នាពិធីសម្ពោធដាក់ឲ្យប្រើប្រាស់មណ្ឌលត្រួតពិនិត្យលក្ខណៈបច្ចេកទេស (ឆៀក) យានយន្ត សាខាសំរោងអណ្តែតនៅព្រឹកថ្ងៃទី២១ ខែមេសា ឆ្នាំ២០២៣ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានគូសបញ្ជាក់ថា គម្រោងផ្លូវល្បឿនលឿនភ្នំពេញ-បាវិតនឹងបើកការដ្ឋានសាងសង់នៅថ្ងៃទី៧ ខែមិថុនា ឆ្នាំ២០២៣ ខាងមុខ ក្រោមអធិបតីភាពរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា។ ផ្លូវនេះនឹងក្លាយជាផ្លូវល្បឿនលឿនទីពីររបស់កម្ពុជា បន្ទាប់ពីផ្លូវល្បឿនលឿនភ្នំពេញ-ក្រុងព្រះសីហនុ ដែលបានសម្ពោធដាក់ឲ្យប្រើប្រាស់ជាផ្លូវការកាលពីខែវិច្ឆិកា ឆ្នាំ២០២២ កន្លងទៅ។
អត្ថបទគួរអាន
បើតាមការគូសបញ្ជាក់របស់ឯកឧត្តមទេសរដ្ឋមន្ត្រី គម្រោងផ្លូវល្បឿនលឿនភ្នំពេញ-បាវិតនេះមានតម្លៃប្រមាណ១ពាន់៤រយលានដុល្លារអាមេរិក ដោយគ្រោងចំណាយពេលសាងសង់ប្រមាណជាង៣ឆ្នាំ ពោលគឺគ្រោងបញ្ចប់ការសាងសង់នៅត្រឹមដើមឆ្នាំ២០២៧។
ឧកញ៉ា ស៊ិន ចន្ធី ប្រធានសមាគមភស្តុភារកម្មកម្ពុជាបានចាត់ទុកការប្រកាសពីកាលបរិច្ឆេទនៃការបើកការដ្ឋានសាងសង់គម្រោងផ្លូវល្បឿនខាងលើ ជាដំណឹងមួយដ៏រីករាយសម្រាប់ក្រុមហ៊ុនរកស៊ីក្នុងវិស័យដឹកជញ្ជូន ក៏ដូចជាប្រជាពលរដ្ឋកម្ពុជាទាំងមូល ដែលនឹងទទួលបានផ្លូវល្បឿនលឿនទីពីរនៅប៉ុន្មានឆ្នាំខាងមុខនេះ។ អ្នកជំនាញរូបនេះរំពឹងថា ក្រោយគម្រោងផ្លូវល្បឿនលឿននេះដាក់ឲ្យដំណើរការ វានឹងជួយសម្រួលដល់ការធ្វើដំណើរ និងដឹកជញ្ជូនទំនិញ ក៏ដូចជាជំរុញកំណើនការធ្វើពាណិជ្ជកម្មរវាងប្រទេសកម្ពុជាជាមួយវៀតណាមឲ្យកាន់តែល្អប្រសើរបន្ថែមទៀត។
បើតាមការគូសបញ្ជាក់របស់ឯកឧត្តមទេសរដ្ឋមន្ត្រី ស៊ុន ចាន់ថុល ក្រៅពីការបើកការដ្ឋានសាងសង់គម្រោងផ្លូវល្បឿនលឿនភ្នំពេញ-បាវិត កម្ពុជាក៏កំពុងសិក្សាគម្រោងផ្លូវល្បឿនលឿនទីបីភ្នំពេញ-សៀមរាបមួយបន្ថែមទៀត ដោយគ្រោងបញ្ចប់នៅចុងខែឧសភា ខាងមុខនេះ។ ក្រោយគម្រោងនេះត្រូវបានសិក្សាចប់ រាជរដ្ឋាភិបាលនឹងជួបប្រជុំរួមគ្នាជាមួយក្រុមហ៊ុន ដើម្បីត្រួតពិនិត្យ និងសិក្សាពីលទ្ធភាពឲ្យដឹងថា តើគម្រោងនេះអាចសាងសង់បាន ឬមិនបាន។ ទោះយ៉ាងណាឯកឧត្តមទេសរដ្ឋមន្ត្រីរំពឹងថា គម្រោងនេះនឹងអាចដំណើរការសាងសង់បាន៕
