េកាំង កុំឲ្យគាំទ្រផ្នែកយោធា និងសេដ្ឋកិច្ចសម្រាប់ការឈ្លានពានរបស់រុស្ស៊ីលើអ៊ុយក្រែន។ នេះបើតាមSouth China Morning Post.
អ្នកជំនាញនយោបាយអន្តរជាតិបានព្រមានថា បញ្ហាដំបូងដែលអាមេរិក នឹងជួបប្រទះបើហ៊ានតែដាក់ទណ្ឌកម្មទៅលើចិន ទាក់ទិនសង្គ្រាមរុស្ស៊ី-អ៊ុយក្រែននោះ គឺ ទាក់ទងនឹងវិស័យសន្តិសុខថាមពលតែម្ដង។ គេត្រូវដឹងថា ចិនអស់ពេលជាច្រើនឆ្នាំមកហើយ បានក្លាយជាប្រទេសនាំចូលប្រេងធំជាងគេរបស់ពិភពលោក ដោយសារតែតម្រូវការដ៏ច្រើនសន្ធឹកសន្ធាប់នៅក្នុងស្រុក។ ក្នុងន័យនេះ បើអាមេរិកហ៊ានតែដាក់ទណ្ឌកម្មលើចិន នោះចិននឹងងាករករុស្ស៊ីកាន់តែខ្លាំង ពិសេសការស្វែងការនាំចូលប្រេងដោយត្រង់ពីរុស្ស៊ីតែម្តង ស្របពេលដែលលោកខាងលិចកំពុងដាក់ទណ្ឌកម្មឈប់ទិញប្រេងពីរុស្ស៊ី។
ជំនួសឲ្យការដាក់ទណ្ឌកម្មទៅលើទីក្រុងប៉េកាំង អ្នកជំនាញបានផ្តល់អនុសាសន៍ឱ្យស្វែងរកវិធីមួយដើម្បី ចូលរួមជាមួយប្រទេសចិនក្នុងន័យស្ថាបនាលើវិបត្តិសង្គ្រាមរុស្ស៊ីនឹងអ៊ុយក្រែន នោះវាមិនអាចគំរាមកំហែងដល់សន្តិសុខថាមពលរបស់អាមេរិកបន្ថែមទៀតឡើយ ស្របពេលដែលវាកំពុងមានអស្ថិរភាពស្រាប់។
អ្នកជំនាញបន្តផ្តល់អនុសាសន៍ថា អាមេរិកគួរអនុវត្តគោលនយោបាយឆ្លាតវៃ ដោយព្យាយាមទាញប្រទេសចិន ឲ្យចូលរួមជាមួយខ្លួនក្នុងការដោះស្រាយជម្លោះដោយសន្តិវិធី ជាជាងជំរុញឱ្យប្រទេសទាំងពីរមានភាពជិតស្និទ្ធជាមួយគ្នាកាន់តែខ្លាំង។
អត្ថបទគួរអាន
គួរជម្រាបថា ទាំងអនុសាសន៍ និងការព្រមានពីអ្នកជំនាញ បានធ្លាក់មកស្របពេលដែល រដ្ឋមន្ត្រីការបរទេសអាមេរិក លោក Antony Blinken បាននិយាយកាលពីថ្ងៃព្រហស្បតិ៍ថា លោកប្រធានាធិបតី Joe Biden គ្រោងនឹងធ្វើការព្រមានទៅលើប្រធានាធិបតីចិន ស៊ី ជីនពីង ថាសហរដ្ឋអាមេរិកនឹងដាក់ទណ្ឌកម្មច្បាស់លាស់លើប្រទេសចិន ប្រសិនបើប៉េកាំងពិតជាហ៊ានចាត់វិធានការណ៍ណាមួយ ដើម្បីគាំទ្រដល់សង្គ្រាមរបស់រុស្ស៊ីលើអ៊ុយក្រែនពិតមែន។
គួរបញ្ជាក់ដែរថា មេដឹកនាំ មហាអំណាចទាំងពីរ គឺចិននិងអាមេរិក គ្រោងនឹងជួបនិយាយគ្នាតាមទូរស័ព្ទនៅយប់ថ្ងៃសុក្រនេះ ហើយវានឹងក្លាយជាការសន្ទនាលើកដំបូងរបស់ពួកគេចាប់តាំងពីរុស្ស៊ីបានបើកការឈ្លានពានអ៊ុយក្រែនអស់ពេលជាងបីសប្តាហ៍មកនេះ។
មែនទែនទៅនៅមុនគម្រោងជួបពិភាក្សាគ្នាតាមទូរសព្ទនេះ សហរដ្ឋអាមេរិកកាលពីដើមសប្តាហ៍ ធ្លាប់បានព្រមានទីក្រុងប៉េកាំងពីការដាក់ទណ្ឌកម្មម្តងជាពីរដងរួចមកហើយ។ ការព្រមានបែបជារឿយៗនេះ ក៏ដោយសារតែមានរបាយការណ៍ស៊ើបការជាច្រើនអះអាងថា ចិនបានដឹងមុនពីគម្រោងរបស់រុស្ស៊ី ឈ្លានពានអ៊ុយក្រែន ហើយថែមទាំងទទួលបានការស្នើសុំជំនួយពីរុស្ស៊ីថែមទៀត៕© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
