កម្ពុជានាំចេញជ្រូកទៅវៀតណាមបានជាង២០ម៉ឺនក្បាល ក្រោយតម្លៃជ្រូករស់ក្នុងស្រុកធ្លាក់ថ្លៃខ្លាំង

ការធ្លាក់ថ្លៃតម្លៃជ្រូករស់ក្នុងស្រុក ត្រូវបានអ្នកជំនាញអះអាងថា គឺដោយសារមានការហូរចូលសាច់បង្កកខុសច្បាប់និងខូចគុណភាពមកកាន់ទីផ្សារកម្ពុជាច្រើនពេក គួបផ្សំបញ្ហាការធ្លាក់ចុះនៃសេដ្ឋកិច្ច ដែលបង្កឡើងដោយវិបត្តិសង្គ្រាម និងបញ្ហាភាពតានតឹងផ្នែកពាណិជ្ជកម្ម និងភូមិសាស្ត្រនយោបាយរវាងប្រទេសមហាអំណាចធំៗ។ បើតាមការគូសបញ្ជាក់របស់សមាគមអ្នកចិញ្ចឹមសត្វ តម្លៃជ្រូករស់បានធ្លាក់ចុះមកនៅចន្លោះពីជាង៥ពាន់រៀលទៅ៧ពាន់រៀលក្នុងមួយគីឡូក្រាម ដែលជាការធ្លាក់ចុះដ៏ទាបមួយ។

លោក ស៊្រុន ពៅ ប្រធានសមាគមអ្នកចិញ្ចឹមសត្វកម្ពុជា បានទម្លាយដោយឥតលាក់លៀមថា ស្របពេលតម្លៃជ្រូករស់ក្នុងស្រុកធ្លាក់ថ្លៃខ្លាំង អ្នកចិញ្ចឹមជ្រូកមួយចំនួនដែលជាសមាជិករបស់សមាគមបានលួចនាំចេញជ្រូកទៅលក់នៅប្រទេសក្បែរខាងវៀតណាម ដែលជាអ្នកនាំចេញផលិតផលកសិកម្មដ៏ធំមួយប្រចាំតំបន់អាស៊ាន។ បើតាមការអះអាងរបស់ប្រធានសមាគមរូបនេះ នៅក្នុងរយៈពេលប៉ុន្មានខែកន្លងមកនេះកម្ពុជា បាននាំចេញជ្រូកទៅវៀតណាមបានជាង២០ម៉ឺនក្បាលហើយ។ ប៉ុន្តែលោកមិនបានបញ្ជាក់លម្អិតជុំវិញតម្លៃជ្រូករស់របស់កម្ពុជា ដែលនាំចេញទៅវៀតណាមបានមួយគីឡូក្រាមប៉ុន្មាននោះទេ។

ប្រធានសមាគមរូបនេះកត់ចំណាំថា តម្លៃជ្រូក ឬសត្វផ្សេងៗតែងតែឡើងថ្លៃរៀងរាល់រដូវបុណ្យ ការ ជាពិសេសជិតពិធីបុណ្យចូលឆ្នាំចិនតែម្តង តែមកទល់ពេលនេះតម្លៃជ្រូក និងសត្វរស់ទាំងនោះមិនទាន់មានការឡើងថ្លៃនោះទេ។ បញ្ហានេះត្រូវបានអ្នកជំនាញរូបនេះ វាយតម្លៃថា អាចបណ្តាលមកពីការហូរចូលនៃសាច់បង្កកខុសច្បាប់ ឬខូចគុណភាពមានបរិមាណច្រើនពេក។ យ៉ាងណាមិញលោកអះអាងថា ទោះបីគ្មានការនាំចូលបំណែកសាច់បង្កក ក៏កម្ពុជាមានសមត្ថភាពចិញ្ចឹមសត្វសម្រាប់ផ្គត់ផ្គង់តម្រូវការប្រើប្រាស់សាច់របស់ពលរដ្ឋគ្រប់គ្រាន់ដែរ។

វិស័យចិញ្ចឹមសត្វក្នុងស្រុកបាន និងកំពុងក្លាយជាប្រធានបទដ៏ក្តៅគគុកមួយ ដែលត្រូវបានមហាជនលើកយកមកជជែក និងបង្ហោះលើបណ្តាញសង្គមនានា ក្រោយវិស័យនេះរងឥទ្ធិពលយ៉ាងធ្ងន់ធ្ងរពីការហូរចូលសាច់បង្កកខុសច្បាប់ពីក្រៅប្រទេស ដែលបានទាញទម្លាក់តម្លៃជ្រូក និងសត្វរស់ផ្សេងៗក្នុងស្រុកធ្លាក់ថ្លៃយ៉ាងគំហុក។ បញ្ហានេះបានធ្វើអ្នកចិញ្ចឹមសត្វមួយចំនួនប្រឈមនឹងការក្ស័យធន និងបោះបង់ការចិញ្ចឹមដោយសារមិនអាចទប់នឹងការខាងបង់បាន។ បើតាមការអះអាងរបស់លោក ស៊្រុន ពៅ មានកសិករចិញ្ចឹមជ្រូកខ្នាតតូច ដែលជាសមាជិករបស់សមាគមរហូតដល់៩០% បានផ្អាក និងបោះបង់ការចិញ្ចឹម ខណៈតាមកសិដ្ឋានធំៗមួយចំនួនបានកាត់បន្ថយបរិមាណនៃការចិញ្ចឹម។ ប្រធានសមាគមរូបនេះបានគូសបញ្ជាក់កាលពីពេលថ្មីៗថា តម្លៃជ្រូករស់បានធ្លាក់ថ្លៃទាបបំផុតរហូតដល់ជាង៦ពាន់រៀលក្នុងមួយគីឡូក្រាម ចំណែកសត្វគោធ្លាក់រហូតដល់៧ពាន់ទៅ៨ពាន់រៀលក្នុងមួយគីឡូក្រាម។

យ៉ាងណាក៏ដោយ រាជរដ្ឋាភិបាលកម្ពុជាកាលពីពេលថ្មីៗបានដាក់ចេញនូវវិធានការមួយ ដោយសម្រចផ្អាកការនាំចូលជាបណ្ដោះអាសន្ននូវគ្រឿងក្នុង និងបំណែកសាច់បង្កកជ្រូក គោ ក្របី មាន់ រយៈពេល៦ខែ ដើម្បីជួយបន្ធរបន្ថយបញ្ហាជូនប្រជាកសិករ ដែលជាអ្នកចិញ្ចឹមសត្វ ក៏ដូចជាលើកកម្ពស់វិស័យចិញ្ចឹមសត្វនៅកម្ពុជា។ វិធានការនេះនឹងចាប់អនុវត្តពីថ្ងៃទី១២ ខែមីនា ដល់ថ្ងៃទី១២ ខែកញ្ញា ឆ្នាំ២០២៤។ ប៉ុន្ដែវិធានការនេះមិនអនុវត្តចំពោះគម្រោងវិនិយោគមានលក្ខណៈសម្បត្តិគ្រប់គ្រាន់សម្រាប់ជាធាតុចូលផលិតកម្មសម្រាប់ការនាំចេញឡើយ៕