ការថយចុះចំនួនអ្នកចិញ្ចឹមត្រីនៅក្នុងស្រុកនេះបានជំរុញឲ្យតម្លៃត្រីគ្រប់ប្រភេទនៅលើទីផ្សារមានការកើនឡើងខ្ពស់គួរឲ្យកត់សម្គាល់នៅប៉ុន្មានខែកន្លងមកនេះ ក្នុងនោះ ត្រីប្រាដែលធ្លាប់លក់តម្លៃ៤,២០០រៀលក្នុងមួយគីឡូក្រាមបានឡើងដល់៥,៥០០រៀល ខណៈត្រីឆ្ដោធ្លាប់លក់ក្នុងតម្លៃ១ម៉ឺនរៀលក្នុងមួយគីឡូក្រាមបានកើនដល់១២,០០០រៀលក្នុងមួយគីឡូក្រាម។
លោក ឡែមផូរ សុថាវរិទ្ធិ ប្រធានគណៈកម្មការប្រតិបត្តិនៃសមាគមវារីវប្បករនៅកម្ពុជា បានគូសបញ្ជាក់ថា ការចិញ្ចឹមត្រីក្នុងស្រះរបស់សមាជិកសមាគមនៅឆ្នាំ២០២៣ មានការថយចុះប្រមាណ៦០%ក្រោយកសិករមួយចំនួនបានផ្អាកការចិញ្ចឹម និងមួយចំនួនកាត់បរិមាណក្នុងការចិញ្ចឹម។
កត្តាដែលធ្វើការចិញ្ចឹមមានការធ្លាក់ចុះខ្លាំងបែបនេះ គឺដោយសារចំណីត្រីមានការកើនឡើង តែត្រីលក់ចេញមានតម្លៃថោក ដែលធ្វើប្រជាពលរដ្ឋពុំសូវទទួលបានប្រាក់ចំណេញ។ បើតាមការលើកឡើងរបស់អ្នកនាំពាក្យរូបនេះ ដែលបានបន្ថែមថា មកទល់ពេលនេះចំនួនអ្នកដាក់ត្រីចិញ្ចឹមឡើងវិញនៅមានកម្រិតទាប ខណៈត្រីដែលកំពុងចិញ្ចឹមក្នុងស្រះនៅតូចៗ ដែលអាចជាបញ្ហាប្រឈមសម្រាប់កម្ពុជា។
អត្ថបទគួរអាន
ប្រធានគណៈកម្មការប្រតិបត្តិរូបនេះកត់សម្គាល់ឃើញថា ក្រោយការផ្អាក និងកាត់បន្ថយការចិញ្ចឹមត្រីរបស់ប្រជាពលរដ្ឋក្នុងស្រុក បានជំរុញឲ្យតម្លៃត្រីគ្រប់ប្រភេទនៅលើទីផ្សារមានការកើនឡើងគួរឲ្យកត់សម្គាល់នៅអំឡុងខែកក្កដា និងសីហា កន្លងទៅ។ ក្នុងនោះត្រីប្រាដែលពីមុនលក់ចេញតម្លៃ៤,២០០រៀលក្នុងមួយគីឡូក្រាមបានកើនដល់៥,៥០០រៀល ខណៈត្រីឆ្ដោធ្លាប់ចេញតម្លៃ១០,០០០រៀលក្នុងមួយគីឡូក្រាមបានកើនដល់១២,០០០រៀល រីឯត្រីអណ្ដែង លក់ចេញតម្លៃ៤,២០០រៀល បានកើនដល់ជាង៥,០០០រៀលក្នុង១គីឡូក្រាម។
គួរបញ្ជាក់ថា បច្ចុប្បន្នសមាគមវារីវប្បករនៅកម្ពុជាមានសមាជិកអ្នកចិញ្ចឹមត្រីចំនួន១០៦៣នាក់ ដែលភាគច្រើនមាននៅខេត្តកណ្ដាល, កំពង់ចាម, កំពង់ធំ, សៀមរាប, ពោធិ៍សាត់ រាជធានីភ្នំពេញ និងខេត្តបាត់ដំបងជាដើម។ បើតាមរបាយការណ៍របស់រដ្ឋបាលជលផលកាលពីឆ្នាំ២០២២ ការប្រមូលផលក្នុងវិស័យវារីវប្បកម្មសម្រេចបានជាង៣៣ម៉ឺនតោនធ្លាក់ចុះជាង១ម៉ឺន៧ពាន់តោនបើធៀបនឹងឆ្នាំ២០២១៕
អត្ថបទ ៖ បូ ដូឡា
