![វិស័យថាមពល](https://cdn.cambonomist.com/media/images/kmpch-snghbr_Yvq2ue2.2e16d0ba.fill-960x540.jpg)
ឯកឧត្តម កែវ រតនៈ រដ្ឋមន្រ្តីក្រសួងរ៉ែ និងថាមពល បានគូសបញ្ជាក់ថា កម្ពុជា និងសិង្ហបុរី បានឯកភាពគ្នាផ្តួចផ្តើមគំនិតចង់បង្កើតបណ្តាញអគ្គិសនីអាស៊ានឡើងវិញ ដែលឈានទៅសម្រេចមហិច្ឆតា ដែលអាស៊ានបានផ្តួចផ្តើមចង់បង្កើតបណ្តាញនេះ ដើម្បីភ្ជាប់ប្រទេសអាស៊ានទាំង១០ កាលពីជាង២៥ឆ្នាំមុន។ បើតាមការថ្នាក់ដឹកនាំរូបនេះ ជំហររបស់កម្ពុជា គឺធ្វើយ៉ាងណាឱ្យប្រទេសអាស៊ានទាំង១០ មានការឯកភាពគ្នា សាមគ្គីគ្នា ដើម្បីជំរុញបង្កើតបណ្តាញអគ្គិសនីអាស៊ាននេះឱ្យចេញជារូបរាងពេញលេញ ដើម្បីទប់ទល់នឹងការបម្រែបម្រួលអាកាសធាតុ និងការការពារបរិស្ថាន ក៏ដូចជាជំរុញថាមពលបៃតង ឱ្យមានភាពសម្បូរបែបនៅអាស៊ាន និងទប់កុំឱ្យតម្លៃអគ្គិសនីឡើងថ្លៃជាដើម។
លើសពីនេះ ការបង្កើតបណ្តាញអគ្គិសនីអាស៊ាននេះ ក៏នឹងផ្តល់ផលប្រយោជន៍ដល់កម្ពុជា ជាច្រើនផងដែរ តាមរយៈការជួយបង្កើនភាពប្រកួតប្រជែងផ្នែកសេដ្ឋកិច្ច និងជួយទាក់ទាញការវិនិយោគសម្រាប់រយៈពេលវែង និងបង្កើតការងារថ្មីៗជូនដល់យុវជនយុវនារី និងជាឱកាសធ្វើឱ្យកម្ពុជាមានកិត្តិនាមកាន់តែល្អក្នុងក្របខណ្ឌអាស៊ានផងដែរ។
គួរជម្រាបថា បច្ចុប្បន្នការទិញលក់ និងតភ្ជាប់បណ្តាញអគ្គិសនីនៅក្នុងតំបន់អាស៊ាន គឺធ្វើឡើងជាទម្រង់ទ្វេភាគីរវាងប្រទេសមួយទៅប្រទេសមួយប៉ុណ្ណោះ ដោយមិនមានការតភ្ជាប់រួមគ្នាទាំង១០ប្រទេសនោះទេ តួយ៉ាងដូចជាកម្ពុជា ធ្វើកិច្ចការងារនេះជាមួយវៀតណាម និងឡាវ ខណៈសិង្ហបុរី ទិញលក់អគ្គិសនីជាមួយម៉ាឡេស៊ី ថៃ និងឡាវជាដើម៕