ADB ថា អាស៊ីនឹងបញ្ចប់ឆ្នាំ២០២៣ ជាមួយកំណើនសេដ្ឋកិច្ចល្អប្រសើរ ចំពេលសេដ្ឋកិច្ចចិនងើបឡើងវិញ

ធនាគារ ADB បានបង្កើនការព្យាករកំណើនសេដ្ឋកិច្ចរបស់ខ្លួននៅឆ្នាំ២០២៣ សម្រាប់តំបន់អាស៊ី ដែលកំពុងអភិវឌ្ឍឡើងដល់កម្រិត៤,៩% ដោយកើនឡើងពីកម្រិត៤,៧% ដែលធនាគារនេះបានព្យាករកាលពីខែកញ្ញា កន្លងទៅ ប៉ុន្តែបានរក្សាការព្យាករកំណើនរបស់ខ្លួនសម្រាប់តំបន់នេះនៅត្រឹមកម្រិត៤,៨% នៅឆ្នាំក្រោយ។

ធនាគារ ADB ក៏បានកែសម្រួលការព្យាករកំណើនរបស់ខ្លួនសម្រាប់ប្រទេសចិនពីកម្រិត៤,៩%ទៅដល់៥,២%ផងដែរ ប៉ុន្តែបានរក្សាការព្យាករកំណើនរបស់ខ្លួនសម្រាប់ប្រទេសមានសេដ្ឋកិច្ចធំទីពីររបស់ពិភពលោកមួយនេះនៅត្រឹមអត្រា៤,៥%នៅឆ្នាំក្រោយ។

ADB បានអះអាងថា តម្រូវការក្នុងស្រុកដ៏រឹងមាំ ការផ្ទេរប្រាក់កាន់តែរឹងមាំ និងការងើបឡើងវិញនៃវិស័យទេសចរណ៍កំពុងជំរុញសកម្មភាពសេដ្ឋកិច្ចនៅក្នុងប្រទេសទាំង៤៦នៅក្នុងតំបន់អាស៊ីប៉ាស៊ីហ្វិកដោយមិនរាប់បញ្ចូលប្រទេសជប៉ុន អូស្ត្រាលី និងនូវែលសេឡង់នោះឡើយ។ ទន្ទឹមគ្នានេះ ធនាគារ ADB ក៏បានបង្ហាញទស្សនវិស័យសម្រាប់តំបន់អាស៊ីបូព៌ាដែរ ដោយបានព្យាករថា នឹងមានកំណើនលឿនជាងមុនក្នុងអត្រា៤,៧% នៅឆ្នាំនេះ បើធៀបនឹងការព្យាកររបស់ខ្លួនកាលពីខែកញ្ញា ដែលថាមានអត្រា៤,៤% ខណៈដែលតំបន់អាស៊ីអាគ្នេយ៍វិញត្រូវបានគេព្យាករថា នឹងកើនឡើងក្នុងអត្រា៤,៣% គឺទាបជាងការព្យាករពីលើកមុនដោយរំពឹងមានក្នុងអត្រា៤,៦%។

ចំណែកតំបន់អាស៊ីខាងត្បូងវិញត្រូវបានគេរំពឹងដូចគ្នា នឹងមានកំណើនកាន់តែខ្លាំងរហូតដល់៥,៧% នៅឆ្នាំនេះដោយបានកើនឡើងពីអត្រា៥,៤% ដែលគេបានព្យាករកាលពីលើកមុន ដោយសេដ្ឋកិច្ចរបស់ប្រទេសឥណ្ឌាត្រូវបានគេមើលឃើញថា នឹងកើនឡើងក្នុងកម្រិតមួយកាន់តែលឿនរហូតដល់អត្រា៦,៧% នៅឆ្នាំនេះ។

អត្រាអតិផរណានៅក្នុងតំបន់អាស៊ី ដែលកំពុងអភិវឌ្ឍន៍ត្រូវបានគេព្យាករថា នឹងថយចុះមកនៅត្រឹម៣,៥% នៅឆ្នាំនេះ ពោលគឺបានធ្លាក់ចុះបន្តិចពីការរំពឹងទុកពីលើកមុនរបស់ធនាគារ ADB ប៉ុន្តែអត្រាដដែលនេះនឹងកើនឡើងបន្តិចវិញដល់៣,៦%នៅឆ្នាំ២០២៤៕

អត្ថបទ៖ សុខ ជា