ទោះយ៉ាងណា តាមរបាយការណ៍របស់ក្រសួងកសិកម្ម រុក្ខាប្រមាញ់និងនេសាទ នៅរយៈពេល ២ខែដំបូង ក្នុងឆ្នាំ២០២២នេះ ការនាំចេញដូងប្រេង មានប្រមាណតែ ៤ពាន់៧រយតោន ប៉ុណ្ណោះ ដែលបានធ្លាក់ចុះ៣៤% បើប្រៀបនឹងរយៈពេលដូចគ្នានៅឆ្នាំ២០២១។
ឯកឧត្តមឧកញ៉ាបណ្ឌិត ម៉ុង ឫទ្ធី អគ្គនាយកក្រុមហ៊ុន ម៉ុងឫទ្ធី គ្រុប និងជាអ្នកវិនិយោគលើដំណាំដូងប្រេង ដ៏ល្បីល្បាញមួយរូបនៅកម្ពុជា បានអះអាងថា វិស័យដូងប្រេងនៅកម្ពុជា នៅមានភាពធន់នៅឡើយ បើទោះបីការនាំចេញដូងប្រេង រយៈពេល ២ខែដំបូង ក្នុងឆ្នាំនេះ មានបរិមាណតិចជាងឆ្នាំមុនក៏ដោយ។ បើតាមឧកញ៉ា ម៉ុង ឫទ្ធី ប្រទេសម៉ាឡេស៊ី និងឥណ្ឌា ជាគោលដៅទីផ្សារសំខាន់សម្រាប់ដូងប្រេង ដែលបច្ចុប្បន្ន តម្លៃដូងប្រេង បានកើនឡើងរហូតជាង ១ពាន់ដុល្លារ ក្នុង១តោន ដែលមានតម្លៃប្រសើរជាងឆ្នាំមុន ដែលធ្លាប់លក់បានត្រឹមតែជាង ៩រយដុល្លារ ប៉ុណ្ណោះ ក្នុង១តោន។ នេះបង្ហាញឲ្យឃើញថា វិស័យដូងប្រេង នៅតែមានភាពល្អប្រសើរ ទោះបីបរិមាណនាំចេញថយចុះក្ដី។ ទោះយ៉ាងណា ឧកញ៉ា ម៉ុង ឫទ្ធី ក៏បានបង្ហាញពីការព្រួយបារម្ភខ្លះដែរ ក្នុងវិស័យនេះ ដោយសារតែដើមដូងប្រេងមួយចំនួនត្រូវដល់អាយុកាលដែលត្រូវកាប់ចោល។
អត្ថបទគួរអាន
បើតាមការបញ្ជាក់របស់ឯកឧត្តម ម៉ុង ឫទ្ធី ដំណាំដូងប្រេង មានទីផ្សារ និងតម្លៃសមរម្យ ពិតមែន ប៉ុន្ដែ សព្វថ្ងៃ នៅមិនសូវមានអ្នកដាំដុះនោះទេ ព្រោះដំណាំប្រភេទនេះ ទាមទារលក្ខខណ្ឌច្រើន ដូចជា កត្តាដី ទឹកភ្លៀង បច្ចេកទេស ហិរញ្ញវត្ថុ ជាដើម។ មហាសេដ្ឋីកសិកម្មរូបនេះ បានសង្កត់ធ្ងន់ថា ដំណាំដូងប្រេង ត្រូវការផ្ទៃដីធំ និងចំណាយច្រើន ដូច្នេះ ក៏ទាមទារឱ្យមានការគាំទ្រពីស្ថាប័ណ្ណផ្សេងៗ ជួយគាំទ្រ ទៅលើផ្នែកហិរញ្ញប្បទានផងដែរ។
ឧកញ៉ា ម៉ុង ឫទ្ធី គូសបញ្ជាក់ទៀតថា ប្រសិនបើសិនតម្លៃដូងប្រេងឡើងខ្ពស់ ដូចឆ្នាំនេះ គួបផ្សំមានការគាំទ្រផ្នែកហិរញ្ញវត្ថុ និងមានផ្ទៃដីធំទូលាយ ផងនោះ កសិករគួរជ្រើសរើសដាំដំណាំដូងប្រេង។ ក៏ប៉ុន្តែ សម្រាប់លោកបណ្ឌិត ម៉ុង ឫទ្ធី មិនមានផែនការបន្ថែមដាំដំណាំដូងប្រេង នោះទេ ដោយលោកអះអាងថា មិនមានផ្ទៃដីទំនេរសម្រាប់ដាំដុះ ខណៈបច្ចុប្បន្ន លោកបានដាំដុះដូងប្រេងលើផ្ទៃដី ទំហំជាង១ម៉ឺន៦ពាន់ហិកតា ដែលសុទ្ធតែអាចប្រមូលផលបាន។
យោងតាមរបាយការណ៍របស់ក្រសួងកសិកម្ម រុក្ខាប្រមាញ់និងនេសាទ ក្នុងឆ្នាំ២០២១ កម្ពុជា បាននាំចេញដូងប្រេង ជាង៦ម៉ឺនតោន ទៅកាន់ទីផ្សារសំខាន់ៗ ដូចជា ម៉ាឡេស៊ី និងឥណ្ឌា។ ដោយឡែក នារយៈពេល ២ខែដំបូង ក្នុងឆ្នាំ២០២២ នេះកម្ពុជា បាននាំចេញដូងប្រេង ប្រមាណ ៤ពាន់៧រយតោន ដែលបានធ្លាក់ចុះ៣៤% បើប្រៀបនឹងរយៈពេលដូចគ្នានៅឆ្នាំ២០២១៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
