នៅក្នុងបទសម្ភាសន៍របស់សារព័ត៌មាន Izvestia កាលពីថ្ងៃចន្ទ, លោក ហ្កេណាឌី ហ្កាទីឡូវ (Gennady Gatilov) បានប្រាប់ថា ការអនុវត្តលក្ខខណ្ឌនានាដើម្បីពន្យាពេលកិច្ចព្រមព្រៀងដឹកគ្រាប់ធញ្ញជាតិតាមសមុទ្រខ្មៅ គឺ«កំពុងជាប់គាំង»។ តាមលោក ហ្កាទីឡូវ លក្ខខណ្ឌរបស់រុស្ស៊ីមួយ ក្នុងចំណោមលក្ខខណ្ឌផ្សេងៗទៀត គឺការភ្ជាប់ធនាគារកសិកម្មរបស់រុសស្ស៊ី (Rosselkhozbank) ជាមួយប្រព័ន្ធទូរទាត់ប្រាក់សាកស (SWIFT) ឡើងវិញ។
លោក ហ្កាទីឡូវ បានគូសបញ្ជាក់ថា ៖ «រុស្ស៊ីបានពន្យាពេលកិច្ចព្រមព្រៀងនោះជាច្រើនដងរួចមកហើយ ក្នុងក្តីសង្ឃឹមថានឹងមានការផ្លាស់ប្តូរជាវិជ្ជមាន»។ លោកបានកត់សម្គាល់ក្នុងសម្ដីដើមថា៖ «ប៉ុន្តែ អ្វីដែលយើងកំពុងឃើញឥឡូវនេះ មិនអនុញ្ញាតឱ្យយើងមានមូលហេតុដើម្បីរក្សាស្ថានភាពដើម[នៃកិច្ចព្រមព្រៀង]ទេ»។
សូមរំលេចបន្តិចថា កិច្ចព្រមព្រៀងសមុទ្រខ្មៅរវាងរុស្ស៊ីនិងអ៊ុយក្រែន ដែលត្រូវបានសម្របសម្រួលដោយអង្គការសហប្រជាជាតិនិងទួកគីកាលពីខែកក្កដា ឆ្នាំ២០២២កន្លងទៅ មានគោលបំណងទប់ស្កាត់វិបត្តស្បៀងអាហារនៅក្នុងពិភពលោក។ កិច្ចព្រមព្រៀងនោះអនុញ្ញាតឱ្យគ្រាប់ធញ្ញជាតិអ៊ុយក្រែនដែលជាប់ផុងក្នុងការឈ្លានពានរបស់រុស្ស៊ី អាចនាំចេញដោយសុវត្ថិភាពពីកំពង់ផែសមុទ្រខ្មៅដែលស្ថិតក្រោមការគ្រប់គ្រងរបស់រុស្ស៊ី ទៅលក់នៅទីផ្សារអន្តរជាតិ។
អត្ថបទគួរអាន
កាលពីសប្តាហ៍មុន អង្គការសហប្រជាជាតិបាននិយាយថា គេកំពុងមានការព្រួយយបារម្ភដោយមិនឃើញមានកប៉ាល់ថ្មីត្រូវបានចុះបញ្ជីក្រោមកិច្ចព្រមព្រៀងសមុទ្រខ្មៅទេ ចាប់តាំងពីថ្ងៃទី២៦ ខែមិថុនាមក ទោះបីជាការស្នើសុំចុះបញ្ជីត្រូវបានធ្វើឡើងដោយនាវាចំនួន ២៩ ក៏ដោយ។
សម្ដីរបស់ប្រេសិតរុស្ស៊ីនៅអង្គការសហប្រជាជាតិ លោក ហ្កេណាឌី ហ្កាទីឡូវ ខាងលើ នៅក្នុងបទសម្ភាសជាមួយសារព័ត៌មាន Izvestia ជាការបន្ទរតាមរដ្ឋមន្ត្រីការបរទេសរុស្ស៊ី លោក ស៊ែហ្គៃ ឡាវ្រូវ ដែលបានថ្លែងកាលពីថ្ងៃសុក្រសប្ដាហ៍មុន។
លោក ឡាវ្រូវ បានលើកឡើងនៅចំពោះមុខអ្នកសារព័ត៌មានដោយចង្អុលមុខ សហរដ្ឋ អាមេរិក និង អង់គ្លេស ថា ៖ « អាកប្បកិរិយា របស់ លោកខាងលិច ចំពោះ កិច្ច ព្រមព្រៀង នេះ គឺ អាក្រក់ខ្លាំងណាស់ »។
លោក ឡាវ្រូវ បាននិយាយថា បញ្ហាចុងក្រោយមួយសម្រាប់រុស្ស៊ី គឺការវាយប្រហារលើបំពង់បង្ហូរអាម៉ូញាក់ ដែលគាត់បានចោទថាជាស្នាដៃរបស់អ៊ុយក្រែន ហើយអ៊ុយក្រែនបានចោទប្រកាន់រុស្ស៊ីថាជាអ្នកបំផ្លាញវា។
លោក ឡាវ្រូវ បាននិយាយក្នុងសម្ដីផ្ទាល់ថា៖ “ខ្ញុំមិនឃើញមានអំណះអំណាងអ្វីដែលអាចលើកឡើងពីអ្នកដែលចង់បន្តកិច្ចព្រមព្រៀងសមុទ្រខ្មៅនោះទេ”។
កាលពីថ្ងៃសុក្រនោះដែរ អ្នកនាំពាក្យអង្គការសហប្រជាជាតិ លោក ហ្វាហាន ហាក់ (Farhan Haq) បាននិយាយថា ភាគីនានាត្រូវតែធានាថា មាននាវាបន្ថែមទៀតដែលត្រូវបានអនុញ្ញាតឱ្យធ្វើដំណើរតាមច្រករបៀងមនុស្សធម៌ដែនសមុទ្រនៅក្នុងសមុទ្រខ្មៅ ដែលជាសេវាជំនួយសង្គ្រោះសកលសម្រាប់ធានាសន្តិសុខស្បៀង"៕
