លោកវរសេនីយ៍ឯក សំ វិច្ឆិកា អ្នកនាំពាក្យនៃស្នងការដ្ឋាននគរបាលរាជធានីភ្នំពេញបានគូសបញ្ជាក់ថា ចាប់តាំងពីថ្ងៃបើកយុទ្ធនាការត្រួតពិនិត្យជាតិអាល់កុល និងបទល្មើសនានាក្នុងរយៈពេល៤ថ្ងៃកន្លងទៅនេះ សមត្ថកិច្ចរកឃើញអ្នកបើកបរមានជាតិអាល់កុលក្នុងកម្រិតចាប់ពី០,២៥មីលីលីត្រខ្យល់ដល់០,៤០មីលីលីត្រខ្យល់។ ក្នុងចំណោមអ្នកបើកបរក្រោមឥទ្ធិពលជាតិស្រវឹងទាំងនេះ ត្រូវបានអ្នកនាំពាក្យអះអាងថា សមត្ថកិច្ចពុំបានបញ្ជូនអ្នកបើកបរណាម្នាក់ទៅតុលាការនោះឡើយ ដោយនៅចំពោះមុខ គឺសមត្ថកិច្ចពិន័យ និងអប់រំធ្វើកិច្ចសន្យា ដោយហៅក្រុមគ្រួសារឱ្យមកយកត្រលប់ទៅផ្ទះវិញ ប៉ុន្តែប្រសិនបើនៅតែបន្តល្មើសទៀតនោះសមត្ថកិច្ចនឹងចាត់វិធានការតាមនីតិវិធីជាបន្តបន្ទាប់ទៀត។
អ្នកនាំពាក្យនៃស្នងការដ្ឋាននគរបាលរាជធានីភ្នំពេញបានគូសបញ្ជាក់ថា ការពិន័យលើអ្នកបើកបរក្រោមឥទ្ធិពលគ្រឿងស្រវឹង ត្រូវបានបែងចែកជា២ ក្នុងនោះកម្រិតស្រាលចាប់ពី០,២៥មីលីលីត្រខ្យល់ដល់០,៣៩មីលីលីត្រខ្យល់ សម្រាប់ម៉ូតូត្រូវពិន័យចំនួន២៥ម៉ឺនរៀល និងរថយន្តធុនតូចចំនួន៤០ម៉ឺនរៀល ខណៈរថយន្តធុនធំចំនួន៨០ម៉ឺនរៀល។ ដោយឡែកកម្រិតខ្ពស់ចាប់ពី០,៤០មីលីលីត្រខ្យល់ឡើងទៅ ត្រូវពិន័យចំពោះម៉ូតូចំនួន១លានរៀល រថយន្តធុនតូច២លានរៀល និងរថយន្តធុនធំ៤លានរៀល។
សូមបញ្ជាក់ថា ការរឹតបន្តឹងការត្រួតពិនិត្យច្បាប់ចរាចរណ៍ និងជាតិស្រវឹងទៅលើអ្នកបើកបរយានយន្តនេះ បានធ្វើឡើងតាំងពីយប់ថ្ងៃទី២៥ ខែមករា ឆ្នាំ២០២៤ បន្ទាប់ពីសម្ដេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បញ្ជាឱ្យសមត្ថកិច្ចជំនាញចុះអនុវត្តឱ្យបានតឹងរ៉ឹង ដើម្បីកាត់បន្ថយអត្រារបួស និងស្លាប់ដោយសារការបើកបរក្រោមឥទ្ធិពលគ្រឿងស្រវឹង៕
