បើទោះបីជា មានអ្នកវិភាគ និងមន្ត្រីជាន់ខ្ពស់រដ្ឋាភិបាលមួយចំនួនបានលើកឡើងថាអំពីភាពខុសគ្នានៃការដួលរលំធនាគារអាមេរិក ជាមួយនឹងវិបត្តិហិរញ្ញវត្ថុសាកលកាលពី ១៥ឆ្នាំមុនក្ដី ប៉ុន្ដែ លោក Shayne Elliott នាយកប្រតិបត្តិធនាគារ អូស្រ្តាលី និង ណូវែលហ្សេឡង់ ដែលគេស្គាល់ថា ANZ នោះបានលើកឡើងថា ភាពចលាចលក្នុងវិស័យធនាគារថ្មីៗនេះ អាចសក្ដានុពលក្នុងការបង្កឱ្យមានវិបត្តិហិរញ្ញវត្ថុសាកល ស្រដៀងគ្នាទៅនឹងឆ្នាំ ២០០៨ បាន ។ លោកបានត្រូវបណ្តាញព័ត៌មានធំៗដកស្រង់សំដីថា វាអាចជាវិបត្តិដែលកើតឡើងនៅកន្លែងមួយចំនួន ប៉ុន្តែកុំភ្លេចថា វិបត្តិនេះវាអាចរីករាលដាលបាន ហើយក៏មិនត្រូវធ្វេសប្រហែសនឹងវានោះឡើយ។
អត្ថបទគួរអាន
លោកបានបន្តថា ធនាគារនៅអូស្ត្រាលីនិងណូវែលហ្សេឡង់មិនបានរងទុក្ខខ្លាំង ដូចធនាគារនៅសហរដ្ឋអាមេរិក និងអង់គ្លេសក្នុងអំឡុងវិបត្តិឆ្នាំ ២០០៨ នោះទេ ដោយសារ ស្តង់ដារនៃការផ្តល់ប្រាក់កម្ចី និងភាពធន់នៃការខិតខំរក្សាចរន្តសេដ្ឋកិច្ច ដូច្នេះនៅក្នុងពេលនេះ ធនាគារANZ ដែលកំពុងតែឈរនៅលំដាប់លេខ៤ ខាងផ្តល់ប្រាក់កម្ចីក៏ដូចគ្នា គឺកំពុងតែប្រយ័ត្ន ប្រយែងបំផុត ជាពិសេសនៅក្នុងពេលដែលពិភពលោកកំពុងស្ថិតនៅក្រោមសម្ពាធនៃសង្រ្គាមអតិផរណាជាសាកល។
ជាការពិតទោះបីជា ស្ថានភាពវិបត្តិធនាគារនៅអាមេរិកពេលនេះហាក់ធូរស្រាលវិញក៏ដោយ ប៉ុន្តែអ្នកបង្កើតគោលនយោបាយ និងយុទ្ធសាស្រ្តធនាគារនៅអាមេរិកក៏មិនព្រងើយកន្ដើយដែរ។ ដោយឡែក នៅអឺរ៉ុបក៏ដូចគ្នា ក្រោយពេលដែលធនាគារ Credit Suisse ជួបព្យុះប្រមាណជា ២សប្តាហ៍កន្លងមក ។ អ្នកបង្កើតគោលនយោបាយរបស់ធនាគារកណ្តាលអាមេរិកនិងអឺរ៉ុបបាននិយាយ ថា ភាពតានតឹងនៅក្នុងវិស័យធនាគារកំពុងត្រូវបានត្រួតពិនិត្យយ៉ាងដិតដល់ ដើម្បីធានាមិនឲ្យបញ្ហា បង្កឱ្យមានវិបត្តិឥណទានកើតឡើងនោះឡើយ៕
