ក្រុមអ្នកស្រាវជ្រាវមកពីមជ្ឈមណ្ឌលស្រាវជ្រាវ និងអភិវឌ្ឍន៍ពូជស្រូវដែលធន់នឹងដីមានជាតិប្រៃនៅទីក្រុងឈីងទាវ (Qingdao) នៅភាគខាងកើតនៃខេត្តសានទុងប្រទេសចិនបាននិយាយថា ទិន្នផលស្រូវដែលអាចដាំនៅលើដីមានទឹកសមុទ្រប្រៃ គឺជាពូជស្រូវថ្មីមួយប្រភេទ ដែលទើបបានរកឃើញនោះ បានផ្ដល់នូវទិន្នផលកើនឡើងទ្វេដងនៅក្នុងរយៈពេល ៣ ឆ្នាំកន្លងមកនេះ។
ទិន្នផលស្រូវប្រភេទនេះ បានកើនឡើងជិតទ្វេដង ពោលគឺបានកើនដល់ ៨,៨ តោនក្នុងមួយហិកតាកាលពីឆ្នាំមុន ហើយបានកើនឡើងបន្ថែមទៀតដល់ជាង ១០ តោនក្នុងមួយហិកតាក្នុងឆ្នាំ២០២២។ នេះបើយោងតាមការចុះផ្សាយរបស់កាសែត Science and Technology Daily ដែលគ្រប់គ្រងដោយរដ្ឋចិនកាលពីថ្ងៃទី ១២ ខែតុលា។
ស្រូវធន់នឹងទឹកប្រៃនេះ ត្រូវបានរកឃើញដោយ លោក យ៉ូន ឡុងពីង (Yuan Longping) ដែលជាបិតាស្ថាបនិកពូជស្រូវកូនកាន់ របស់ចិន ហើយបើទោះបីជា លោកបានទទួលមរណៈភាពក្នុងឆ្នាំ២០២១ ក្នុងវ័យ៩០ឆ្នាំទៅហើយក្ដី ប៉ុន្ដែការងារស្រាវជ្រាវពូជស្រូវនេះ នៅតែបន្ដ ដោយលោកមានធ្លាប់មានផែនការនឹងពង្រីកការដាំស្រូវធន់នឹងទឹកប្រៃនេះឲ្យបានដល់ជិត៦៧ម៉ឺនហិកតានៅឆ្នាំ២០២២។ បន្ថែមពិនេះ នៅរយៈពេល ៨ ទៅ១០ឆ្នាំខាងមុខ លោក យ៉ូន មានគោលដៅដាំស្រូវនេះ ឲ្យបានដល់៧លានហិកតា ដែលអាចនឹងចិញ្ចឹមប្រជាជនបាន៨០លាននាក់ ខណៈដែលគិតត្រឹមឆ្នាំ២០២១ ការដាំដុះស្រូវធន់នឹងទឹកប្រៃនេះ ទើបតែមានផ្ទៃដីប្រមាណ ៤០ម៉ឺនហិកតាប៉ុណ្ណោះ។
កាសែតចិនដដែលនេះបានរបាយការណ៍ទៀតថា លទ្ធផលនេះបានបំបែកកំណត់ត្រាកាលពីឆ្នាំមុន និងកំណត់សញ្ញាថ្មីមួយសម្រាប់ស្រូវ ដែលអាចធន់នឹងសារជាតិទឹកប្រៃ និងអាចលូតលាស់បាននៅក្នុងបរិយាកាសដែលមានកំហាប់អំបិល ៤ ក្រាមនៅក្នុង១គីឡូក្រាម។
ការបង្កើតបានពូជស្រូវក៏កម្រនេះ គឺជាដំណឹងល្អសម្រាប់ប្រទេសចិនដែលមានបំណងការពារសន្តិសុខស្បៀងរបស់ខ្លួនចំពេលមានភាពតានតឹងផ្នែកភូមិសាស្ត្រនយោបាយកើនឡើង និងរំខានដល់ខ្សែសង្វាក់ផ្គត់ផ្គង់អាហារពិភពលោក។
លោក វ៉ាន ជីលី (Wan Jili) ជាអ្នកគ្រប់គ្រងនៅមជ្ឈមណ្ឌលស្រាវជ្រាវនៅទីក្រុងឈីងទាវបាននិយាយថា ទិន្នផលស្រូវកូនកាត់ជាទូទៅទទួលបានផលខ្ពស់ជាងដំណាំធម្មតាដោយប្រភេទស្រូវកូនកាត់មួយអាចសម្រេចបានទិន្នផលដល់ ១០ តោនក្នុងមួយហិកតាក្នុងឆ្នាំ២០១៧នៅក្រោមប្រព័ន្ធធារាសាស្រ្ត ដែលមានសារជាតិប្រៃ៦%។
លោក វ៉ាន បានអះអាងថា ស្រូវធម្មតា ២ប្រភេទដែលបានសាកល្បង គឺបានបង្ហាញលទ្ធផលជាក់ស្ដែង ហើយប្រភេទស្រូវនេះមានសក្ដានុពលដ៏ធំសម្រាប់ការដាំដុះ។ មជ្ឈមណ្ឌលនេះនឹងបន្តច្នៃប្រឌិត និងអភិវឌ្ឍធនធានគ្រាប់ពូជដែលមានគុណភាពខ្ពស់បន្ថែមទៀតដើម្បីជួយការពារសន្តិសុខស្បៀង និងធ្វើជាអាហាររបស់ប្រទេសចិន។
ប្រទេសចិនមានប្រជាជនប្រហែល១ភាគ៦នៃចំនួនប្រជាជនក្នុងពិភពលោក ខណៈដែលប្រទេសនេះ មានផ្ទៃដីស្ងួតបែកក្រហែងប្រហែល ១០០ លានហិកតា ហើយក្នុងនោះមានជិត ៧ លានទៅ ១៣ លានហិកតាអាចត្រូវបានកែច្នៃសម្រាប់ការដាំដុះស្រូវ និងដំណាំផ្សេងៗទៀត៕
អត្ថបទ៖ សុខ ជា
