គម្រោងផ្លូវក្រវាត់ក្រុងទី៣ នឹងបញ្ចប់ការសាងសង់យឺតដល់ទៅ៤ខែ ខណៈបច្ចុប្បន្នសម្រេចបានជាង៦០%

ជុំវិញបញ្ហានេះដែរ ថ្នាក់ដឹកនាំក្រសួងធ្លាប់បានអះអាងកន្លងមកថា ការចំណាយលើការដោះស្រាយផលប៉ះពាល់ក្នុងការស្ថាបនាផ្លូវក្រវាត់ក្រុងទី៣ មានទំហំធំជាងការចំណាយលើការសាងសង់ផ្លូវដែលមានតម្លៃ៣រយលានដុល្លារនេះទៅទៀត។ 

ឯកឧត្តម ហេង រដ្ឋពិសិដ្ឋ អគ្គនាយកនៃអគ្គនាយកដ្ឋានសាធារណការ នៃក្រសួងសាធារណការ និងដឹកជញ្ជូនបានបញ្ជាក់ប្រាប់ខេមបូណូមីសថា ការសាងសង់ផ្លូវក្រវាត់ក្រុងទី៣គ្រោងបញ្ចប់នៅចុងឆ្នាំ២០២២ ដែលអាចយឺតជាងផែនការប្រមាណ៤ខែ ខណៈបច្ចុប្បន្នការស្ថាបនាទើបសម្រេចបានជាង៦០% ប៉ុណ្ណោះ ក្រោយដំណើរការសាងសង់ជិត៣ឆ្នាំកន្លងមកនេះ។ ឯកឧត្តមអះអាងថា កត្តាដែលធ្វើឲ្យរាំងស្ទះដល់ដំណើរការសាងសង់ផ្លូវក្រវាត់ក្រុងនេះ គឺដោយសារមានភាពយឺតយ៉ាវក្នុងការដោះស្រាយសំណងផលប៉ះពាល់ជូនប្រជាពលរដ្ឋ។ 

ឯកឧត្តម ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនធ្លាប់បានអះអាងកន្លងមកថា ការចំណាយលើការដោះស្រាយសំណងជូនប្រជាពលរដ្ឋក្នុងការស្ថាបនាផ្លូវក្រវាត់ក្រុងទី៣ មានទំហំធំជាងការចំណាយលើការសាងសង់ផ្លូវទាំងមូលទៅទៀត។ តែយ៉ាងណាឯកឧត្តមមិនបានបញ្ជាក់លម្អិតពីតួលេខចំណាយ ដែលរាជរដ្ឋាភិបាលបានចំណាយលើការដោះស្រាយសំណងជូនប្រជាពលរដ្ឋនោះទេ។ សម្រាប់ឯកឧត្តម ការសាងសង់ ឬពង្រីកផ្លូវ ជៀសមិនផុតពីផលប៉ះពាល់ដល់ទ្រព្យសម្បត្តិឯកជនរបស់ប្រជាពលរដ្ឋនោះទេ គ្រាន់តែខ្លះមានទំហំតូច និងខ្លះទៀតមានទំហំធំតែប៉ុណ្ណោះ ដែលកត្តានេះបានធ្វើឲ្យទំហំចំណាយលើស្ថាបនា ឬពង្រីកផ្លូវប៉ោងកាន់តែធំ។

ផ្លូវក្រវាត់ក្រុងទី៣សាងសង់តដោយក្រុមហ៊ុនសំណង់សៀងហៃគ្រុប ខូអិលធីឌី (Shanghai Construction Group Co., Ltd.) និងត្រួតពិនិត្យបច្ចេកទេសសាងសង់ ដោយក្រុមហ៊ុនទីប្រឹក្សាបច្ចេកទេសក្វាងចូវវ៉ានអាន (Guangzhou Wanan Construction Supervision Co., Ltd) ដោយប្រើរយៈពេលសាងសង់ចំនួន៤២ខែ។ ផ្លូវនេះមានប្រវែងជិត៥៣គីឡូម៉ែត្រ ដោយគ្រោងចំណាយថវិកាប្រមាណ៣រយលានដុល្លារអាមេរិក។ បន្ថែមលើនេះការស្ថាបនាផ្លូវក្រុងទី៣ ក៏មានការសាងសង់ស្ពានអាកាសចំនួន៤ កន្លែង និងស្ពានឆ្លងកាត់ទន្លេចំនួនពីរផងដែរ ដើម្បីជួយសម្រួលដល់ការធ្វើដំណើររបស់ប្រជាពលរដ្ឋ និងដឹកជញ្ជូនទំនិញ ក៏ដូចជាកាត់បន្ថយការកកស្ទះចរាចរណ៍ជាដើម៕