តុលាការរបស់ប្រជាជនទីក្រុងហូជីមិញ នឹងបើកសវនាការចាប់ពីថ្ងៃទី២៣-២៥ ខែមេសាខាងមុខនេះ ជុំវិញសំណុំរឿងរបស់លោក ថាញ់ (Thanh) អាយុ ៧១ ឆ្នាំ និងកូនស្រីរបស់លោកពីរនាក់ទៀត គឺលោកស្រី ត្រាណ ង្វៀន ភួង (Tran Uyen Phuong) អាយុ ៤៣ ឆ្នាំ ជាអគ្គនាយករង ក្រុមហ៊ុនតាន់ ហៀប ផាត និង លោក ស្រី តា្រណ ង៉ុក ប៊ីក (Tran Ngoc Bich) អាយុ ៤០ ឆ្នាំជាអតីតនាយកក្រុមហ៊ុនមួយនេះផងដែរ។
ជនជាប់ចោទទាំងបីនាក់ជាគ្រួសារតែមួយនេះ នឹងត្រូវបានតំណាងដោយមេធាវីចំនួន៤នាក់របស់ពួកគេនៅក្នុងតុលាការប្រជាជនទីក្រុងហូជីមិញ ខណៈដែលស្ថាប័នចំនួន ៣៥ ពាក់ព័ន្ធនឹងករណីនេះក៏នឹងធ្វើការបង្ហាញខ្លួននៅក្នុងតុលាការនៅពេលនោះផងដែរ។
ក្រុមរដ្ឋអាជ្ញាវៀតណាមបានចោទប្រកាន់ថា លោក ថាញ់ និងកូនស្រីរបស់លោកពីរនាក់ទៀតបានផ្តល់ប្រាក់កម្ចីដល់បុគ្គលមួយចំនួនក្នុងអត្រាការប្រាក់ខ្ពស់ប្រចាំខែ ៣% ហើយជំនួសឱ្យការទទួលបានប្រាក់កម្ចីតាមកិច្ចសន្យាភ្ជាប់ដោយវត្ថុបញ្ចាំនោះ លោក ថាញ់ បានបង្ខិតបង្ខំអ្នកខ្ចីឱ្យចុះហត្ថលេខាលើកិច្ចសន្យាលក់ទ្រព្យសកម្មរបស់ពួកគេ មកឱ្យខ្លួនលោកផ្ទាល់ ដោយផ្ដល់តម្លៃថោក ក្រោមតម្លៃទីផ្សារទៅទៀត។
ក្រុមរដ្ឋអាជ្ញាវៀតណាមបានបន្ថែមថា នៅពេលអ្នកខ្ចីបានសងថ្លៃដើម និងការប្រាក់ពេញលេញរួចហើយ លោក ថាញ់ ត្រូវបានគេរាយការណ៍ថា បានបដិសេធមិនព្រមប្រគល់ទ្រព្យបញ្ចាំទៅឱ្យម្ចាស់ដើមគេវិញទេ ដោយអះអាងថា អ្នកខ្ចីបានបាត់បង់សិទ្ធិទទួលបានទ្រព្យរបស់ពួកគេមកវិញហើយ ដោយសារតែពួកគេបានបំពានលើកិច្ចសន្យា។
លោក ត្រាណ ឈី ថាញ់ អតីតប្រធានក្រុមហ៊ុនតាន ហៀប ផាត រួបនេះ ក៏ត្រូវបានចោទថា បានដាក់សម្ពាធលើអ្នកខ្ចីប្រាក់ឱ្យធ្វើការទូទាត់ចំនួនប្រាក់ខ្ពស់ជាងប្រាក់ដើមដែលបានព្រមព្រៀងគ្នាផងដែរ។
លោក ថាញ់ និង កូនស្រីរបស់លោក ត្រូវបានចោទប្រកាន់ថាបានយកថវិកាចំនួន ៤២លានដុល្លារ ចាប់ពីខែ មករា ឆ្នាំ២០១៩ ដល់ ខែវិច្ឆិកា ឆ្នាំ២០២០ តាមរយៈគម្រោងបែបនេះ ហើយពេញមួយដំណើរការស៊ើបអង្កេតករណីនេះ លោក ថាញ់ និងកូនស្រីពីរនាក់ របស់លោកតែងតែបដិសេធចំពោះការចោទប្រកាន់ទាំងនេះ៕
អត្ថបទ៖ សុខ ជា
