តើមានហេតុផលសំខាន់ៗអ្វីខ្លះដែលជំរុញឱ្យវៀតណាម ត្រូវនាំចូលអគ្គិសនីពីប្រទេសឡាវ?

ក្រុមអ្នកវិភាគបាននិយាយថា ការនាំចូលអគ្គិសនីពីប្រទេសឡាវ គឺជាដំណោះស្រាយល្អមួយសម្រាប់ការដោះស្រាយបញ្ហាកង្វះថាមពលនៅភាគខាងជើង នៃប្រទេសវៀតណាម ហើយក៏ជាមធ្យោបាយមួយ ដើម្បីបំពេញកិច្ចព្រមព្រៀងឆ្នាំ២០១៦ រវាងប្រទេសទាំងពីរ ពោលគឺឡាវ និងវៀតណាមផងដែរ។ លោក ង៉ូ ឌឹកឡាំ ( Ngo Duc Lam) អ្នកវិភាគថាមពលបាននិយាយប្រាប់សារព័ត៌មាន VNExpress ថា ការទិញអគ្គិសនីពីប្រទេសឡាវ មិនត្រឹមតែមានហេតុផលសេដ្ឋកិច្ចប៉ុណ្ណោះទេ ប៉ុន្តែវាក៏មានអត្ថន័យលើផ្នែកនយោបាយផងដែរ។

កាលពីពេលថ្មីៗនេះ ក្រុមហ៊ុនអគ្គិសនីវៀតណាម ដែលជាក្រុមហ៊ុនថាមពលជាតិផ្តាច់មុខ បានស្វះស្វែងសុំការអនុម័ត ដើម្បីនាំចូលថាមពលអគ្គិសនីដើរដោយកម្លាំងខ្យល់ពីប្រទេសឡាវក្នុងតម្លៃជិត៧សេនដុល្លារក្នុងមួយគីឡូវ៉ាត់ម៉ោង ដើម្បីអនុញ្ញាតឱ្យមានការនាំចូលកាន់តែច្រើន ចំពេលមានការព្រួយបារម្ភអំពីកង្វះថាមពលនៅភាគខាងជើង នៃប្រទេសវៀតណាម ខណៈដែលគេដឹងថា តម្លៃនេះថោកជាងតម្លៃថាមពលដែលវៀតណាមផលិតខ្លួនឯង។

លោក ង៉ូ ឌឹកឡាំ បាននិយាយថា រដ្ឋាភិបាលនៃប្រទេសទាំងពីរបានចុះហត្ថលេខាលើអនុស្សរណៈមួយនៅឆ្នាំ២០១៦ ដើម្បីឱ្យវៀតណាម ទិញថាមពលពីប្រទេសឡាវ យ៉ាងតិច១ពាន់មេហ្គាវ៉ាត់ ក្នុងឆ្នាំ២០២០ ៣ពាន់មេហ្គាវ៉ាត់នៅឆ្នាំ២០២៥ និង៥ពាន់មេហ្គាវ៉ាត់នៅឆ្នាំ២០៣០។

តាមតួលេខពីក្រសួងឧស្សាហកម្ម និងពាណិជ្ជកម្មវៀតណាមបានឱ្យដឹងថា វៀតណាមបានព្រមព្រៀងនាំចូលថាមពលវារីអគ្គិសនីពីប្រទេសឡាវ ប្រមាណជា២.៧០០មេហ្គាវាត់ ប៉ុន្តែតួលេខដែលវៀតណាមនាំចូលថាមពលអគ្គិសនីជាក់ស្តែងពីឡាវមានត្រឹមតែប្រហែល១.៣០០ មេហ្គាវ៉ាត់ ដោយសារអ្នកវិនិយោគរោងចក្រថាមពលឡាវ មួយចំនួនបានដកខ្លួនចេញពីកិច្ចព្រមព្រៀងនេះ ខណៈដែលអ្នកវិនិយោគផ្សេងទៀតនឹងបញ្ចប់រោងចក្ររបស់ពួកគេត្រឹមឆ្នាំ២០២៥។

លោកបានបន្តថា ថ្លៃដើមអគ្គិសនីដែលវៀតណាមផលិតថាមពលនៅក្នុងស្រុក គឺមានតម្លៃរហូតដល់ជាង៨សេនដុល្លារ ទៅជិត១០សេនដុល្លារនៅក្នុងមួយគីឡូវាត់ម៉ោង។ ជុំវិញការនាំចូលថាមពលពីប្រទេសឡាវនេះ លោក ត្រាន់ វ៉ាន់ ប៊ិញ (Tran Van Binh) អ្នកវិភាគខាងថាមពលមួយរូបទៀតបានបង្ហាញពីការព្រួយបារម្ភថា ការពឹងផ្អែកលើកម្លាំងខ្យល់សម្រាប់ការនាំចូល គឺមិនគួរឱ្យទុកចិត្តទេ ព្រោះវាអាស្រ័យលើអាកាសធាតុ។

លោកបានបញ្ជាក់ថា ការនាំចូលពីឡាវ សម្រាប់ហេតុផលសេដ្ឋកិច្ច គឺអាចទទួលយកបាន។ ប៉ុន្តែក្នុងរយៈពេលវែង នេះមិនមែនជាការល្អសម្រាប់យុទ្ធសាស្ត្រអភិវឌ្ឍន៍ថាមពលរបស់វៀតណាមនោះឡើយ៕

ដោយៈ សរ សុជាតិ